ବେନାମୀ ଚିଠି ଖୋଲିଦେଲା ମର୍ଡର ମିଷ୍ଟ୍ରି, ୧୧ ମାସ ପରେ ମୃତଦେହ ଉଦ୍ଧାର

ନୂଆପଡା: ହତ୍ୟାକାରୀକୁ ଧରାଇ ଦେଲା ବେନାମୀ ଚିଠି । ନୂଆପଡା ସଦର ଥାନାରେ ବେନାମୀ ଚିଠି ଆଧାରରେ ପୋଲିସ୍ ହତ୍ୟାକାରୀଙ୍କୁ ଧରିବାରେ ସଫଳ ହୋଇଛି। ଜଣେ ଯୁକ୍ତ ଦୁଇ ପ୍ରଥମ ବର୍ଷର ଛାତ୍ରୀଙ୍କୁ ଦୁଷ୍କର୍ମ ପରେ ହତ୍ୟା କରିଥିଲେ ଅଭିଯୁକ୍ତ । ପ୍ରମାଣ ନଷ୍ଟ ପାଇଁ ନାବାଳିକାଙ୍କୁ ମାଟିତଳେ ପୋତି ଦେଇଥିଲେ। ନୂଆପଡ଼ା ରତିପାଲି ଗାଁରୁ ଏଭଳି ସାଂଘାତିକ ଅଭିଯୋଗ ଆସିଛି।

ଘଟଣାସ୍ଥଳରେ ପୋଲିସ ପହଞ୍ଚି ଚାଷ ଜମିରୁ ମାଟି ଖୋଳି ନାବାଳିକାଙ୍କ ମୃତ ଶରୀରର ଅବଶେଷ ଉଦ୍ଧାର କରିଛି। ନାବାଳିକା ଜଣକ ରତିପାଲି ଗାଁର । ସେ ଘରୋଇ କଲେଜରେ ଯୁକ୍ତ ଦୁଇ ପ୍ରଥମ ବର୍ଷରେ ପଢୁଥିଲେ। ଜାନୁଆରୀ ୧ ତାରିଖରେ ସେ ରାତିରେ ଘରେ ଖାଇପିଇ ଶୋଇଥିଲେ। ତେବେ ସକାଳୁ ତାଙ୍କର ପତ୍ତା ମିଳିନଥିଲା । ବହୁତ ଖୋଜାଖୋଜି ପରେ ବି ଝିଅକୁ ପାଇନଥିଲେ ପରିବାର ଲୋକେ। ଏନେଇ ପରିବାର ଲୋକେ ଜାନୁଆରୀ ୯ତାରିଖରେ ନୂଆପଡ଼ା ଥାନାରେ ଅଭିଯୋଗ କରିଥିଲେ।

ଏହାପରେ ପୋଲିସ ଏକ ନିଖୋଜ ମାମଲା ରୁଜୁ କରି ତଦନ୍ତ ଆରମ୍ଭ କରିଥିଲା। ନାବାଳିକାଙ୍କୁ କେହି ହତ୍ୟା କରି ମାଟିତଳେ ପୋତି ଦେଇଥିବା ନେଇ ଗତ ୨ ତାରିଖରେ ଏକ ବେନାମୀ ଚିଠି ଆସିଥିଲା। ପରିବାର ଲୋକେ ଚିଠି ଆଧାରରେ ପୁଣି ଏକ ଲିଖିତ ଅଭିଯୋଗ କରିଥିଲେ। ମାମଲାରେ ପୋଲିସ ୫ଜଣ ଯୁବକଙ୍କୁ ଅଟକ ରଖି ତଦନ୍ତ କରୁଛି। ଗତକାଲି ସଦର ପୋଲିସ ମାଜିଷ୍ଟ୍ରେଟଙ୍କ ଉପସ୍ଥିତରେ ସାଇଣ୍ଟିଫିକ୍ ଟିମ୍ ଓ ଅନୁସନ୍ଧାନୀ କୁକୁର ସାହାଯ୍ୟରେ ଘଟଣାସ୍ଥଳରେ ଛାନଭିନ୍ ଆରମ୍ଭ କରିଥିଲା। ନାବାଳିକାଙ୍କୁ ପୋତାଯାଇଥିବା ଧାନ ବିଲରୁ ଧାନ କାଟି ପୋଲିସ ଜେସିବି ସାହାଯ୍ୟରେ ମାଟି ଖୋଳିବା ପରେ ଦେହାବଶେଷ ଉଦ୍ଧାର କରାଯାଇଛି ।