ନୂଆଦିଲ୍ଲୀ: ଉତ୍ତରାଖଣ୍ଡର ତୀର୍ଥ ସହର ଜୋଶୀମଠର ଆଖପାଖରେ ଘରେ ଘରେ ଫାଟ ସୃଷ୍ଟିକୁ ନେଇ ରାଜ୍ୟ ସରକାରଙ୍କ ସହିତ କେନ୍ଦ୍ର ସରକାର ମଧ୍ୟ ଏହାକୁ ଗୁରୁତ୍ବର ସହ ନେଇଛନ୍ତି । ଏନେଇ ସୀମା ପରିଚାଳନା ସଚିବ ଏବଂ ଜାତୀୟ ବିପର୍ଯ୍ୟୟ ପରିଚାଳନା ପ୍ରାଧିକରଣର ସଦସ୍ୟମାନେ ସୋମବାର ଉତ୍ତାଖଣ୍ଡ ଗସ୍ତ କରିବା ସହ ଜୋଷୀମଠର ସ୍ଥିତି ଅନୁଧ୍ୟାନ କରିବେ। ଜୋଶୀମଠକୁ ନେଇ ହୋଇଥିବା ସମୀକ୍ଷା ବୈଠକରେ ଏହା ନିଷ୍ପତ୍ତି ନିଆଯାଇଛି ।
ଏହି ନିଷ୍ପତ୍ତି ଅନୁଯାୟୀ, ଜାତୀୟ ବିପର୍ଯ୍ୟୟ ପରିଚାଳନା ପ୍ରାଧିକରଣ, ଜାତୀୟ ବିପର୍ଯ୍ୟୟ ପରିଚାଳନା ପ୍ରତିଷ୍ଠାନ, ଭାରତୀୟ ଭୂ-ବୈଜ୍ଞାନ ସର୍ଭେ, ଆଇଆଇଟି ରୁଡକୀ ସମତେ ବିଭିନ୍ନ ସଂସ୍ଥାର ବିଶେଷଜ୍ଞମାନେ ଜୋଶୀମଠ ଠାରେ ଉପସ୍ଥିତ ରହି ଅଞ୍ଚଳର ସ୍ଥିତି ଅନୁଧ୍ଯାନ କରିବା ସହ ରିପୋର୍ଟ ଦେବେ। ଏହି ପ୍ରସଙ୍ଗରେ ପ୍ରଧାନମନ୍ତ୍ରୀଙ୍କ ପ୍ରମୁଖ ସଚିବ ଡକ୍ଟର ପିକେ ମିଶ୍ରଙ୍କ ଅଧ୍ୟକ୍ଷତାରେ ହୋଇଥିବା ଏହି ଉଚ୍ଚ ସ୍ତରୀୟ ସମୀକ୍ଷା ବୈଠକରେ ଉତ୍ତରାଖଣ୍ଡର ବରିଷ୍ଠ ଅଧିକାରୀ ଭିଡିଓ କନଫରେନ୍ସିଂ ମାଧ୍ୟରେ ରହି ଜୋଶୀମଠ ସ୍ଥିତିକୁ ନେଇ ସୂଚନା ଦେଇଥିଲେ । ଏହି ଘଟଣା ଉପରେ ସର୍ତକ ଦୃଷ୍ଟି ରଖିଛି ପିଏମଓ । ଏହାସହ ସ୍ଥିତି ଉପରେ ସାଟଲାଇଟ ମାଧ୍ୟମରେ ନଜର ରଖିବା ପାଇଁ ସେନସିଂ ସେଣ୍ଟର, ଇଣ୍ଡିଆନ୍ ଇନଷ୍ଟିଚ୍ୟୁଟ୍ ଅଫ ରିମୋଟ ସେନସିଂକୁ କୁହାଯାଇଛି । ଏହି ଅଧ୍ୟୟନ ପରେ ଫଟୋଗ୍ରାଫ ଓ ରିପୋର୍ଟ ଦାଖଲ କରିବାକୁ ଏହି ଦୁଇ ସଂସ୍ଥାକୁ କୁହାଯାଇଛି ।
