ଇମ୍ରାନଙ୍କୁ ୭୨ ଘଣ୍ଟାର ଆଶ୍ୱସ୍ତି, ପାକିସ୍ତାନ ସଂସଦରେ ପ୍ରବଳ ହଙ୍ଗାମା
ଇସଲାମାବାଦ: ପ୍ରତି ମୁହୂର୍ତ୍ତରେ ବଦଳୁଛି ପାକିସ୍ତାନର ରାଜନୈତିକ ପାଣିପାଗ । ପାକିସ୍ତାନ ପ୍ରଧାନମନ୍ତ୍ରୀ ଇମ୍ରାନ୍ ଖାନଙ୍କ ବିରୋଧରେ ଆସିଥିବା ଅନାସ୍ଥା ଉପରେ ସଂସଦରେ ଆଲୋଚନା ହେବାର ଥିଲା । ହେଲେ ଆଲୋଚନା ପୂର୍ବରୁ ସଂସଦକୁ ଏପ୍ରିଲ୍ ୩ ତାରିଖ ଯାଏ ସ୍ଥଗିତ ରଖିଛନ୍ତି ଉପାଧ୍ୟକ୍ଷ । ଅନାସ୍ଥା ଉପରେ ଏପ୍ରିଲ୍ ୩ରେ ଭୋଟିଂ ହେବ । ଫଳରେ ପାକ୍ ପ୍ରଧାନମନ୍ତ୍ରୀ ଇମ୍ରାନ୍ ଖାନଙ୍କୁ ୭୨ ଘଣ୍ଟାର ସମୟ ମିଳିଛି । ସଂସଦ ମୁଲତବି ହେବା ପରେ ବିପକ୍ଷ ସାଂସଦ ବିରୋଧ ପ୍ରଦର୍ଶନ କରିବା ଇମ୍ରାନ୍ ଖାନଙ୍କ ବିରୋଧରେ ନାରାବାଜି କରିଥିଲେ ।
ପିଏମ୍ଏଲ୍(ଏନ୍) ନେତା ଶାହବାଜ ସରିଫ ଇମ୍ରାନଙ୍କ ଉପରେ ଖୁବ୍ ବର୍ଷିଛନ୍ତି । ପ୍ରଧାନମନ୍ତ୍ରୀ ପଦରେ ରହିବା ଲାଗି ଇମ୍ରାନ୍ ଖାନଙ୍କ ପାଖରେ କୌଣସି ଅଧିକାର ନଥିବା କହିଛନ୍ତି ଶାହବାଜ । ସେ ଆହୁରି କହିଛନ୍ତି, ଆମ ପାଖରେ ବହୁମତ ରହିଛି । ଆମକୁ ସୁଯୋଗ ମିଳିବା ଦରକାର । ଇମ୍ରାନ୍ ଅତି ନୀଚସ୍ତରକୁ ଯାଇ ରାଜନୀତି କରୁଛନ୍ତି । ସେ ଭାରତର ନାଁ ନେଇ ମିଥ୍ୟା ପ୍ରଚାର କରୁଛନ୍ତି । ଏପରିକି ବାଚସ୍ପତି ସମ୍ବିଧାନ ଉଲ୍ଲଂଘନ କରିଥିବା ଅଭିଯୋଗ କରିଛନ୍ତି ବିରୋଧୀ ।
ଏହା ପୂର୍ବରୁ ଇମ୍ରାନ ବିରୋଧୀଙ୍କୁ ଅଫର୍ ଦେଇ କହିଥିଲେ, ଅନାସ୍ଥା ପ୍ରସ୍ତାବ ଫେରାଇ ନେଇ ସଂସଦ ଭଙ୍ଗ କରି ଦିଆଯାଉ । କିନ୍ତୁ ଇମ୍ରାନଙ୍କ ଅଫରକୁ ବିରୋଧୀ ଅଗ୍ରାହ୍ୟ କରି ଦେଇଥିଲେ । ରିପୋର୍ଟ ଅନୁସାରେ, ଇମ୍ରାନ୍ ଖାନ ଏକ ରାଷ୍ଟ୍ରୀୟ ସୁରକ୍ଷା ସମିତି ବୈଠକରେ ଅଧ୍ୟକ୍ଷତା କରିଥିଲେ । କାରଣ ସଂସଦରେ ଇମ୍ରାନଙ୍କ ବିରୋଧରେ ଅନାସ୍ଥା ପ୍ରସ୍ତାବ ଆସିବା ପରେ ଇସ୍ତଫା ନେଇ ରାଜନୈତିକ ଚାପ ବଢ଼ିବା ସହ ବିରୋଧ ବଢ଼ିବାରେ ଲାଗିଛି ।
