ସୁପ୍ରିମକୋର୍ଟରେ ଘଣ୍ଟା ବିବାଦ

ନନ୍ଦିଘୋଷ ବ୍ୟୁରୋ: ମହାରାଷ୍ଟ୍ର ବିଧାନସଭା ନିର୍ବାଚନ ପୂର୍ବରୁ ବିବାଦ। ଏନସିପି ଚିହ୍ନ ଘଣ୍ଟାକୁ ନେଇ ମାମଲା ପହଞ୍ଚିଲା ସୁପ୍ରିମକୋର୍ଟରେ। ବିଧାନସଭା ନିର୍ବାଚନରେ ଘଣ୍ଟା ଚିହ୍ନର ବ୍ୟବହାର ଉପରେ ରୋକ୍ ଲଗାଇବାକୁ ଦାବି କରି ସୁପ୍ରିମକୋର୍ଟଙ୍କ ଦ୍ବାରସ୍ଥ ହୋଇଛନ୍ତି ଶରଦ ପାଓ୍ବାର । ଏନସିପିର ବିଭାଜନ ପରେ ମୂଳ ଏନସିପି ଭାବେ ଅଜିତ ପାଓ୍ବାର ଗୋଷ୍ଠୀକୁ ମାନ୍ୟତା ମିଳିବା ସହ ଘଣ୍ଟା ଚିହ୍ନ ମିଳିଥିଲା । ଏନସିପିର ପ୍ରତିଷ୍ଠାତା ଶରଦ ପାଓ୍ବାରଙ୍କୁ ଲାଗିଥିଲା ଧକ୍କା । ତାଙ୍କ ଗୋଷ୍ଠୀର ନାମ ହୋଇଥିଲା ଏନସିପି(ଶରଦ ପାଓ୍ବାର) ଓ ଦଳକୁ ତୂରୀ ଚିହ୍ନ ମିଳିଥିଲା । ଶରଦ ନିଜ ପିଟିସନରେ ଦର୍ଶାଇଛନ୍ତି- ଅଜିତ ପାଓ୍ବାର ନେତୃତ୍ବାଧୀନ ଏନସିପିକୁ ଘଣ୍ଟା ବଦଳରେ ଅନ୍ଯ କିଛି ଚିହ୍ନ ଦିଆଯାଉ । ଘଣ୍ଟା ଚିହ୍ନ ମିଳିବା ଦ୍ବାରା ଭୋଟର ଦ୍ବନ୍ଦ୍ବରେ ପଡୁଛନ୍ତି । ଆସନ୍ତା ଅକ୍ଟୋବର ୧୫ରେ ମାମଲାର ଶୁଣାଣି ହେବ । ଗତ ୨୦୨୩ ଜୁଲାଇ ୨ରେ ଏନସିପିର ବିଭାଜନ ହୋଇଥିଲା । ମାମଲାର ବିଚାର କରି ଗତ ୨୦୨୪ ଫେବ୍ରୁଆରୀ 6ରେ ଭାରତର ନିର୍ବାଚନ କମିସନ ଅଜିତ ପାଓ୍ବାର ନେତୃତ୍ବାଧୀନ ଗୋଷ୍ଠୀକୁ ପ୍ରକୃତ ଏନସିପି ମାନ୍ଯତା ଦେବା ସହ ବହୁଚର୍ଚ୍ଚିତ ଘଣ୍ଟା ଚିହ୍ନ ପ୍ରଦାନ କରିଥିଲେ । ଏହା ସହ ଶରଦ ପାଓ୍ବାର ଗୋଷ୍ଠୀକୁ ଏନସିପି ଶରଦଚନ୍ଦ୍ର ପାଓ୍ବାର ମାନ୍ଯତା ଦେବା ସହ ତୂରୀ ଚିହ୍ନ ପ୍ରଦାନ କରିଥିଲେ । ସେହିପରି ଗତ ୨୦୨୪ ମାର୍ଚ୍ଚ ୫ରେ ମହାରାଷ୍ଟ୍ର ବିଧାନସଭା ବାଚସ୍ପତି ରାହୁଲ ନାର୍ବେକର ଅଜିତ ପାଓ୍ବାର ଗୋଷ୍ଠୀକୁ ପ୍ରକୃତ ଏନସିପି ବୋଲି ମାନ୍ଯତା ପ୍ରଦାନ କରିଥିଲେ ।