ଦେବଦୂତ ସାଜିଲେ ଅଗ୍ନିଶମ ବାହିନୀ: ଜଳବନ୍ଦୀ ଯୁବକଙ୍କୁ କଲେ ଉଦ୍ଧାର
ନୟାଗଡ଼: ମାଛ ଧରିବାକୁ ଯାଇ ଫସିଗଲେ ଯୁବକ । ନଈରେ ବଢ଼ି ପାଣି ଆସିବାରୁ ଫସିଗଲେ । ଗଛରେ ନେଲେ ଆଶ୍ରୟ, ଉଦ୍ଧାର କଲା ଅଗ୍ନିଶମ ବାହିନୀ । ନୟାଗଡ଼ ଜିଲ୍ଲା ଖଣ୍ଡପଡ଼ା ବ୍ଳକ କୁଞ୍ଜବିହାରୀପୁର ନିକଟରେ କୁସୁମୀ ନଦୀକୁ ନୂଆସାହସପୁର ଗ୍ରାମର ୩୯ବର୍ଷୀୟ କିଶୋର ଚନ୍ଦ୍ର ପ୍ରଧାନ କିଛି ବନ୍ଧୁଙ୍କ ସହ ମାଛ ଧରିବାକୁ ଯାଇଥିଲେ । ଠିକ ଏହି ସମୟରେ କୁସୁମୀ ନଦୀରେ ଧୀରେ ଧୀରେ ବନ୍ୟା ଜଳ ବଢ଼ି ଯାଇଥିଲା । ଏହାକୁ ଦେଖି ଅନ୍ୟ ବନ୍ଧୁମାନେ କୂଳକୁ ଚାଲି ଆସିଥିବା ବେଳେ କିଶୋର କିନ୍ତୁ ଏକ ଆମ୍ବ ଗଛ ଉପରେ ଚଢ଼ି ଯାଇଥିଲେ। ଅନ୍ୟ ବନ୍ଧୁମାନେ ଗାଁକୁ ଆସି ଅଗ୍ନିଶମ ବିଭାଗକୁ ଖବର ଦେଇଥିଲେ। ଖବର ପାଇ ସଙ୍ଗେ ସଙ୍ଗେ ଅଗ୍ନିଶମ କର୍ମଚାରୀ ସେଠାରେ ପହଞ୍ଚି ବନ୍ୟା ଘେରରେ ଥିବା କିଶୋରଙ୍କୁ ଉଦ୍ଧାର କରିଛନ୍ତି ।
