ଶେଷ ପର୍ଯ୍ୟାୟରେ ମୂର୍ତ୍ତି ତିଆରି କାମ  

ନନ୍ଦିଘୋଷ ବ୍ୟୁରୋ: ଆଉ କିଛି ଦିନର ଅପେକ୍ଷା । ଧରାପୃଷ୍ଠକୁ ଅବତରଣ କରିବେ ଗଜାନନ। ଏଥିପାଇଁ ଚଳ ଚଞ୍ଚଳ ସହର। ଗଣେଶ ମୂର୍ତ୍ତିରେ ଲାଗିଛନ୍ତି କାରିଗର । ଖୋର୍ଦ୍ଧା ଏବଂ ଧର୍ମଗଡର ମୂର୍ତ୍ତି କାରିଗର ମାନେ ରାତି ଦିନ ଏକ କରି ଲାଗିଛନ୍ତି ମୂର୍ତ୍ତି ଗଢିବାରେ । କାରିଗରଙ୍କ ତୁଳୀ ସ୍ପର୍ଶରେ ଜୀବନ୍ତ ହେଉଛି ମୂର୍ତ୍ତି । ପେଚା ଉପରେ ଗଣେଶ, ମୟୁର ଉପରେ ଗଣେଶ ମୂର୍ତ୍ତି କରୁଛି ଲୋକଙ୍କୁ ଆକର୍ଷିତ ।

ଧରାପୃଷ୍ଠକୁ ଅବତରଣ କରିବେ ଗଜାନନ। ବିଦ୍ୟାଦାତାଙ୍କ ପୂଜା ପାଇଁ ପ୍ରସ୍ତୁତି ଚୂଡାନ୍ତ ପର୍ଯ୍ୟାୟରେ ପହଞ୍ଚିଛି । ମୂର୍ତ୍ତି କାରିଗର ମାନେ ଜୋରସୋରରେ ଲାଗିଛନ୍ତି ମୂର୍ତ୍ତି ତିଆରି କାର୍ଯ୍ୟରେ । ମାଟି ମୂର୍ତ୍ତିରେ ରଙ୍ଗ ଦେଇ ଏହାକୁ ଆକର୍ଷଣୀୟ କରୁଛନ୍ତି ।  କଳାହାଣ୍ଡି ଜିଲ୍ଲା ଧର୍ମଗଡରେ ପାର୍ବଣ ପୂର୍ବରୁ ଦେଖିବାକୁ ମିଳୁଛି ଗଜାନନଙ୍କ ଭଳିକି ଭଳି ମୂର୍ତ୍ତି l ଦୁଇ ଶହ ଟଙ୍କାଠୁ ଆରମ୍ଭ କରି ୫୦ ହଜାର ଟଙ୍କା ର ରହିଛି ମୂର୍ତ୍ତି l ଏଥିସହ ଗ୍ରାହକ ଯେମିତି ଡିଜାଇନର କହିବେ ସେମିତି ମୂର୍ତ୍ତି ତିଆରି କରୁଛନ୍ତି କାରିଗର ।  ପେଚା ଉପରେ ଗଣେଶ, ମୟୁର ଉପରେ ଗଣେଶ, ପାହାଡରେ ଗଣେଷ ଏବଂ ଗଛ ତଳେ ଗଣେଷ ଥିବା ଡିଜାଇନ୍ ହୋଇଛି । ମୂର୍ତ୍ତି କାମ ନସରୁଣୁ ମୂର୍ତ୍ତି ବରାଦ କରିଦେଇଯାଉଛନ୍ତି ଲୋକେ ।

ସେହିପରି  ଜଟଣୀରେ ଜୋରସୋରରେ ଚାଲିଛି ଗଣେଶ ପୂଜା ପ୍ରସ୍ତୁତି। ପ୍ରାୟ ୨୦୦ବର୍ଷରୁ ଉର୍ଦ୍ଧ୍ୱ ବର୍ଷ ହେବ ଏଠାରେ ଗଣେଶ ପୂଜା ହୋଇଆସୁଛି । ପ୍ରାୟ ୧୧ଦିନ ଧରି ଗଣେଶ ପୂଜା ଜଟଣୀ ସହରକୁ କରିଥାଏ ଚଳଚଞ୍ଚଳ। ଏଥିପାଇଁ ପ୍ରସ୍ତୁତି ବି ଜୋରଦାର ଚାଲିଛି। ଜଟଣୀର କୁଦୀଆରି ଠାରେ ଚାଲିଛି ବିଘ୍ନ ବିନାଶକ ଙ୍କ ମୃଣ୍ମୟ ମୂର୍ତ୍ତି ତିଆରି। ମୂର୍ତ୍ତିର ଉଚ୍ଚତା ୪ଫୁଟ ରୁ ୨୦ଫୁଟ ପର୍ଯ୍ୟନ୍ତ ରହିଛି। ଶିଳ୍ପୀର ଶେଷ ସ୍ପର୍ଶରେ ମୂର୍ତ୍ତୀ ଗୁଡ଼ିକ ଜୀବନ୍ତ ସଦୃଶ ଦେଖାଯାଉଛି।