ନିର୍ଦ୍ଧିଷ୍ଟ ସୀମାଠାରୁ ଅଧିକ ଟଙ୍କା ଜମା କିମ୍ବା ଟଙ୍କା ଉଠାଇବା ନେଇ ମେ ୨୬ରୁ ଲାଗୁ ହେବ ନୂଆ ନିୟମ

ନୂଆଦିଲ୍ଲୀ: ବ୍ୟାଙ୍କ ଆକାଉଣ୍ଟରେ ଏକ ନିର୍ଦ୍ଧିଷ୍ଟ ସୀମାଠାରୁ ଅଧିକ ଟଙ୍କା ଜମା କିମ୍ବା ଟଙ୍କା ଉଠାଇବା ପାଇଁ କେନ୍ଦ୍ର ସରକାର ଏକ ନୂଆ ନିୟମ ଲାଗୁ କରିଛନ୍ତି, ଯାହା ମେ ୨୬ରୁ କାର୍ଯ୍ୟକାରୀ ହେବ । ଏହା ବ୍ୟତୀତ ବ୍ୟାଙ୍କ କିମ୍ବା ଡାକଘରେ ଆକାଉଣ୍ଟ ଖୋଲିବା ପାଇଁ ଏହି ନିୟମ ମଧ୍ୟ ଲାଗୁ କରାଯାଇଛି । ଉଭୟ କାର୍ଯ୍ୟ ପାଇଁ ସରକାର ଆଧାର କିମ୍ବା ପାନ୍ (ସ୍ଥାୟୀ ଆକାଉଣ୍ଟ୍ ନମ୍ବର) କୁ ବାଧ୍ୟତାମୂଳକ କରିଛନ୍ତି ।

ବର୍ତ୍ତମାନ ୨୦ ଲକ୍ଷରୁ ଅଧିକ ଟଙ୍କା ଜମା କିମ୍ବା ପ୍ରତ୍ୟାହାର ପାଇଁ ଏହି ନିୟମ ଲାଗୁ ହେବ । ୧୦ ମେ’ ରେ ବିଜ୍ଞପ୍ତି ଜାରି କରି CBDT ଏହି ସୂଚନା ଦେଇଛି । ଏହା ବ୍ୟତୀତ ଯେକୌଣସି ବ୍ୟାଙ୍କ କିମ୍ବା ଡାକଘରେ ଆକାଉଣ୍ଟ କିମ୍ବା କ୍ୟାସ କ୍ରେଡିଟ ଆକାଉଣ୍ଟ ଖୋଲିବା ମଧ୍ୟ ଆବଶ୍ୟକ ହେବ । ଏମିତି କରିବା ଦ୍ୱାରା ଆର୍ଥିକ କାରବାରରେ ସ୍ୱଚ୍ଛତା ବୃଦ୍ଧି ପାଇବ ।

ନୂଆ ନିୟମ କ’ଣ?

ନିୟମ ଅନୁଯାୟୀ, ଯଦି ଜଣେ ବ୍ୟକ୍ତି ପ୍ୟାନର ଡିଟେଲ ଦେବା ଆବଶ୍ୟକ କରନ୍ତି କିନ୍ତୁ ତାଙ୍କ ପାଖରେ ପ୍ୟାନ୍ କାର୍ଡ ନଥାଏ ତେବେ ସେ ଆଧାରର ବାୟୋମେଟ୍ରିକ୍ ପରିଚୟ ଦେଇ କାର୍ଯ୍ୟ କରିପାରିବେ  । ଏନେଇ ଜଣେ ଅଧିକାରୀ କହିଛନ୍ତି ଯେ, କାରବାର ସମୟରେ ପ୍ୟାନ ନମ୍ବର ଦିଆଯିବା ପରେ ଟିକସ ଅଧିକାରୀଙ୍କ ପାଇଁ କାରବାର ଉପରେ ନଜର ରଖିବା ସହଜ ହୋଇଯିବ ।