ସାବଧାନ! ପ୍ରଦୂଷଣ ରାକ୍ଷସ କବଳରେ ଆପଣଙ୍କ ଶିଶୁ

ସାରା ବିଶ୍ୱରେ ବାୟୁ ପ୍ରଦୂଷଣ ବର୍ତ୍ତମାନ ଚିନ୍ତାଜନକ ସ୍ଥିତିରେ ପହଞ୍ଚିଛି । ଏହା କେବଳ ପରିବେଶକୁ ପ୍ରଭାବିତ କରୁଛି ତା ନୁହେଁ ମନୁଷ୍ୟ ସ୍ୱାସ୍ଥ୍ୟ ଉପରେ ମଧ୍ୟ କୁପ୍ରଭାବ ପକାଉଛି । ବାୟୁ ପ୍ରଦୂଷଣ ଏତେ ମାତ୍ରାରେ ବଢ଼ିଯାଇଛି ଯେ ଏହା ଆପଣଙ୍କ ଶିଶୁର ସ୍ୱାସ୍ଥ୍ୟ ପ୍ରତି ଘାତକ ସାବ୍ୟସ୍ତ ହୋଇପାରେ ।
ଗବେଷଣାରୁ ମିଳିଥିବା ତଥ୍ୟ ଅନୁଯାୟୀ ବାୟୁ ପ୍ରଦୂଷଣର ପ୍ରଭାବ ଶିଶୁମାନଙ୍କ ମାନସିକ ସ୍ୱାସ୍ଥ୍ୟ ଉପରେ ପଡୁଥିବା ଜଣା ପଡ଼ିଛି । ଏନଭାର୍ଣ୍ଣମେଣ୍ଟାଲ ହେଲଥ ପର୍ସପେକ୍ଟିଭ ଜର୍ଣ୍ଣାଲ ( Environmental health perspective) ରେ ପ୍ରକାଶିତ ତଥ୍ୟ ଅନୁଯାୟୀ ବାୟୁ ପ୍ରଦୂଷଣ ପ୍ରଭାବରେ ଶିଶୁମାନଙ୍କ ମଧ୍ୟରେ ମାନସିକ ଅସନ୍ତୁଳନ ଦେଖିବାକୁ ମିଳୁଛି ।

୧୨ ବୟସରୁ କମ ବୟସର ପିଲାମାନଙ୍କ ମଧ୍ୟରେ ବାୟୁ ପ୍ରଦୂଷଣର ଏକ ବଡ଼ ପ୍ରଭାବ ପଡୁଥିବାବେଳେ ଏହା ଦ୍ୱାରା ପିଲାମାନେ ଚିଡ଼ିଚିଡ଼ା ହେବା ସହ ଡିପ୍ରେସନର ମଧ୍ୟ ଶିକାର ହେଉଛନ୍ତି ।କେବଳ ସେତିକି ନୁହେଁ ବାୟୁ ପ୍ରଦୂଷଣ  ଦ୍ୱାରା ଶ୍ୱାସନଳୀ ସଂକମ୍ରଣ, ଶ୍ୱାସ ଓ ହୃଦରୋଗର ମଧ୍ୟ ଆଶଙ୍କା ରହୁଛି ।

ଆଉ ଏକ ବଡ଼ ଆଉ ସାଂଘାତିକ କଥା ହେଉଛି ବାୟୁ ପ୍ରଦୂଷଣ ଯୋଗୁଁ ମଧୁମେହ ରୋଗୀଙ୍କ ସଂଖ୍ୟା ବଢ଼ୁଛି ।  ପ୍ରଦୂଷଣ ଯୋଗୁଁ ଅନ୍ତଃସ୍ରାବୀ ଗ୍ରନ୍ଥୀଗୁଡ଼ିକରୁ ଠିକ୍ ଭାବେ ହରମୋନ୍ କ୍ଷରଣ ହୋଇପାରେ ନାହିଁ । ବିଶେଷ କରି ପାନକ୍ରିୟାସ ବା ଅଗ୍ନ୍ୟାଶୟ ଗ୍ରନ୍ଥିରୁ ଆବଶ୍ୟକ ପରିମାଣର ଇନସୁଲିନ୍ କ୍ଷରଣ ହୋଇପାରେ ନାହିଁ । ତେଣୁ ସହରାଞ୍ଚଳର ପ୍ରଦୂଷିତ ପରିବେଶ ପିଲାମାନଙ୍କୁ ଟାଇପ୍ ୨ ଡାଇବେଟିସ ମୁହକୁ ଠେଲିଦେବା ଆଶଙ୍କା ରହିଛି । ତେଣୁ ଛୋଟ ଛୋଟ ପିଲାଙ୍କୁ ସହର ଭିତରେ ମାସ୍କ ବ୍ୟବହାର କରିବାକୁ ଡାକ୍ତରମାନେ ପରାମର୍ଶ ଦେଉଛନ୍ତି ।

ଦିନକୁ ଦିନ ପରିବେଶ ପ୍ରଦୂଷଣର ମାତ୍ରା ବଢ଼ି ଚାଲିଥିବାବେଳେ ଏଥିପ୍ରତି ସଚେତନ ହେବା ଜରୁରୀ ହୋଇପଡିଛି ।

– ସୁଶ୍ରୀ ସଙ୍ଗୀତା ଦାଶ ')}