ପ୍ରଧାନମନ୍ତ୍ରୀଙ୍କ ସୁରକ୍ଷାରେ ବଡ଼ ଛିଦ୍ର, ଫ୍ଲାଏ ଓଭରରେ ୧୫ ମିନିଟ୍ ଅଟକିଲା ମୋଦିଙ୍କ କାର୍

ଫିରୋଜପୁର: ପଞ୍ଜାବରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ସୁରକ୍ଷାରେ ଗମ୍ଭୀର ତ୍ରୁଟି ଦେଖିବାକୁ ମିଳିଛି । ଭଟିଣ୍ଡା ବିମାନବନ୍ଦରରୁ ଫିରୋଜପୁର ସଡ଼କମାର୍ଗରେ ଯାଉଥିବା ବେଳେ ପ୍ରଧାନମନ୍ତ୍ରୀଙ୍କ କାରକେଡକୁ ରାସ୍ତାରେ ଅଟକାଇଥିଲେ ଆନ୍ଦୋଳନକାରୀ କୃଷକ । ସେମାନେ ପ୍ରଧାନମନ୍ତ୍ରୀ ମୋଦିଙ୍କୁ ଫିରୋଜପୁର ରାଲିକୁ ଯିବାକୁ ଦେଇନଥିଲେ ।  ୧୫ ମିନିଟ୍ ଧରି ଭଟିଣ୍ଡାର ଏକ ଫ୍ଲାଏଓଭର ଉପରେ ଅଟକି ରହିବା ପରେ ପ୍ରଧାନମନ୍ତ୍ରୀ ବିମାନବନ୍ଦରକୁ ଫେରିଥିଲେ । ବିମାନ ବନ୍ଦରରେ ପହଞ୍ଚିବା ପରେ ସେ ସେଠାରେ ଉପସ୍ଥିତ ଥିବା ଅଧିକାରୀଙ୍କୁ କହିଥିଲେ ଯେ, ‘ଆପଣଙ୍କ ମୁଖ୍ୟମନ୍ତ୍ରୀଙ୍କୁ କହିବେ ଯେ, ମୁଁ ଭଟିଣ୍ଡା ବିମାନବନ୍ଦର ପର୍ଯ୍ୟନ୍ତ ଜୀବିତ ପହଞ୍ଚି ପାରିଲି’ । ସୂଚନାଯୋଗ୍ୟ ଯେ, ଫିରୋଜପୁରରେ ଏକ କାର୍ଯ୍ୟକ୍ରମରେ ଯୋଗଦେବାକୁ ପ୍ରଧାନମନ୍ତ୍ରୀ ଯାଉଥିଲେ । ପ୍ରଧାନମନ୍ତ୍ରୀ ମୋଦି କାର୍ଯ୍ୟକ୍ରମରେ ପହଞ୍ଚି ନପାରିବାରୁ କାର୍ଯ୍ୟକ୍ରମକୁ ସ୍ଥଗିତ ରଖାଯାଇଛି ।

Security breach in PM Narendra Modi's convoy near Punjab's Hussainiwala in Ferozepur district. The PM's convoy was stuck on a flyover for 15-20 minutes. pic.twitter.com/xU8Jx3h26n

— ANI (@ANI) January 5, 2022

ଗୃହ ମନ୍ତ୍ରଣାଳୟ ମାଗିଲା ରିପୋର୍ଟ

ଅନ୍ୟପକ୍ଷରେ ପ୍ରଧାନମନ୍ତ୍ରୀଙ୍କ କାରକେଡକୁ ଏଭଳି ରୋକାଯିବାକୁ ଗମ୍ଭୀରତାର ସହ ନେଇଛି କେନ୍ଦ୍ର ଗୃହ ମନ୍ତ୍ରଣାଳୟ । ଗୃହ ବିଭାଗ ଏହାକୁ ଗମ୍ଭୀର ଭୁଲ ଭାବେ ଗ୍ରହଣ କରି ପଞ୍ଜାବ ସରକାରଙ୍କୁ ରିପୋର୍ଟ ତଲବ କରିଛି । ଏହା ସହିତ ଏଥିପାଇଁ ଯେଉଁମମାନେ ଦାୟୀ ସେମାନଙ୍କୁ ଚିହ୍ନଟ କରିବାକୁ ମଧ୍ୟ ଗୃହ ବିଭାଗ କହିଛି । ଯେଉଁ ସମୟରେ ଏହି ଘଟଣା ଘଟିଥିଲା ସେତେବେଳେ ପ୍ରଧାନମନ୍ତ୍ରୀ ଭଟିଣ୍ଡାରୁ ହୁସୈନିବାଲାରେ ଜାତୀୟ ସହିଦ ସ୍ମାରକସ୍ଥଳକୁ ଯାତ୍ରା କରୁଥିଲେ ।

ଅନ୍ୟପକ୍ଷରେ ଫିରୋଜପୁରରେ ଉପସ୍ଥିତ ଥିବା କେନ୍ଦ୍ର ସ୍ୱାସ୍ଥ୍ୟ ମନ୍ତ୍ରୀ କହିଛନ୍ତି ଯେ, ପ୍ରଧାନମନ୍ତ୍ରୀ ଆପଣ ମାନଙ୍କୁ ସାକ୍ଷାତ କରିବାକୁ ଚାହୁଁଥିଲେ କିନ୍ତୁ କିଛି କାରଣ ପାଇଁ ସେ ଆସି ପାରିନାହାନ୍ତି । ତେବେ କାର୍ଯକ୍ରମ ରଦ୍ଦ କରାଯାଇ ନାହିଁ କେବଳ ସ୍ଥଗିତ ହୋଇଛି ବୋଲି ସେ କହିଛନ୍ତି ।

ଅନ୍ୟପଟେ ଏହାକୁ ନେଇ କଂଗ୍ରେସ ବିରୋଧରେ ବିଜେପି ଓ ଅକାଳୀ ଦଳ ପକ୍ଷରୁ ଆକ୍ରମଣ ଆରମ୍ଭ ହୋଇଛି । ବିଜେପି ନେତା ମଜିନ୍ଦର ସିଂହ ସିରଶା ଏହି ଘଟଣା କଂଗ୍ରେସ ପ୍ରାୟୋଜିତ ବୋଲି କହିଛନ୍ତି । ଆଇଏସଆଇ ଓ ପାକିସ୍ତାନ ସହିତ ମିଶି କଂଗ୍ରେସ ପଂଜାବରେ ଅଶାନ୍ତି ସୃଷ୍ଟି କରିବାକୁ ଚାହୁଁଛି ବୋଲି ସେ କହିଛନ୍ତି ।