ଓଡ଼ିଶା ହାଇକୋର୍ଟରେ ୨ ଶହ ବର୍ଷ ତଳର ନଥି

କଟକ: ଓଡ଼ିଶା ହାଇକୋର୍ଟର ରେକର୍ଡ ରୁମରେ ରହିଛି ପ୍ରାୟ ୨ ଶହ ବର୍ଷ ତଳର ନଥି । ବ୍ରିଟିଶ ଅମଳର ଅଦାଲତି ରେକର୍ଡ ଗୁଡ଼ିକ ଏବେବି ସମ୍ପୂର୍ଣ୍ଣ ଅକ୍ଷତ ଅବସ୍ଥାରେ ରହିଛି । ଆଇନ୍ ଅଦାଲତକୁ ପେପର ଲେସ କରିବା ପାଇଁ ସୁପ୍ରିମ ସର୍ବୋଚ୍ଚ ନ୍ୟାୟାଳୟ ନିର୍ଦ୍ଦେଶ ଦେବା ପରେ ହାଇକୋର୍ଟ ରେକର୍ଡ ରୁମରେ ଥିବା ସମସ୍ତ କାଗଜ ପତ୍ରକୁ ଡିଜିଟାଲାଇଜ୍ କରାଯାଉଛି । ଅବଶ୍ୟ ୧୯୫୦ ମସିହା ପୂର୍ବର ରେକର୍ଡ ଗୁଡିକୁ ସୁରକ୍ଷିତ ଭାବେ ସାଇତା ଯାଉଛି, କିନ୍ତୁ ତାର ପରବର୍ତ୍ତୀ କାଳର ସମସ୍ତ ରେକର୍ଡକୁ ଡିଜିଟାଲାଇଜ୍ କରାଯାଉଛି ।

ହାଇକୋର୍ଟ ସମେତ କଟକ, ବାଲେଶ୍ଵର, ସମ୍ବଲପୁର ଏବଂ ଗଞ୍ଜାମ ଜିଲ୍ଲାର ସମସ୍ତ ଅଦାଲତି ରେକର୍ଡ ଗୁଡିକୁ ଡିଜିଟାଲାଇଜ୍ କରାଯାଉଛି । ଖାସ କଥା ହେଉଛି ରେକର୍ଡ ରୁମ୍ ଡିଜିଟାଲାଇଜେସନ ସେଣ୍ଟର୍ ଭିତରେ ରହିଛି ମାଡ୍ରାସ ହାଇକୋର୍ଟ, ପାଟନା ହାଇକୋର୍ଟ ଏବଂ କଲିକତା ହାଇକୋର୍ଟଙ୍କ ଅନେକ ରେକର୍ଡ  । ଏହା ବ୍ୟତିତ ପାର୍ସୀ ଭାଷାରେ ଲିଖିତ ହୋଇଥିବା ଅର୍ଡର କପିକୁ ମଧ୍ୟ ଖୁବ୍ ଯତ୍ନର ସହ ସାଇତି ରଖାଯାଇଛି ।