ଇତିହାସର ସେହି ଘଟଣା, ଜାଣନ୍ତୁ କାହିଁକି ସୁଭାଷଙ୍କ ଆଗରେ ଗାନ୍ଧିଜୀ ହାର ମାନିଥିଲେ
ଭୁବନେଶ୍ୱର: ନେତାଜୀ ନାଁ ଯେମିତି, ବୁଦ୍ଧିରେ ସେମିତି ବିଚକ୍ଷଣ । ପରାଧୀନ ଭାରତରେ ଇଂରେଜକୁ ତାରି ଭାଷାରେ ମୁହଁତୋଡ଼ ଜବାବ ଦେଇଥିଲେ ନେତାଜୀ ସୁଭାଷ ଚନ୍ଦ୍ର ବୋଷ । ଭାରତ ସ୍ୱାଧୀନତା ପାଇବାରେ ନେତାଜୀଙ୍କ ଅନେକ ଯୋଗଦାନ ରହିଛି । ଆଜି ସୁଭାଷ ଚନ୍ଦ୍ର ବୋଷଙ୍କ ୧୨୫ ତମ ଜୟନ୍ତୀରେ ସାରା ଦେଶ ତାଙ୍କୁ ମନେ ପକାଉଛି ।
୧୮୯୭ ଜାନୁଆରୀ ୨୩ରେ କଟକରେ ଜନ୍ମ ଗ୍ରହଣ କରିଥିଲେ ସୁଭାଷ ଚନ୍ଦ୍ର ବୋଷ । ପରାଧୀନ ଭାରତରେ ବଢ଼ିଥିବା ନେତାଜୀ ଦେଖିଥିଲେ ସ୍ୱାଧୀନତାର ସ୍ୱପ୍ନ । ୧୯୨୧ ମସିହା ଜୁଲାଇ ୨୦ରେ ନେତାଜୀ ପ୍ରଥମଥର ପାଇଁ ମହାତ୍ମା ଗାନ୍ଧୀଙ୍କୁ ଭେଟିଥିଲେ । ଆଉ ଗାନ୍ଧିଜୀଙ୍କ ପରାମର୍ଶ କ୍ରମେ ସୁଭାଷ ଭାରତୀୟ ସ୍ୱାଧୀନତା ଲାଗି କାମ କରିଥିଲେ । ସ୍ୱାଧୀନତା ପାଇଁ ସଂଗ୍ରାମ ସହିତ ସମାଜ ସେବା କ୍ଷେତ୍ରରେ ସକ୍ରିୟ ରହିଥିଲେ ନେତାଜୀ ।
୧୯୩୭ରେ କଂଗ୍ରେସ ସରକାର ଗଢ଼ିବା ସହ ନେତାଜୀ ଚର୍ଚ୍ଚାକୁ ଆସିଥିଲେ । ଆଉ ବର୍ଷକ ମଧ୍ୟରେ ୧୯୩୮ରେ କଂଗ୍ରେସର ଅଧ୍ୟକ୍ଷ ହୋଇଥିଲେ ନେତାଜୀ ସୁଭାଷ ଚନ୍ଦ୍ର ବୋଷ । କଂଗ୍ରେସର କମାଣ ସମ୍ଭାଳିବା ସହ ବାମଦଳକୁ କରାୟତ କରିଥିଲେ । ପୁଣି ୧୯୩୯ରେ ନେତାଜୀ କଂଗ୍ରେସର ଅଧ୍ୟକ୍ଷ ପାଇଁ ପ୍ରାର୍ଥୀ ହୋଇଥିଲେ । ଆଉ କହିଥିଲେ ମୁଁ ନୂଆ ଚିନ୍ତାଧାରା ଆଣିବି । ଯାହାକୁ ନେଇ ଅସହମତ ଥିଲେ ସର୍ଦ୍ଦାର ପଟେଲ, କୃପଲାନୀ, ରାଜେନ୍ଦ୍ର ପ୍ରସାଦ । ସେମାନଙ୍କ ମତ ଥିଲା ଏହା ଅଧ୍ୟକ୍ଷଙ୍କ କାମ ନୁହେଁ ।
ଆଉ ଉକ୍ତ ନିର୍ବାଚନରେ ଗାନ୍ଧିଜୀଙ୍କ ଉପଦେଶ କ୍ରମେ ପଟ୍ଟାଭି ସୀତାରମୈୟାଙ୍କୁ ପ୍ରାର୍ଥୀ କରାଯାଇଥିଲା । ପୂର୍ବରୁ ଲୋକପ୍ରିୟତା ସାଉଣ୍ଟି ସାରିଥିବା ସୁଭାଷ ନିର୍ବାଚନ ଜିତିଥିଲେ । ଆଉ ସୀତାରମୈୟାଙ୍କ ହାରିବାକୁ ନେଇ ଗାନ୍ଧିଜୀ କହିଥିଲେ ଏହା ମୋର ପରାଜୟ । ଏହା ପରେ ଦ୍ୱିତୀୟ ବିଶ୍ୱଯୁଦ୍ଧ ପରିସ୍ଥିତିକୁ ଦେଖି ବ୍ରିଟିଶ ଉପରେ ଚାପ ପକାଇବା ଲାଗି ଆନ୍ଦୋଳନ ପାଇଁ ଅଣ୍ଟା ଭିଡ଼ିଥିଲେ । ତେବେ ସୁଭାଷଙ୍କ ଏହି ପଦକ୍ଷେପକୁ ନେଇ ସହମତି ହୋଇପାରି ନଥିଲା । ଶେଷରେ କଂଗ୍ରେସ ଛାଡ଼ି ‘ଫରୱାର୍ଡ ବ୍ଲାକ’ ନାମରେ ନିଜର ଦଳ ଗଠନ କରିଥିଲେ ସୁଭାଷ ।
ଏହାପରେ ଆଉ ପଛକୁ ଫେରି ନଥିଲେ ସୁଭାଷ ଚନ୍ଦ୍ର ବୋଷ । ୧୯୪୨ ଦ୍ୱିତୀୟ ବିଶ୍ୱଯୁଦ୍ଧ ସମୟରେ ଆଜାଦ୍ ହିନ୍ଦ ଫୌଜ ଜାପାନରେ ଗଠନ କରିଥିଲେ । ଆଉ ଆଜାଦ୍ ହିନ୍ଦ ଫୌଜରେ ପ୍ରାୟ ୮୫ ହଜାର ସୈନିକ ଥିଲେ । ଆଉ ଏହି ସେନାରେ ଜାପାନରେ ବନ୍ଦୀ ଥିବା ଭାରତୀୟ, ବର୍ମା ଓ ମଲାୟାରେ ଥିବା ଭାରତୀୟ ସ୍ୱୟଂସେବକଙ୍କ ସମେତ ଭାରତ ବାହାରେ ରହୁଥିବା ଲୋକ ଯୋଗ ଦେଇଥିଲେ ।
