କଳାଟଙ୍କା ଘଟଣା: ୫ମ ଦିନରେ ବି ଚାଲିଛି ଚଢ଼ାଉ

ବଲାଙ୍ଗୀର: ବଲାଙ୍ଗୀର ଆୟକର ବିଭାଗ ସୁଦପଡା ଦେଶୀ ମଦଭାଟିରେ ରେଡ ଘଟଣା I ପଞ୍ଚମ ଦିନରେ ମଧ୍ଯ ଚଢ଼ାଉ କରିଛି ଆୟକର ବିଭାଗ । ରେଡ୍ ପରଠୁ ଏପର୍ଯ୍ୟନ୍ତ ମିଳିଲାଣି ୧୬୦ କୋଟି ଟଙ୍କା । ଗତକାଲି ବିଳମ୍ବିତ ରାତି ପର୍ଯ୍ୟନ୍ତ ଚାଲିଥିଲା ଟଙ୍କା ଗଣତି । ୧୦୫ଟି ବସ୍ତା ଓ ଦୁଇଟି ବଡ଼ ପେଟିରୁ ଟଙ୍କା ଗଣତି ଶେଷ ହୋଇଛି । ଏଥିରୁ ପାଖାପାଖି ୧୬୦ କୋଟି ଟଙ୍କା ମିଳିଥବା ଜଣାପଡିଛି ।

ଆଜି ପୁଣି ଆଉ ୭୧ଟି ବ୍ୟାଗରେ ଥିବା ଟଙ୍କା ଗଣତି ଆରମ୍ଭ ହେବ । କଡା ସୁରକ୍ଷା ବ୍ୟବସ୍ଥା ମଧ୍ୟରେ ବଲାଙ୍ଗୀର ଏସବିଆଇର ମୁଖ୍ୟ ଶାଖାରେ ଏହି ଟଙ୍କାକୁ ଗଣାଯାଉଛି ।

ଚଢ଼ାଉ ପରେ ଜବତ ଟଙ୍କାକୁ ଦେଖି ଆୟକର ଅଧିକାରୀ ବି ହୋଇଯାଇଛନ୍ତି ତାଜୁବ । ସାରା ଦେଶରେ ଏବେ ଏହି ଆଇଟି ରେଡ୍ଡକୁ ନେଇ ଚାଲିଛି ଚର୍ଚ୍ଚା । ଜବତ ଟଙ୍କାର ପାହାଡ଼କୁ ଗଣିବାକୁ ନାକେଦମ ହେଲେଣି ବ୍ୟାଙ୍କ କର୍ମଚାରୀ । ଦିନରାତି ଚାଲିଛି ଟଙ୍କା ଗଣା, ହେଲେ ସରିବାର ନା ଧରୁନି । ଏପଟେ ଟଙ୍କା ଗଣିବାକୁ କମ ପଡ଼ିଛି ମେସିନ । ବିଭିନ୍ନ ବ୍ୟାଙ୍କରୁ ମେସିନ ଅଣାଯାଇ ଗଣାଯାଉଛି ଟଙ୍କା ।