ଅଳିଆ ଗଦାରେ ନିଆଁ, ବାପୁଜୀନଗର-କଳ୍ପନା ଫ୍ଲାଇଓଭର ତଳେ ଅଟକିଛି ଟ୍ରେନ୍

ଭୁବନେଶ୍ୱର: ଅଳିଆ ଗଦାରେ ନିଆଁ, ଅଟକିଲା ଯାତ୍ରୀବାହୀ ଟ୍ରେନ । ଟ୍ରେନ ଲାଇନ କଡ଼ରେ ଥିବା ଅଳିଆ ଗଦାରେ ଲାଗିଥିଲା ନିଆଁ । ପୁରୀ-ଜଳେଶ୍ୱର ମେମୁ ଟ୍ରେନ ଅଟକି ରହିଛି । ବାପୁଜୀନଗର-କଳ୍ପନା ଫ୍ଲାଇଓଭର ତଳେ ଅଟକି ରହିଛି ଟ୍ରେନ । ବଡ଼ଧରଣର ଦୁର୍ଘଟଣାରୁ ଅଳ୍ପକେ ବର୍ତ୍ତିଲା ଟ୍ରେନ । କେବୁଲ ଛିଡି ନିଆଁ ଲାଗିଥିବା କହୁଛନ୍ତି ଟ୍ରେନଯାତ୍ରୀ । ଅଗ୍ନିଶମ ବାହିନୀ ଘଟଣା ସ୍ଥଳରେ ପହଞ୍ଚି ନିଆଁକୁ ଆୟତ୍ତ କରିଛି । ମେମୁ ଟ୍ରେନଟି ଷ୍ଟେସନ ଯିବା ପୂର୍ବରୁ ନିଆଁ ଯୋଗୁଁ ଅଟକି ରହିଛି । ରେଲୱେ ବିଭାଗ ପକ୍ଷରୁ ସ୍ଥିତି ସ୍ୱାଭାବିକ କରିବା ପାଇଁ ଉଦ୍ୟମ ଜାରି ରହିଛି ।

ପ୍ରତ୍ୟକ୍ଷଦର୍ଶୀଙ୍କ କହିବା ଅନୁସାରେ ପୁରୀରୁ ଜଳେଶ୍ବର ଯାଉଥିବାବେଳେ ଭୁବନେଶ୍ବର ଷ୍ଟେସନ ନିକଟରେ ପୁରୀ-ଜଳେଶ୍ବର ମେମୋ ଟ୍ରେନ ଉପରେ ଛିଡ଼ି ପଡ଼ିଥିଲା କେବୁଲ । ସେଥିରୁ ନିଆଁ ଛିଟକି ଯାଇ ବିଭିନ୍ନ ସ୍ଥାନରେ ପଡ଼ିଥିଲା । ଫଳରେ ବିଭିନ୍ନ ଯାଗାରେ ପଡ଼ିଥିବା ଅଳିଆରେ ହୁତୁହୁତୁ ହୋଇ ଜଳିଥିଲା । ଅଶୋକ ନଗର ଫାଳିକିଆ ବସ୍ତିର କିଛି ଘର ଓ ଅଳିଆ ଗଦାରେ ନିଆଁ ଲାଗିଯାଇଥିଲା । ଘଟଣାସ୍ଥଳରେ ଅଗ୍ନିଶମ ବାହିନୀ ପହଞ୍ଚି ତୁରନ୍ତ ନିଆଁକୁ ଆୟତ୍ତ କରିଥିଲା । ନିଆଁ ଲାଗିବା ଫଳରେ ଟ୍ରେନଟି ପ୍ୟାୟ ଦେଢ଼ ଘଣ୍ଟା ଅଟକି ରହିଥିଲା ।