ଶାହଙ୍କ ଜମ୍ମୁ-କାଶ୍ମୀର ଗସ୍ତ ପୂର୍ବରୁ ଅଣକାଶ୍ମୀରଙ୍କ ଶବ ଉଦ୍ଧାର

ଶ୍ରୀନଗର: ଅମିତ ଶାହଙ୍କ ଗସ୍ତ ପୂର୍ବରୁ ଜମ୍ମୁ-କାଶ୍ମୀରରେ ସୁରକ୍ଷା ବ୍ୟବସ୍ଥା କଡ଼ାକଡ଼ି। ଅକ୍ଟୋବର ୨୩ରୁ ୨୫ ତାରିଖ ମଧ୍ୟରେ ଗୃହମନ୍ତ୍ରୀ ଅମିତ ଶାହାଙ୍କ କାଶ୍ମୀର ଗସ୍ତ କାର୍ଯ୍ୟକ୍ରମ ରହିଛି । ଗତ କିଛିଦିନ ହେବ ଘାଟିରେ ଆତଙ୍କବାଦୀ କାର୍ଯ୍ୟକଳାପ ବୃଦ୍ଧି ପାଇଥିବା ବେଳେ ବଡ଼ ଧରଣର ହମଲା ନେଇ ଯୋଜନା ହୋଇଥିବା ଜଣାପଡିଛି । ଦୀପାବଳି ପୂର୍ବରୁ ଜାମ୍ମୁ-କାଶ୍ମୀରରେ ପୁଲଓ୍ବାମା ଭଳି ହମଲା ଯୋଜନା କରିଥିବା ଗୁଇନ୍ଦା ସୂତ୍ରରୁ ସୂଚନା ମିଳିଛି । ଏହାକୁ ଦୃଷ୍ଟିରେ ରଖି ଜମ୍ମୁ-କାଶ୍ମୀରରେ ଅଧିକ ସୁରକ୍ଷାବଳ ନିୟୋଜିତ କରାଯାଇଛି ।

କେବଳ ଶ୍ରୀନଗରର ଅଞ୍ଚଳରେ ୨୦ରୁ ୨୫ଟି ଅଧିକ ପାରାମିଲିଟାରୀ ଫୋର୍ସ ନିୟୋଜିତ ହୋଇଛନ୍ତି। ସିଆରପିଏଫ ଡିଜି, NIAର ବରିଷ୍ଠ ଅଧିକାରୀଙ୍କ ସମେତ IB ଓ RAWର କାଉଣ୍ଟର ଟେରର ବରିଷ୍ଠ ଅଧିକାରୀମାନେ ଘାଟି ଅଞ୍ଚଳରେ ପହଞ୍ଚି ସ୍ଥିତି ଉପରେ ନଜର ରଖିଛନ୍ତି ।  ଗତ କିଛି ଦିନ ଧରି ଜାମ୍ମୁ-କାଶ୍ମୀରରେ ହିଂସା ଲାଗି ରାହିଛି। ସାଧାରଣ ଲୋକ ଓ ଅଣକାଶ୍ମୀର ଲୋକଙ୍କୁ ଟାର୍ଗେଟ୍ କରୁଛନ୍ତି ଆତଙ୍କବାଦୀ । ସେନାର କାର୍ଯ୍ୟାନୁଷ୍ଠାନରେ ଅନେକ ଆତଙ୍କବାଦୀଙ୍କ ମୃତ୍ୟୁ ହୋଇଛି।

ତେବେ ଅମିତ ଶାହଙ୍କ ଗସ୍ତ ପୂର୍ବରୁ ଅନନ୍ତନାଗର ଜଙ୍ଗଲମୁଣ୍ଡର ବିଲାଲ କଲୋନୀ ଅଞ୍ଚଳରୁ ଅଣ କାଶ୍ମୀରି ନାଗରିକଙ୍କ ମୃତଦେହ ମିଳିବା ପରେ ଆଲୋଡ଼ନ ସୃଷ୍ଟି ହୋଇଛି। ମୃତକଙ୍କ ଶରୀରରେ ଅନେକ ଆଘାତ ଚିହ୍ନ ରହିଥିବା ବେଳେ ମୃତଦେହକୁ ପୋଷ୍ଟମର୍ଟମ ପାଇଁ ପଠାଯାଇଛି।