ମହଙ୍ଗା ହେବ ବିମାନ ଯାତ୍ରା, ଅଗଷ୍ଟ ୩୧ରୁ ବଢ଼ିବ ଭଡ଼ା

ନୂଆଦିଲ୍ଲୀ: ମହଙ୍ଗା ହେବ ବିମାନ ଯାତ୍ରା। ବଢ଼ିବ ବିମାନ ଭଡ଼ା। ବିମାନ କମ୍ପାନୀ ଗୁଡ଼ିକୁ ସ୍ୱାଧୀନ ଭାବେ ଭଡ଼ା ଧାର୍ଯ୍ୟ ପାଇଁ କେନ୍ଦ୍ର ସରକାର ଅନୁମତି ଦେଇଛନ୍ତି। ଆସନ୍ତା ଅଗଷ୍ଟ ୩୧ରୁ ବିମାନ କମ୍ପାନୀ ଗୁଡ଼ିକ ମୁକ୍ତ ଭାବେ ଭଡ଼ା ଧାର୍ଯ୍ୟ କରିପାରିବେ। ପୂର୍ବରୁ ଦେଶ ଭିତରେ ଚଳାଚଳ କରୁଥିବା ବିମାନଗୁଡ଼ିକର ଟିକଟର ସର୍ବନିମ୍ନ ଓ ସର୍ବାଧିକ ମୂଲ୍ୟ ଧାର୍ଯ୍ୟ କରାଯାଇଥିଲା। ଏବେ ଏହି କଟଣାକୁ ହଟାଇ ଦେଇଛନ୍ତି କେନ୍ଦ୍ର ସରକାର। ଏନେଇ ବେସାମରିକ ବିମାନଚଳାଚଳ ମନ୍ତ୍ରାଳୟ ପକ୍ଷରୁ କୁହାଯାଇଛି।

ଏୟାର ଟର୍ବାଇନ୍‌ ଫ୍ୟୁଏଲ ପ୍ରାଇସ ବୃଦ୍ଧି ଯୋଗୁ ବିମାନ କମ୍ପାନୀ ଗୁଡ଼ିକ ବହୁ ପରିମାଣରେ କ୍ଷତି ସହୁଛନ୍ତି। ସେମାନଙ୍କ ଦାବିକୁ ଅନୁଧ୍ୟାନ କରିବା ପରେ ଟିକଟ ମୂଲ୍ୟ କଟକଣା ହଟାଇ ଦେବାକୁ ନିଷ୍ପତ୍ତି ହୋଇଛି। ଅନ୍ୟପକ୍ଷରେ ଆଭିଏସନ ଟର୍ବାଇନ ଫ୍ୟୁଏଲର ମୂଲ୍ୟ ବୃଦ୍ଧି ଓ ଟଙ୍କାର ମୂଲ୍ୟ ହ୍ରାସ ଯୋଗୁ ଏହାର ପ୍ରଭାବ ବିମାନ କମ୍ପାନୀ ଗୁଡ଼ିକ ଉପରେ ପଡ଼ିଛି। ଏଥପାଇଁ ବିମାନ ଭଡ଼ା ମହଙ୍ଗା ହେବ ବୋଲି ଅନୁମାନ କରାଯାଉଛି । ଜୁନ ୨୦୨୧ ପରଠୁ ଇନ୍ଧନ ମୂଲ୍ୟରେ ଯଥେଷ୍ଟ ଅଧିକ ବୃଦ୍ଧି ହେଲାଣି।