ଅବ୍ୟବସ୍ଥିତ ଶବ ବ୍ୟବଚ୍ଛେଦକୁ ନେଇ ଡାକ୍ତରଙ୍କୁ ଆକ୍ରମଣ, ୧୦ ଅଟକ

ନନ୍ଦପୁର: ଅବ୍ୟବସ୍ଥିତ ଶବ ବ୍ୟବଚ୍ଛେଦକୁ ନେଇ ଡାକ୍ତରଙ୍କ ଉପରେ ଆକ୍ରମଣ । ଘଟଣାରେ ଥାନାରେ ୧୦ ଜଣ ଅଟକ । କୋରାପୁଟ ନନ୍ଦପୁର ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରରେ ଘଟିଛି ଘଟଣା । ଡାକ୍ତର ସନ୍ଦୀପ ପଣ୍ଡାଙ୍କୁ ଆକ୍ରମଣ ଘଟଣା ପରେ ନନ୍ଦପୁର ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରରେ ସ୍ୱାସ୍ଥ୍ୟସେବା ବନ୍ଦ ।

ଗତକାଲି ଲମତାପୁଟ ବ୍ଲକ ଟିକରପଡା ପଞ୍ଚାୟତ ପାଞ୍ଜେଲ ଗ୍ରାମର କବିତା ଖିଲ ଘରେ ଆଚେତ ହୋଇ ପଡିଯାଇଥିଲେ । ସେ ଗର୍ଭବତୀ ରହିଥିଲେ । ତାଙ୍କୁ ନନ୍ଦପୁର ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରକୁ ନେଇଯାଇଥିଲେ ସମ୍ପର୍କୀୟ l ସେଠାରେ ଡାକ୍ତର କବିତାଙ୍କୁ ମୃତ ଘୋଷଣା କରିଥିଲେ । ପରେ ପୋଲିସକୁ ଖବର ଦେଇଥିଲେ ଡାକ୍ତର ।

ଗର୍ଭବତୀଙ୍କ ମୃତ୍ଯୁ ପରେ ପୋଲିସ ନିଜ ଆଡୁ ଏକ ମାମଲା ରୁଜୁ କରି ଶବ ବ୍ୟବଚ୍ଛେଦ ପାଇଁ ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରକୁ ପଠାଇ ଥିଲା । ମୃତ ମହିଳାଙ୍କ ସମ୍ପର୍କୀୟ ଶବ ବ୍ୟବଚ୍ଛେଦ ଗୃହ ଅବ୍ୟବସ୍ଥିତାକୁ ନେଇ ଡାକ୍ତରଙ୍କ ଉପରେ ରାଗି ଯାଇଥିଲେ । ପରେ ବ୍ୟକ୍ତି ଜଣକ ଆକ୍ରମଣ କରିଥିବା ନେଇ ନନ୍ଦପୁର ଥାନାରେ ଲିଖିତ ଅଭିଯୋଗ ହୋଇଛି । ପୋଲିସ ତଦନ୍ତ କରି ଘଟଣାରେ ସମ୍ପୃକ୍ତ ଥିବା ମୃତ୍ୟୁ ମହିଳାଙ୍କ ୧୦ ଜଣ ସମ୍ପର୍କୀୟଙ୍କୁ ଅଟକ ରଖିଛି ।