ନୂଆଦିଲ୍ଲୀ : ଜି-୭ ଶିଖର ସମ୍ମିଳନୀରେ ଯୋଗ ଦେବାକୁ ଇଟାଲୀରେ ପହଞ୍ଚିଲେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି। ଆପୁଲିଆରେ ଆଯୋଜିତ ଗୃପ ଅଫ୍ ସେଭେନ୍ ଶିଖର ସମ୍ମିଳନୀରେ ଅଂଶଗ୍ରହଣ କରିବାକୁ ଇଟାଲୀରେ ମୋଦି। ଆପୁଲିଆ ବ୍ରିଣ୍ଡିଙ୍ଗ୍ ଏୟାରପୋର୍ଟରେ ପିଏମ ମୋଦିଙ୍କୁ ସ୍ଵାଗତ କରିଥିଲେ ଭାରତୀୟ ରାଷ୍ଟ୍ରଦୂତ ବାଣୀ ରାଓଙ୍କ ସମେତ ଅନ୍ୟ ପ୍ରମୁଖ ଅଧିକାରୀ। ବିଶ୍ଵ ନେତାଙ୍କୁ ସାକ୍ଷାତ କରିବା ସହ ଗୁରୁତ୍ଵପୂର୍ଣ୍ଣ ପ୍ରସଙ୍ଗ ଉପରେ ଆଲୋଚନା କରିବେ ପିଏମ ମୋଦି। ବିଭିନ୍ନ ପ୍ରସଙ୍ଗ ନେଇ ଚର୍ଚ୍ଚା କରିବାକୁ ଆଗ୍ରହୀ ଅଛନ୍ତି ବୋଲି ଏକ୍ସରେ ପୋଷ୍ଟ କରି ସୂଚନା ଦେଇଛନ୍ତି ପ୍ରଧାନମନ୍ତ୍ରୀ।
ବିଶ୍ଵବ୍ୟାପୀ ଦେଖାଦେଇଥିବା ବିଭିନ୍ନ ସମସ୍ଯାର ସମାଧାନ ସମେତ ଉଜ୍ଜଳ ଭବିଷ୍ୟତ ଗଠନ ନେଇ ଅନ୍ତରାଷ୍ଟ୍ରୀୟ ସହଯୋଗ ବଢାଇବା ମୁଖ୍ୟ ଲକ୍ଷ୍ୟ ବୋଲି କହିଛନ୍ତି। ଏହି ଅବସରରେ ଇଟାଲୀ ପ୍ରଧାନମନ୍ତ୍ରୀ ଜର୍ଜିଆ ମେଲୋନୀଙ୍କ ସମେତ ବିଶ୍ଵର ପ୍ରମୁଖ ନେତାଙ୍କ ସହ ଆଲୋଚନା କରିବେ। ଜି ସେଭେନ ବୈଠକରେ ଆମେରିକା, ବ୍ରିଟେନ, ଫ୍ରାନ୍ସ, ଇଟାଲୀ, ଜର୍ମାନୀ, କାନାଡା ଏବଂ ଜାପାନ ସାମିଲ ଅଛନ୍ତି। ଇଟାଲୀ ଜି-ସେଭେନ ବୈଠକର ଅଧ୍ୟକ୍ଷତା କରୁଛି। ଭାରତ ସମେତ ଆଫ୍ରିକା, ଦକ୍ଷିଣ ଆମେରିକା ଅଂଚଳର ୧୧ ରାଷ୍ଟ ଅଂଶଗ୍ରହଣ କରୁଛନ୍ତି। ଜି-୭ରେ ୟୁରୋପୀୟ ସଂଘ ସଦସ୍ୟ ନଥିଲେ ମଧ୍ୟ ଏହି ବୈଠକରେ ଅଂଶଗ୍ରହଣ କରିଆସୁଛି।
