ଗୁଜରାଟ ଗେମିଂ ଜୋନ ଅଗ୍ନିକାଣ୍ଡ ଘଟଣା; ବଢୁଛି ମୃତ୍ୟୁ ସଂଖ୍ୟା

ରାଜକୋଟ: ଗୁଜରାଟ ରାଜକୋଟ ଗେମିଂ ଜୋନ ଅଗ୍ନିକାଣ୍ଡ ଘଟଣାରେ ବଢୁଛି ମୃତ୍ଯୁ ସଂଖ୍ଯା। ବର୍ତ୍ତମାନ ସୁଦ୍ଧା ୨୭ ଜଣଙ୍କ ମୃତ୍ୟୁ ଘଟିଥିବାବେଳେ ଆହୁରି କିଛି ଲୋକ ଗୁରୁତର ଅବସ୍ଥାରେ ଚିକିତ୍ସିତ ହେଉଥିବା ସୂଚନା ମିଳିଛି। ସେପଟେ ଏହି ଘଟଣାରେ ଗୁଜରାଟ ସରକାର ୬ ଜଣ ବରିଷ୍ଠ ଆଇପିଏସ ଅଧିକାରୀଙ୍କୁ ବଦଳି କରିଛନ୍ତି। ବଦଳି ହୋଇଥିବା ଅଫିସରଙ୍କ ମଧ୍ଯରେ ରହିଛନ୍ତି ରାଜକୋଟ ପୋଲିସ କମିଶନର ରାଜୁ ଭାର୍ଗବ।

ତେବେ ମୃତକଙ୍କ ମଧ୍ଯରେ କେତେକ ଶିଶୁ ଥିବା ଜଣାପଡିଛି। ଏହି ଭୟାନକ ଘଟଣାରେ ରାଜ୍ଯ ସରକାରଙ୍କୁ ଗୁଜରାଟ ହାଇକୋର୍ଟ ଭର୍ତ୍ସନା କରିବା ପରେ ପରେ ଏହି ବଦଳି କରାଯାଇଛି। ରାଜକୋଟରେ ୨୦୨୧ରୁ ଟିଆରପି ଗେମିଂ ଜୋନ ପ୍ରତିଷ୍ଠା ହେବା ପରଠାରୁ ଦାୟିତ୍ବରେ ଥିବା ମ୍ଯୁନିସିପାଲ କମିଶନରଙ୍କୁ ଦାୟୀ ଦର୍ଶାଇଛନ୍ତି କୋର୍ଟ। ଏହା ସହ ରାଜ୍ଯ ପ୍ରଶାସନ ଉପରେ ଆଦୌ ଭରସା ନାହିଁ ବୋଲି ବର୍ଷିଛନ୍ତି ଅଦାଲତ।

ଏହି ଧରଣର ୬ଟି ଘଟଣା ଘଟିଥିବା ସତ୍ତ୍ବେ ପ୍ରଶାସନ କଣ କରୁଥିଲା ବୋଲି ପ୍ରଶ୍ନ କରିଛନ୍ତି କୋର୍ଟ। ଗତ ଶନିବାର ଅର୍ଥାତ ମେ ୨୫ ତାରିଖରେ ରାଜକୋଟର ନାନା-ମାଭା ଅଞ୍ଚଳରେ ଥିବା ଟିଆରପି ଗେମ ଜୋନରେ ଅଗ୍ନିକାଣ୍ଡ ଘଟିଥିଲା ଏବଂ କେତେକ ଶିଶୁ ସମେତ ୨୭ ଜଣଙ୍କ ପ୍ରାଣ ଯାଇଛି।