କୁବେର ଇଞ୍ଜିନିୟରଙ୍କ ଘରୁ ମିଳିଲା ପାଞ୍ଚକୋଟି, ଏବେବି ଚାଲିଛି ଗଣତି
ପାଟନା: କୁବେର ଇଞ୍ଜିନିୟରଙ୍କ ଘରୁ ମିଳିଲା ୫ କୋଟି ନଗଦ ଟଙ୍କା । ବିହାରର ସରକାରୀ ଇଞ୍ଜିନିୟରଙ୍କ ଘରେ ଭିଜିଲାନ୍ସ ରେଡ୍ । ଚଢ଼ାଉ ବେଳେ ପୁଳା ପୁଳା ଟଙ୍କା ଜବତ କରିଛି ଭିଜିଲାନ୍ସ ଟିମ । ପାଟନା କିଷନଗଞ୍ଜର ଗ୍ରାମ୍ୟ ଉନ୍ନୟନ ବିଭାଗରେ କାର୍ଯ୍ୟରତ ଇଞ୍ଜିନିୟର ସଞ୍ଜୟ ରାୟଙ୍କ ଘରେ ରେଡ୍ ବେଳେ ୫ କୋଟିର ନଗଦ ଟଙ୍କା ଜବତ ହୋଇଛି ।
ପାଟନାର ରୂପେଶପୁର ସମେତ କିଷନଗଞ୍ଜର କିଛି ସ୍ଥାନରେ ମଧ୍ୟ ରେଡ୍ ହୋଇଛି । ନଗଦ ଟଙ୍କା ସହ ବହୁ ଗୁରୁତ୍ବପୂର୍ଣ୍ଣ କାଗଜପତ୍ର ଓ ସୁନା ଗହଣା ମଧ୍ୟ ଜବତ କରାଯାଇଛି । ଆୟ ବହିଃର୍ଭୂତ ସମ୍ପତି ଠୁଳ ମାମଲାରେ ଇଞ୍ଜିନିୟର ସଞ୍ଜୟ ରାୟଙ୍କ ଘରେ ରେଡ୍ କରିଛି ଭିଜିଲାନ୍ସ । ଏବେ ବି ମେସିନ ଯୋଗେ ଟଙ୍କା ଗଣତି ଜାରି ରହିଛି ।
ଏହା ପୂର୍ବରୁ ବିହାରରେ ଇଡି ଓ ସିବିଆଇ ସ୍କାନରରେ ଥିଲେ ବିରୋଧୀ କ୍ୟାମ୍ପ । ତଦନ୍ତକାରୀ ସଂସ୍ଥା ବିହାରରୁ ଝାଡଖଣ୍ଡ ପର୍ଯ୍ୟନ୍ତ ଅନେକ ସ୍ଥାନରେ ଚଢାଉ କରିଥିଲା । ନିଯୁକ୍ତି ବଦଳରେ ଜମି ଦୁର୍ନୀତିରେ ସାମିଲ ଅଭିଯୋଗରେ ଆରଜେଡିର ୪ ଜଣ ନେତାଙ୍କ ଘରେ ଚଢାଉ କରାଯାଇଥିଲା । ବିହାରରେ ଫ୍ଲୋରଟେଷ୍ଟ ପୂର୍ବରୁ ସିବିଆଇ ଟିମ ଆରଜେଡି କୋଷାଧ୍ୟକ୍ଷ, ପୂର୍ବତନ ଏମଏଲସି, ଦୁଇ ରାଜ୍ୟସଭା ସାଂସଦଙ୍କ ବାସଭବନରେ ଚଢାଉ କରିଥିଲା ।
