ବିଶ୍ବବାସୀଙ୍କ ମନ କିଣିଲେ ଗୋତମା ଗାଁର ଝିଅ, ନେଦରଲ୍ୟାଣ୍ଡରେ ଭାରତରୁ କରୁଛନ୍ତି ପ୍ରତିନିଧିତ୍ବ

ନୂଆପଡା: ଓଡ଼ିଶା ପାଇଁ ଗୌରବ ସାଜିଲେ ନୂଆପଡାର ଝିଅ । ନେଦରଲ୍ୟାଣ୍ଡରେ ଜଳବାୟୁ ପରିବର୍ତ୍ତନ ଓ କିଶୋରୀଙ୍କ ସମସ୍ୟା ଉପରେ ସଚେତନ ବାର୍ତ୍ତା ଦେଇ ବିଶ୍ବବାସୀଙ୍କ ମନ କିଣିଲେ ଗୋତମା ଗାଁର ଝିଅ ଦୀପାଞ୍ଜଳି । ଗୋତମା ଗାଁର ଆନନ୍ଦ ସାହୁ ଓ ମନସ୍ବିନୀ ସାହୁ ଙ୍କ ଝିଅ ଦୀପାଞ୍ଜଳି । ସେ ସେପ୍ଟେମ୍ବର ୭ରେ ନେଦରଲ୍ୟାଣ୍ଡରେ ଆୟୋଜିତ ହୋଇଥିବା ‘ସେଭ ଦି ଚିଲଡ୍ରେନ’ କାର୍ଯ୍ୟକ୍ରମରେ ଭାରତରୁ ପ୍ରତିନିଧିତ୍ଵ କରିଥିଲେ ।

ନେଦରଲ୍ୟାଣ୍ଡର ହଗ୍ ସହରରେ ବିଶ୍ଵ ସ୍ତରୀୟ ତିନି ଦିନିଆ କର୍ମଶାଳାରେ ଭାରତ ପକ୍ଷରୁ ପେନାଲିଷ୍ଟ ଭାବରେ ଯୋଗ ଦେଇଥିଲେ ଦୀପାଞ୍ଜଳି । ଦୀପଞ୍ଜଳି ଜଳବାୟୁ ପରିବର୍ତ୍ତନ ଓ କିଶୋରୀଙ୍କ ସମସ୍ୟା ଆଦି ଶୀର୍ଷକ ଆଲୋଚନା ଚକ୍ରରେ ବିଶ୍ୱକୁ ସମ୍ବୋଧିତ କରିଥିଲେ । ୨୧ ବର୍ଷର ଦୀପାଞ୍ଜଳି ଭାରତର ପ୍ରତିନିଧିତ୍ଵ କରି ବିଶ୍ବ ବାସୀଙ୍କ ମନ କିଣି ପାରିଛନ୍ତି । ଗତ ଜୁନ ୨୦ ରେ ମଧ୍ୟ ଦୀପାଞ୍ଜଳି ସ୍ବାସ୍ଥ୍ୟ ମନ୍ତ୍ରାଳୟ ଏବଂ ମାତୃତ୍ବ ଓ ନବଜାତ ଶିଶୁ ସ୍ୱାସ୍ଥ୍ୟକୁ ନେଇ ଆୟୋଜିତ ଜି-20 ସମ୍ମିଳନୀରେ ଯୋଗ ଦେଇଥିଲେ ।

ଆସନ୍ତା ନଭେମ୍ବର ମାସରେ ପୁଣି ମାଲେସିଆରେ ଗ୍ଲୋବାଲ ଫୋରମ୍ ଏଜେଣ୍ଡା କାର୍ଯ୍ୟକ୍ରମରେ ଯୋଗ ଦେବା ପାଇଁ ମନୋନୀତ ହୋଇଛନ୍ତି ଦୀପାଞ୍ଜଳି ।