ପର୍ଣ୍ଣ ସାଇଟ୍ ହିଁ ଜଘନ୍ୟ ଅପରାଧର ମୂଳ କାରଣ: ନୀତୀଶ୍ କୁମାର

ପାଟନା: ଅଶ୍ଲୀଳ ଭିଡିଓ ୱେବସାଇଟ୍ ବା ପର୍ନ ସାଇଟ୍ ଗୁଡିକୁ ସମ୍ପୂର୍ଣ୍ଣ ଭାବେ ବନ୍ଦ କରିବା ପାଇଁ  ବିହାରର ମୁଖ୍ୟମନ୍ତ୍ରୀ ନୀତୀଶ୍ କୁମାରଙ୍କ ଦାବି ।  ଏନେଇ ସେ ପ୍ରଧାନମନ୍ତ୍ରୀଙ୍କୁ କଲେ ନିବେଦନ ।

ଦେଶର ଯୁବଗୋଷ୍ଠୀଙ୍କୁ ଆଖିରେ ରଖି ବିହାର ମୁଖ୍ୟମନ୍ତ୍ରୀ ଶୁକ୍ରବାର ଏହିପରି ନିବେଦନ କରିଛନ୍ତି । ପର୍ନ ୱେବସାଇଟ୍ ଗୁଡିକ ଯୁବ ସମାଜ ଉପରେ କୁପ୍ରଭାବ ପକାଉଥିବା ସେ କହିଛନ୍ତି । ଏହା ଫଳରେ ଯୁବ ସମାଜ ପ୍ରଲୋଭିତ ହୋଇ ଜଘନ୍ୟ ଅପରାଧମାନ କରୁଛନ୍ତି । ତେବେ ଏହି ଘଟଣାମାନ ହାଇଦ୍ରାବାଦ୍, ବିହାର୍ ଓ ଉତ୍ତର ପ୍ରଦେଶ ଭଳି ସ୍ଥାନ ମାନଙ୍କରେ ବହୁଳ ଭାବେ ହେଉଥିବାର ଜଣାପଡିଛି ।

ମୁଖ୍ୟମନ୍ତ୍ରୀ ସ୍ପଷ୍ଟ ଭାବେ କହିଛନ୍ତି ଯେ ସୋସିଆଲ୍ ମିଡିଆ ଆଜିର ଯୁଗରେ ଅପବ୍ୟବହାର ହେବାରେ ଲାଗିଛି । ସେଥିପାଇଁ ଏହାର କୁପ୍ରଭାବ ଯୁବ ସମାଜ ଉପରେ ପଡୁଛି । ବିଶେଷ କରି ସେ ଏହି ଅଶ୍ଲୀଳ ଭିଡିଓ ଗୁଡିକୁ ସମ୍ପୂର୍ଣ୍ଣ ବନ୍ଦ କରିବା ଦରକାର ବୋଲି କହିଛନ୍ତି । ତେବେ ନାରୀ ସୁରକ୍ଷା ପାଇଁ ତାଙ୍କର ଏହି ନିବେଦନକୁ ସରକାର କେତେ ସମର୍ଥନ ଜଣାଉଛନ୍ତି ତାହା ଦେଖିବା ବାକି ରହିଲା ।