RJDରୁ ଆଉଟ୍ ତେଜ ପ୍ରତାପ ଯାଦବ, ଦାବି କଲେ ରାଷ୍ଟ୍ରୀୟ ଉପାଧ୍ୟକ୍ଷ ଶିବାନନ୍ଦ

ପାଟଣା: ଲାଲୁଙ୍କ ପାର୍ଟି ରାଷ୍ଟ୍ରୀୟ ଜନତା ଦଳରେ ସବୁ କିଛି ଠିକ୍ ନଥିବା ଚର୍ଚ୍ଚା ହେଉଛି। ନିକଟରେ ଲାଲୁଙ୍କ ବଡ ପୁଅ ତେଜ ପ୍ରତାପ ପ୍ରଦେଶ ଅଧ୍ୟକ୍ଷ ଜଗଦାନନ୍ଦଙ୍କ ବିରୋଧରେ ଅନେକ ଅଭିଯୋଗ ଆଣିବା ପରେ ପାର୍ଟି ଅଫିସକୁ ଆସୁନାହାଁନ୍ତି । ଏପରିକି ଲାଲୁଙ୍କୁ ବନ୍ଧକ ରଖାଯାଇଥିବା ଅଭିଯୋଗ କରି ପୂବର୍ରୁ ସାନ ଭାଇ ତେଜସ୍ୱୀଙ୍କୁ ମଧ୍ୟ ଟାର୍ଗେଟ କରିଥିଲେ।

ଏଭଳି ସ୍ଥିତିରେ ଆରଜେଡିର ପ୍ରଦେଶ ଉପାଧ୍ୟକ୍ଷ ଶିବାନନ୍ଦ ତିୱାରୀ ତେଜ ପ୍ରତାପଙ୍କ ବିଷୟରେ ଏକ ବଡ଼ ଖୁଲାସା କରିଛନ୍ତି।ହାଜିପୁରର ଆରଜେଡି କାର୍ଯ୍ୟାଳୟରେ ସାମ୍ବାଦିକମାନଙ୍କ ସହ ଆଲୋଚନା ବେଳେ ଶିବାନନ୍ଦ ତିୱାରୀ କହିଛନ୍ତି ଯେ ତେଜ ପ୍ରତାପ ପାର୍ଟିରେ ନାହାଁନ୍ତି। ସେ ଏକ ନୂଆ ସଂଗଠନ ତିଆରି କରିଛନ୍ତି। ତେଜ ପ୍ରତାପ ଯାଦବ ନିଜେ ଆରଜେଡିରୁ ବାହାରିଥିବା ସେ କହିଛନ୍ତି ।

ଆରଜେଡିର ବଡ ବଡ ନେତାମାନେ ତେଜ ପ୍ରତାପ ଯାଦବଙ୍କ ଉପରେ ଅସନ୍ତୁଷ୍ଟ ରହିଆସିଛନ୍ତି । ଏହାପୂର୍ବରୁ ଆରଜେଡି ପ୍ରଦେଶ ଅଧ୍ୟକ୍ଷ ଜଗଦାନନ୍ଦ ସିଂ ତେଜ ପ୍ରତାପଙ୍କ ଉପରେ ଅସନ୍ତୋଷ ପ୍ରକାଶ କରିଥିଲେ। ତେଜ ପ୍ରତାପ ନିକଟରେ ଛାତ୍ର ଜନଶକ୍ତି ପରିଷଦ ନାମକ ଏକ ସଂଗଠନ ତିଆରି କରିଛନ୍ତି। ଆଉ ଏହି ସଂଗଠନ ମାଧ୍ୟମରେ ସେ ରାଜନୀତି କରୁଛନ୍ତି। ସେ ଆରଜେଡି ବୈଠକରୁ ମଧ୍ୟ ଦୂରରେ ରହୁଥିବା ବେଳେ ମଙ୍ଗଳବାର ଦଳର ତାଲିମ ଶିବିରରେ ତେଜ ପ୍ରତାପଙ୍କ ବିଷୟରେ କୌଣସି ଆଲୋଚନା ହୋଇନଥିଲା।