ରାଜ୍ଯ ସରକାରଙ୍କ ଉପରେ ବର୍ଷିଲା ବିଜେଡି ମହିଳା ଟିମ୍

ଭୁବନେଶ୍ବର : ରାଜ୍ଯରେ ଭୁଶୁଡି ପଡିଥିବା ଆଇନ ଶୃଙ୍ଖଳା ସ୍ଥିତିକୁ ନେଇ ବର୍ଷିଛନ୍ତି ବିଜେଡି ମହିଳା ଟିମ । ରାଜ୍ଯ ସରକାରଙ୍କୁ ଘେରିଛନ୍ତି ବିଜେଡି ନେତ୍ରୀ ସୁଲତା ଦେଓ, ଭୁବନେଶ୍ବର ମେୟର ସୁଲୋଚନା ଦାସ ଓ ବିଜେଡି ନେତ୍ରୀ ଲେଖାଶ୍ରୀ ସାମନ୍ତସିଂହାର । ରାଜ୍ୟପାଳଙ୍କ ପୁଅ ଓଡିଆ ଅଧିକାରୀଙ୍କୁ ମାଡ଼ ମାରିବା ଘଟଣାରେ ଯଦି ସରକାର କାର୍ଯ୍ୟାନୁଷ୍ଠାନ ନେଇଥାନ୍ତେ  ତେବେ ଆଜି ଏହି ମେଜର ଓ ବାନ୍ଧବୀ ଘଟଣା ଘଟିନଥାନ୍ତା । ଶହେ ଦିନରେ ଓଡିଶାର ଛବି ସାରା ଭାରତ ବର୍ଷରେ ତଳକୁ ଗଲାଣି ବୋଲି ସମାଲୋଚନା କରିଛନ୍ତି ବିଜେଡି ନେତ୍ରୀ ସୁଲତା ଦେଓ । ସେହିପରି ଲେଖାଶ୍ରୀ ସାମନ୍ତସିଂହାର କଟାକ୍ଷ କରି କହିଛନ୍ତି, ଥାନା ଭିତରେ ଯେପରି ଜଣେ ସଶକ୍ତ ମହିଳାଙ୍କୁ ଯେପରି ନିର୍ଯାତନା ଦିଆଗଲା ତାହା ନିନ୍ଦନୀୟ । ଯଦି ଜଣେ ସେନା ଅଧିକାରୀ ଓ ତାଙ୍କର ବାନ୍ଧବୀଙ୍କୁ ପୋଲିସ ନିର୍ଯ୍ୟାତନା ଦେଇ ପାରୁଛନ୍ତି ତେବେ ରାଜ୍ୟରେ ସାଧାରଣ ଲୋକଙ୍କ ପ୍ରତି କି ଅତ୍ୟାଚାର ହେଉଥିବ ତାହା ଏଥିରୁ ଜଣାପଡୁଛି  । ପୂର୍ବ ସରକାର ‘ମୋ ସରକାର’ ଜରିଆରେ ସବୁ ଥାନାକୁ ନିୟନ୍ତ୍ରଣରେ ରଖିଥିଲେ । କିଏ ଥାନାକୁ ଆସୁଥିଲା ତାହା ଆଗରୁ ଜଣାପଡୁଥିଲା । ରାଜ୍ଯ ସରକାର ଆଜି ଏ ଘଟଣାକୁ ଲୁଚାଇବାକୁ ଚାହୁଁଛନ୍ତି । ମୋହନ ସରକାର ଏକ ଦୁର୍ବଳ ସରକାର । ଥାନା ଭିତରେ ସେନା ଅଧିକାରୀଙ୍କୁ ମାଡ଼ ମାରିବା କଣ ଓଡିଆ ଅସ୍ମିତା ବୋଲି ପଚାରିଛନ୍ତି ଲେଖାଶ୍ରୀ । ଯେଉଁମାନେ ରାଷ୍ଟ୍ରକୁ ସୁରକ୍ଷା ଦେଉଛନ୍ତି, ବିଜେପି ରାଷ୍ଟ୍ରବାଦୀ ଦଳ ହୋଇ କିପରି ସେନା ଅଧିକାରୀଙ୍କୁ ଥାନାରେ ମାଡ଼ ମାରିଲେ ?  ଏ ସରକାର କେବକ ଦିନ ପାଳନ କରିବାରେ ଲାଗିଛି l ୩୦ଦିନ, ୧୦୦ ଦିନର ମୁକୁଟ ପିନ୍ଧି ବୁଲୁଛନ୍ତି ସରକାର । ଲୋକଙ୍କ କଥା ଭୁଲି ଯାଇଛନ୍ତି ବୋଲି କଟାକ୍ଷ କରିଛନ୍ତି ଲେଖାଶ୍ରୀ । ରାଜଧାନୀରେ ମହିଳା ଅସୁରକ୍ଷିତ ବୋଲି କହି ବର୍ଷିଛନ୍ତି ଭୁବନେଶ୍ବର ମେୟର ସୁଲୋଚନା ଦାସ । ସେନା ଅଧିକାରୀ ଓ ତାଙ୍କ ବାନ୍ଧବୀଙ୍କୁ ମାଡ଼ ମାରିବା ଘଟଣାରେ ବିଜେଡି ରାଜଭବନ ଆଗରେ ବିକ୍ଷୋଭ ପ୍ରଦର୍ଶନ କରିବ । ରାଷ୍ଟ୍ରପତିଙ୍କୁ ସ୍ମାରକପତ୍ର ଦିଆଯିବ ବୋଲି କହିଛନ୍ତି ସୁଲୋଚନା ।