କାହା ହାତରେ ରହିବ ମହାରାଷ୍ଟ୍ର କ୍ଷମତାର ମହୁଭାଣ୍ଡ, ହେବ କି ହାଇଡ୍ରାମା?
1 min read
ନିର୍ବାଚନ ସରିଗଲା, ଫଳ ବାହାରିଗଲା । କିନ୍ତୁ ମୁଖିଆ କିଏ, ଏ ପର୍ଯ୍ୟନ୍ତ ଥୟ ହୋଇପାରୁନି । ମୁଖ୍ୟମନ୍ତ୍ରୀ ପଦ ନେଇ ଏକପ୍ରକାର ଭିତିରିଆ ଯୁଦ୍ଧ ଆରମ୍ଭ ହୋଇଛି ବିଜେପି ଓ ଶିବସେନା ମଧ୍ୟରେ । ଫଳାଫଳ ଯାହା ହୋଇଛି, ଶିବସେନା କେବେ ବି ବିଜେପିକୁ ସହଜରେ ରାସ୍ତା ଛାଡ଼ିବନି ବୋଲି ରାଜନୀତି ପଣ୍ଡିତ ଅନୁମାନ କରୁଛନ୍ତି ।
ଏହା ସତ୍ୟ ଯେ ମହାରାଷ୍ଟ୍ରର ମହାମୁକାବିଲାରେ ବାଜି ମାରିଛି ବିଜେପି-ଶିବସେନା ମେଣ୍ଟ । ଟାର୍ଗେଟ୍ ମୁତାବକ ସିଟ୍ ହାତେଇ ପାରିନଥିଲେ ମଧ୍ୟ ଉଭୟ ଦଳ ମିଶି ମ୍ୟାଜିକ ନମ୍ବର ପାରିକରିଛନ୍ତି ।
ଦେବେନ୍ଦ୍ର ଫଡନବିସ୍ ପୁଣିଥରେ ମୁଖ୍ୟମନ୍ତ୍ରୀ ହେବେ ବୋଲି ଦୃଢ଼ୋକ୍ତି ପ୍ରକାଶ କରିଥିବାବେଳେ ଠାକ୍ରେ ପରିବାରର ଦାୟାଦ ଆଦିତ୍ୟ ଠାକ୍ରେଙ୍କୁ ମୁଖ୍ୟମନ୍ତ୍ରୀ କରିବାକୁ ରଣନୀତି ପ୍ରସ୍ତୁତ କରୁଛି ଶିବସେନା । ନିର୍ବାଚନ ଫଳାଫଳ ଆସୁଆାସୁ ୫୦-୫୦ଫର୍ମୁଲାରୁ ଓହରିବେନି ବୋଲି କହିଛନ୍ତି ଶବସେନା ପ୍ରମୁଖ ଉଦ୍ଧବ ଠାକ୍ରେ ।
ସେପଟେ ଫଡନବିସ୍ କହିଛନ୍ତି ୧୫ ଜଣ ସ୍ୱାଧୀନ ବିଧାୟକ ତାଙ୍କ ସହ ଯୋଗାଯୋଗରେ ଅଛନ୍ତି । ସେମାନେ ଆମ ସହ ସାମିଲ ହେବାକୁ ପ୍ରସ୍ତୁତ ବୋଲି କହିଛନ୍ତି ଫଡନବିସ୍ । ଫଡନବିସ୍ଙ୍କ ଏଭଳି ପ୍ରତିକ୍ରିୟା ପରେ ମହାରାଷ୍ଟ୍ରର ମୁଖମନ୍ତ୍ରୀ ପଦବିକୁ ନେଇ ହାଇ ଡ୍ରାମା ଦେଖିବାକୁ ମିଳିପାରେ ବୋଲି ରାଜନୀତି ପଣ୍ଡିତ ଅନୁମାନ କରୁଛନ୍ତି ।
ଅପରପକ୍ଷରେ ୨୦୧୯ ମହାରାଷ୍ଟ୍ରର ସାଧାରଣ ନିର୍ବାଚନରେ ବିରୋଧୀଙ୍କ ପ୍ରଦର୍ଶନକୁ ଦେଖିବାକୁ ଗଲେ ବିଧାନସଭା ନିର୍ବାଚନରେ ସ୍ଥିତି ଭଲ ରହିଛି । ହାରିକି କି ବି ହତାଶ ହୋଇନାହାଁନ୍ତି କଂଗ୍ରେସ-ଏନ୍ସିପି ମେଣ୍ଟ । ୨୦୧୪ ବିଧାନସଭା ନିର୍ବାଚନ ଅପେକ୍ଷା ଏନ୍ସିପିକୁ ୧୫ ଓ କଂଗ୍ରେସକୁ ୨ଟି ସିଟ୍ ଅଧିକା ମିଳିଛି । ଚଳିତ ବିଧାନସଭା ନିର୍ବାଚନରେ ବିଜେପିକୁ ୧୦୫, ଶିବସେନାକୁ ୫୬, ଏନ୍ସିପିକୁ ୫୪ ଓ କଂଗ୍ରେସକୁ ୪୪ ସିଟ୍ ମିଳିଛି । ଏଭଳି ସ୍ଥିତିରେ ବିଜେପି-ଶିବସେନା ମେଣ୍ଟ ସରକାର ଗଢିବା ନିଶ୍ଚିତ ହୋଇଥିବାବେଳେ କାହା ମୁଣ୍ଡରେ ହାତୀ ସୁନା କଳସ ଢାଳୁଛି ଦେଖିବାକୁ ବାକି ରହିଲା ।
')}
