ISISରେ ୬୬ ଭାରତୀୟ, ଆମେରିକୀୟ ରିପୋର୍ଟର ଖୁଲାସା
1 min read
ଓ୍ୱାଶିଂଟନ: ସିରିଆରୁ ଇରାକ ପର୍ଯ୍ୟନ୍ତ ନିଜର ଦବଦବା ଜାହିର କରିଛନ୍ତି ଆତଙ୍କବାଦୀ ସଂଗଠନ ISIS । ଆତଙ୍କବାଦୀ ସଂଗଠନ ଇସଲାମିକ୍ ଷ୍ଟେଟ୍ସରେ ଭାରତର ୬୬ ଜଣ ଯୁବକ ସାମିଲ ଥିବା ସୂଚନା ମିଳିଛି । ଆମେରିକା ବିଦେଶ ମନ୍ତ୍ରଣାଳୟ ଆତଙ୍କବାଦୀଙ୍କ ଉପରେ ଜାରି କରିଥିବା ନୂଆ ରିପୋର୍ଟରେ ଏହା ଦାବି କରିଛି କି ଭାରତର ୬୬ ଜଣ ଯୁବକ ISISରେ ସାମିଲ ଅଛନ୍ତି । ଏହା ସହିତ ଏହି ରିପୋର୍ଟରେ ଅନ୍ତର୍ଜାତୀୟ ତଥା ଆଞ୍ଚଳିକ ଆତଙ୍କବାଦୀଙ୍କୁ ସକ୍ରିୟ ଭାବରେ ଚିହ୍ନଟ କରି ରୋକିବା ପାଇଁ ଏନଆଇଏ ଏବଂ ଭାରତର ଆତଙ୍କବାଦ ବିରୋଧୀ ଏଜେନ୍ସିକୁ ପ୍ରଶଂସା କରାଯାଇଛି।
ଆମେରିକା ବୈଦେଶିକ ମନ୍ତ୍ରୀ ଆଣ୍ଟୋନୀ ବ୍ଲିଙ୍କେନ ଗୁରୁବାର ଆତଙ୍କବାଦଙ୍କ ଉପରେ ଏକ ରିପୋର୍ଟ ଜାରି କରିଛନ୍ତି । ଏହି ଅବସରରେ ସେ କହିଛନ୍ତି ଯେ ଜାତିସଂଘ ସୁରକ୍ଷା ପରିଷଦର ରିଜୋଲ୍ୟୁସନ୍ UNSCR 2309 ଏବଂ ବିମାନ ବନ୍ଦରରେ ବାଧ୍ୟତାମୂଳକ ‘ଡୁଆଲ୍ ସ୍କ୍ରିନ୍ ଏକ୍ସ-ରେ’ କାର୍ଯ୍ୟକାରୀ କରିବାକୁ ଭାରତ ଆମେରିକା ସହ ସହଯୋଗ କରୁଛି। ମିଳିତ ଜାତିସଂଘ ସୁରକ୍ଷା ପରିଷଦର ସଂକଳ୍ପ ୨୩୦୯ ଅନୁସାରେ ବିମାନ ଯାତ୍ରା ସମୟରେ ସାଧାରଣ ନାଗରିକଙ୍କ ସୁରକ୍ଷା ନିଶ୍ଚିତ କରିବାକୁ ସରକାରଙ୍କୁ ଆହ୍ୱନ କରାଯାଇଛି ।
ଆମେରିକା ଦ୍ୱାରା ପ୍ରକାଶିତ ରିପୋର୍ଟରେ କୁହାଯାଇଛି ଯେ ନଭେମ୍ବର ପର୍ଯ୍ୟନ୍ତ ଇସଲାମିକ୍ ଷ୍ଟେଟ୍ ସହିତ ୬୬ ଜଣ ଭାରତୀୟ ଯୁବକଙ୍କ ସମ୍ପୃକ୍ତି ସମ୍ପର୍କରେ ସୂଚନା ମିଳିଛି। ଏହି ଅନୁଯାୟୀ, ୨୦୨୦ ମସିହାରେ କୌଣସି ବିଦେଶୀ ଆତଙ୍କବାଦୀ ଯୁବକ ଭାରତକୁ ଫେରିନହାନ୍ତି । ଭାରତ-ଆମେରିକାର ସହଯୋଗକୁ ସୂଚାଇ ଏହି ରିପୋର୍ଟରେ କୁହାଯାଇଛି ଯେ ଆତଙ୍କବାଦ ମୁକାବିଲା ଉପରେ ୧୭ତମ ମିଳିତ ଟାସ୍କଫୋର୍ସ ଏବଂ ଅକ୍ଟୋବରରେ ତୃତୀୟ ‘ଟୁ ପ୍ଲସ୍ ଟୁ’ ମନ୍ତ୍ରୀସ୍ତରୀୟ ଆଲୋଚନା ମାଧ୍ୟମରେ ଦ୍ୱିପାକ୍ଷିକ ସମ୍ପର୍କ ମାଧ୍ୟମରେ ଆମେରିକା ଭାରତ ସରକାରଙ୍କ ସହ ରଣନୈତିକ ଭାଗିଦାରୀକୁ ବୃଦ୍ଧି କରିବ।
ଏହି ରିପୋର୍ଟରେ ଅନ୍ତର୍ଜାତୀୟ ତଥା ଆଞ୍ଚଳିକ ଆତଙ୍କବାଦୀ ବାହିନୀକୁ ସକ୍ରିୟ ଭାବରେ ଚିହ୍ନଟ ତଥା ରୋକିବା ପାଇଁ ଜାତୀୟ ଅନୁସନ୍ଧାନ ଏଜେନ୍ସି (ଏନଆଇଏ) ସମେତ ଭାରତୀୟ ଆତଙ୍କବାଦ ବିରୋଧୀ ଏଜେନ୍ସିର ପ୍ରଶଂସା କରାଯାଇଛି। ରିପୋର୍ଟରେ କୁହାଯାଇଛି ଯେ NIA ଇସଲାମିକ ଷ୍ଟେଟ ସହ ଜଡିତ ୩୪ଟି ମାମଲାର ଯାଞ୍ଚ କରିଛି ଏବଂ ସେପ୍ଟେମ୍ବରରେ କେରଳ ଏବଂ ପଶ୍ଚିମବଙ୍ଗର ୧୦ ଜଣ ଅଲ-କାଏଦା ସଦସ୍ୟଙ୍କ ସମେତ ୧୬୦ ଜଣଙ୍କୁ ଗିରଫ କରିଛି।
