ମୋଦୀ ଜୀ ! ଆପଣଙ୍କ ଅହଂକାର ମଧ୍ୟ ଭାଙ୍ଗିଯିବ : ରାହୁଲ ଗାନ୍ଧୀ

ନନ୍ଦିଘୋଷ ବ୍ୟୁରୋ : ଲୋକସଭାର ବିରୋଧୀ ଦଳର ନେତା ରାହୁଲ ଗାନ୍ଧୀ ଦିଲ୍ଲୀ ପୋଲିସ ଦ୍ୱାରା ସିନ୍ଧୁ ସୀମାରେ ପରିବେଶ କର୍ମୀ ସୋନମ ୱାଙ୍ଗଚୁକ ଏବଂ ତାଙ୍କ ସମର୍ଥକଙ୍କ ଗିରଫଦାରୀକୁ ସମାଲୋଚନା କରିଛନ୍ତି । ଏହା ଗ୍ରହଣୀୟ ନୁହେଁ ବୋଲି କହିଛନ୍ତି ।  ଏହା ସହ ପ୍ରଧାନମନ୍ତ୍ରୀ  ନରେନ୍ଦ୍ର ମୋଦୀଙ୍କୁ ମଧ୍ୟ ଟାର୍ଗେଟ କରି କହିଛନ୍ତି, କୃଷକ ଆନ୍ଦୋଳନ ଭଳି ଏଥର ମଧ୍ୟ ଆପଣଙ୍କର ଅହଂକାର ମଧ୍ୟ ଭାଙ୍ଗିଯିବ ।

ରାହୁଲ ଗାନ୍ଧୀ ‘X’ରେ ଏକ ପୋଷ୍ଟରେ ଲେଖିଛନ୍ତି, ପରିବେଶ ତଥା ସାମ୍ବିଧାନିକ ଅଧିକାର ପାଇଁ ଶାନ୍ତିପୂର୍ଣ୍ଣ ଭାବେ ପଦଯାତ୍ରା କରୁଥିବା ସୋନମ ୱାଙ୍ଗଚୁକ ଏବଂ ଶହ ଶହ ଲଦାଖୀଙ୍କ ଗିରଫଦାରୀ ଗ୍ରହଣୀୟ ନୁହେଁ। ଏହି ଗିରଫଦାରୀ ପାଇଁ ସେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କୁ ଦାୟୀ କରିଥିଲେ।

ରାହୁଲ ଗାନ୍ଧୀ କହିଛନ୍ତି ଯେ ଲଦାଖର ଭବିଷ୍ୟତ ପାଇଁ ଛିଡା ହୋଇଥିବା ବୃଦ୍ଧମାନଙ୍କୁ କାହିଁକି ଦିଲ୍ଲୀ ସୀମାରେ ଅଟକ ରଖାଯାଉଛି? ଆପଣଙ୍କୁ ଲଦାଖର ସ୍ୱର ଶୁଣିବାକୁ ପଡିବ । ଆପଣଙ୍କୁ କହିବାକୁ ଗଲେ ସୋନମ ୱାଙ୍ଗଚୁକ ଏବଂ ତାଙ୍କ ସମର୍ଥକଙ୍କୁ ସୋମବାର ବିଳମ୍ବିତ ରାତିରେ ଦିଲ୍ଲୀ ପୋଲିସ ଗିରଫ କରିଥିଲା । ଦିଲ୍ଲୀ ସୀମା ଉପରେ BNSର ଧାରା ୧୬୩ ଲାଗୁ କରାଯାଇଛି ବୋଲି ଦିଲ୍ଲୀ ପୋଲିସ ଘୋଷଣା କରିଛି ।

ୱାଙ୍ଗଚୁକ୍ ସୋସିଆଲ ମିଡିଆ ପ୍ଲାଟଫର୍ମ ‘ଏକ୍ସ’ରେ ତାଙ୍କ ଗିରଫଦାରୀ ଖବରକୁ ମଧ୍ୟ ସେୟାର କରିଛନ୍ତି। ୱାଙ୍ଗଚୁକ୍ ପୋଷ୍ଟ କରିଛନ୍ତି, ମୁଁ ଏବଂ ମୋର ୧୫୦ସହକର୍ମୀଙ୍କୁ ଦିଲ୍ଲୀ ସୀମାନ୍ତରେ ପୋଲିସ୍ ଫୋର୍ସ ଦ୍ୱାରା ଗିରଫ କରାଯାଇଛି । ଏଥିମଧ୍ୟରେ ୮୦ବର୍ଷରୁ ଅଧିକ ବୟସ୍କ ବୃଦ୍ଧ ଏବଂ ମହିଳା ଏବଂ କିଛି ଡଜନ ପୂର୍ବତନ ସେନା ସୈନିକ ଅନ୍ତର୍ଭୁକ୍ତ  । ଆମ ସହିତ କ’ଣ ହେବ ଆମେ ଜାଣିନାହୁଁ  । ୱାଙ୍ଗଚୁକ୍ କହିଛନ୍ତି ଯେ ସେମାନେ ବାପୁଙ୍କ ସମାଧି ଆଡକୁ ଏକ ଶାନ୍ତିପୂର୍ଣ୍ଣ ପଦଯାତ୍ରା କରୁଛନ୍ତି ।

ୱାଙ୍ଗଚୁକ୍ ଏବଂ ଅନ୍ୟ ସ୍ବେଚ୍ଛାସେବୀମାନେ ଲେହରୁ ନୂଆଦିଲ୍ଲୀ ପର୍ଯ୍ୟନ୍ତ ଏକ ପାଦ ପଦଯାତ୍ରା ଆରମ୍ଭ କରି ଲଦାଖ ନେତୃତ୍ୱଙ୍କ ସହ ସେମାନଙ୍କ ଦାବି ସମ୍ପର୍କରେ ଆଲୋଚନା ଆରମ୍ଭ କରିବାକୁ ଅନୁରୋଧ କରିଥିଲେ। ସେମାନଙ୍କର ଏକ ପ୍ରମୁଖ ଦାବି ହେଉଛି ଲଦାଖକୁ ସମ୍ବିଧାନର ଷଷ୍ଠ ସୂଚୀରେ ଅନ୍ତର୍ଭୁକ୍ତ କରିବା, ଯାହା ସ୍ଥାନୀୟ ଲୋକଙ୍କୁ ସେମାନଙ୍କର ଜମି ଏବଂ ସାଂସ୍କୃତିକ ପରିଚୟ ରକ୍ଷା ପାଇଁ ଆଇନ ପ୍ରଣୟନ କରିବାର କ୍ଷମତା ଦେବ ।

ସୋନମ ୱାଙ୍ଗଚୁନ୍ ୧ ସେପ୍ଟେମ୍ବରରେ ଲେହରୁ ପଦଯାତ୍ରା ଆରମ୍ଭ କରିଥିଲେ | ଏହାପୂର୍ବରୁ, ସେପ୍ଟେମ୍ବର ୧୪ରେ ହିମାଚଳ ପ୍ରଦେଶରେ ପହଞ୍ଚିବା ପରେ ୱାଙ୍ଗଚୁକ୍ ତାଙ୍କ ମିଶନର ଉଦ୍ଦେଶ୍ୟ ଉପରେ ଗୁରୁତ୍ୱାରୋପ କରିଥିଲେ । ସେ କହିଛନ୍ତି ଯେ ପାଞ୍ଚ ବର୍ଷ ପୂର୍ବେ ଦିଆଯାଇଥିବା ପ୍ରତିଶ୍ରୁତି ବିଷୟରେ ସରକାରଙ୍କୁ ମନେ ପକାଇବା ପାଇଁ ଆମେ ଏକ ମିଶନରେ ଅଛୁ ।

ଏହାପୂର୍ବରୁ, ସୋନମ ୱାଙ୍ଗଚୁକ୍ ଲେହରେ ନଅ ଦିନର ଉପବାସ ସମାପ୍ତ କରି ଲଦାଖର ଦୁର୍ବଳ ପର୍ବତ ପରିବେଶ ଏବଂ ଆଦିବାସୀଙ୍କୁ ସୁରକ୍ଷା ଦେବା ଉପରେ କର୍ତ୍ତୃପକ୍ଷଙ୍କ ଦୃଷ୍ଟି ଆକର୍ଷଣ କରିଥିଲେ। ଅଗଷ୍ଟ ୨୦୧୯ ରେ ଧାରା ୩୭୦ରଦ୍ଦ ହେବା ପରେ ଜାମ୍ମୁ କାଶ୍ମୀରକୁ ଜାମ୍ମୁ କାଶ୍ମୀର ଏବଂ ଲଦାଖର ଦୁଇଟି କେନ୍ଦ୍ର ଶାସିତ ରାଜ୍ୟରେ ବିଭକ୍ତ କରାଯାଇଥିଲା ।