ନନ୍ଦିଘୋଷ ବ୍ୟୁରୋ: ବିବାଦୀୟ ଆଇଏଏସ ଅଧିକାରୀ ପୂଜା ଖେଡକର ମାମଲା। ପର୍ସୋନେଲ ଓ ଟ୍ରେନିଂ ବିଭାଗ ନିକଟରେ ଜଣିକିଆ କମିଟି ରିପୋର୍ଟ ଦାଖଲ କରିଛି। ପୂଜାଙ୍କ ବିରୋଧରେ ହୋଇଥିବା ଅଭିଯୋଗର ତଦନ୍ତ କରିବା ଲାଗି ଜଣିକିଆ କମିଟି ଗଠନ କରିଥିଲେ କେନ୍ଦ୍ର ସରକାର। ପୂଜାଙ୍କ ବିରୋଧରେ ବହୁ ଅଭିଯୋଗର ତଦନ୍ତ ଲାଗି ପର୍ସୋନେଲ ଓ ଟ୍ରେନିଂ ବିଭାଗର ଅତିରିକ୍ତ ସଚିବ ମନୋଜ ଦ୍ବିବେଦୀଙ୍କ ନେତୃତ୍ବରେ କମିଟି ଗଠିତ ହୋଇଥିଲା।
ପୂଜାଙ୍କ ସମ୍ପର୍କରେ ମହାରାଷ୍ଟ୍ର ମୁଖ୍ଯ ଶାସନ ସଚିବ ସୁଜାତା ସୌନିକଙ୍କ ନିକଟକୁ ପୁଣେ ଜିଲ୍ଲାପାଳ ସୁହାସ ଦ୍ବିବାସେ ପତ୍ର ଲେଖିବା ପରେ ୨୦୨୩ ବ୍ଯାଚ ଆଇଏଏସ ଅଫିସର ଚର୍ଚ୍ଚାକୁ ଆସିଥିଲେ। ସେ ବେଆଇନ ଭାବେ ଭିନ୍ନକ୍ଷମ ପ୍ରମାଣପତ୍ର ଓ ଓବିସି ପ୍ରମାଣପତ୍ର ଯୋଗାଡ କରିବାରେ ସକ୍ଷମ ହୋଇଥିଲେ ବୋଲି କୁହାଯାଇଥିଲା। ବିଭିନ୍ନ ତଥ୍ଯ ଜାଲିଆତି କରିବା ଅଭିଯୋଗ ବି ତାଙ୍କ ନାମରେ ରହିଛି। ତାଙ୍କ ଚୟନକୁ ରଦ୍ଦ କରିବା ଲାଗି ୟୁପିଏସସି ପକ୍ଷରୁ ତାଙ୍କୁ କାରଣ ଦର୍ଶାଅ ନୋଟିସ ଜାରି କରାଯାଇଥିଲା। କୃଷକଙ୍କୁ ପିସ୍ତଲ ଦେଖାଇ ପୂଜାଙ୍କ ମା ମନୋରମା ଖେଡକର ବି ପଡିଥିଲେ ଅଡୁଆରେ।
