ଗିରଫ ହେବେ ୧୧ ଥର କୋଭିଡ ଟିକା ନେଇଥିବା ବୃଦ୍ଧ

ପାଟନା: କରୋନାରୁ ରକ୍ଷା ପାଇବା ପାଇଁ ସାରା ଦେଶରେ ଜୋରସୋର ଜାରି ରହିଛି ଟିକାକରଣ । ତେବେ ଏହି ଟିକାକରଣ ମଧ୍ୟରେ ବିହାରରୁ ଦେଖିବାକୁ ମିଳିଥିଲା ଏକ ଆଶ୍ଚର୍ଯ୍ୟକର ଘଟଣା । ବିହାରର ମାଧେପୁର ଅଞ୍ଚଳରେ ଜଣେ ୮୪ ବର୍ଷିୟ ବୃଦ୍ଧା ୧୧ ଥର କୋଭିଡ ଟିକା ନେଇଥିବା ଖବର ସାମ୍ନାକୁ ଆସିଥିଲା । ଏହି ମାମଲାରେ ବର୍ତ୍ତମାନ ମାଧେପୁର ପୋଲିସ ଉକ୍ତ ବୃଦ୍ଧାଙ୍କ ନାଁରେ ମାମଲା ରୁଜୁ କରିଛି ।

ବିହାର ପୁରେଇନିସ୍ଥିତ ପ୍ରାଥମିକ ସ୍ୱାସ୍ଥ୍ୟକେନ୍ଦ୍ରର ଅଭିଯୋଗ କ୍ରମେ ଉକ୍ତ ବ୍ୟକ୍ତିଙ୍କ ବିରୋଧରେ ଆଇପିସିର ଧାରା ୪୧୯, ୪୨୦ ଓ ୧୮୮ରେ ମାମଲା ରୁଜୁ  ହୋଇଛି । ମାଧେପୁର ଜିଲ୍ଲା ଚୌସାର ବ୍ରହ୍ମାନନ୍ଦ ମଣ୍ଡଳ ନାମକ ଉକ୍ତ ବ୍ୟକ୍ତି ଦାବି କରିଥିଲେ ଯେ, ସେ ବିଭିନ୍ନ ଟିକାଦାନ କେନ୍ଦ୍ରରେ ୧୧ ଥର ଟିକା ନେଲେଣି । ପ୍ରତ୍ୟେକ ଥର ଟିକା ନେବା ପରେ ସେ ବେଶ୍ ସ୍ଫୂର୍ତ୍ତି ଅନୁଭବ କରୁଛନ୍ତି । ଏହି ଟିକା ନେବା ଦ୍ୱାରା ତାଙ୍କ ଅଣ୍ଟା ଯନ୍ତ୍ରଣା  ଭଲ ହୋଇଯିବା ସହ କଫ ଓ ଥଣ୍ଡା ଆଦି ଭଲ ହୋଇଛି ବୋଲି ସେ ଦାବି କରିଥିଲେ ।  ବ୍ରହ୍ମାନନ୍ଦ ନିଜର ଗୋଟିଏ ଫୋନ ନମ୍ବର ଓ ଆଧାର କାର୍ଡକୁ ଏହି ୧୧ ଥର ବ୍ୟବହାର କରିଥିଲେ । ସରକାରୀ ବ୍ୟବସ୍ଥାରେ ଅନେକ ତ୍ରୁଟି ଯୋଗୁ ଏହା ସମ୍ଭବ ହୋଇଛି ବୋଲି ସେ କହିଥିଲେ ।