ଆଫଗାନିସ୍ତାନ ବିମାନ ବନ୍ଦରର ଆଉ ଏକ ଛାତିଥରା ଦୃଶ୍ୟ: ଏଭଳି ଅବସ୍ଥା ଦେଖି କାନ୍ଦିପକାଇଲେ ସୈନିକ
କାବୁଲ: ତାଲିବାନୀଙ୍କୁ ନେଇ ଆତଙ୍କିତ ଆଫଗାନିସ୍ତାନବାସୀ । କେବଳ ଦେଶବାସୀ ନୁହଁନ୍ତି ଆଫଗାନିସ୍ତାନରେ ରହୁଥିବା ଅନ୍ୟ ଦେଶର ନାଗରିକ ମଧ୍ୟ ଭୟଭୀତ । ଏଣୁ ଦେଶରୁ ପଳାୟନ ନେଇ ପ୍ରାଣପ୍ରଣେ ଉଦ୍ୟମ କରୁଛନ୍ତି ଲୋକେ । ଜୀବନକୁ ବାଜି ଲାଗାଇବାକୁ ପଛାଉନାହାନ୍ତି । ଯାହାର କିଛି ଛାତିଥରା ଦୃଶ୍ୟ ପୂର୍ବରୁ ଗଣମାଧ୍ୟମ ତଥା ସୋସିଆଲ ମିଡିଆରେ ଦେଖିବାକୁ ମିଳିଥିବା ବେଳେ ଏବେ ଆଉ କିଛି ହୃଦୟବିଦାରକ ଘଟଣା ସବୁ ସାମ୍ନାକୁ ଆସିଛି ।
ତାଲିବାନୀଙ୍କ କାବୁଲ କବ୍ଜା ପରେ ଲୋକେ ଅନ୍ୟ ଦେଶକୁ ପଳାୟନ ନେଇ ଉଦ୍ୟମ କରୁଛନ୍ତି । ଏଣୁ କାବୁଲ ବିମାନ ବନ୍ଦରରେ ବହୁ ସଂଖ୍ୟାରେ ଲୋକେ ରୁଣ୍ଢ ହେବା ସହ ବିମାନରେ ଓହଳି ଯାଉଥିବା ଭଳି ଦୃଶ୍ୟ ମଧ୍ୟ ଦେଖିବାକୁ ମିଳିଥିଲା । ଏଭଳି ସ୍ଥିତିକୁ ଏଡ଼ାଇବା ଲାଗି ବିମାନବନ୍ଦର ଚାରିପାଖରେ କଣ୍ଟାଯୁକ୍ତ ତାରବାଡ଼ ବେଢ଼ାଯାଇଛି । ଯାହା ଫଳରେ ଲୋକେ ବିମାନ ବନ୍ଦରର ଭିତରକୁ ଅଯଥାରେ ପ୍ରବେଶ କରିପାରିିବେ ନାହିଁ । କିନ୍ତୁ ତାଲିବାନୀ ଲୋକେ ଏତେ ସଂଖ୍ୟାରେ ଆତଙ୍କିତ ହୋଇ ଯାଇଛନ୍ତି ଯେ, ସେମାନେ ଏ ସବୁକୁ ବି ଖାତିର କରୁନାହାନ୍ତି ।
କଣ୍ଟାଯୁକ୍ତ ତାର ବାଡ଼ ଗୋଟିଏ ପାଖରେ ଶହ ଶହ ଆଫଗାନୀ ଓ ତାଙ୍କ ଛୋଟ ଛୋଟ ଛୁଆ ଥିବା ବେଳେ ତାର ବାଡ଼ ଆରପାଖରେ ଥିଲେ ବ୍ରିଟିସ୍ ସୈନିକ । ଏଭଳି ସ୍ଥିତିରେ ତାରବାଡ଼ ଡେଇଁ ଯିବା ଆଫଗାନୀଙ୍କ ପାଇଁ ଅସମ୍ଭବ ହୋଇପଡ଼ଥିଲା । କିନ୍ତୁ ସେମାନେ ନିଜ ଛୁଆଙ୍କୁ ଏଭଳି ଆତଙ୍କିତ ସ୍ଥିତି ଅନିଶ୍ଚିତତା ମଧ୍ୟରେ ରଖିବାକୁ ଚାହୁଁନଥିଲେ । ଏଣୁ ନିଜ ଛୋଟ ଛୁଆଙ୍କ ଜୀବନକୁ ବାଜି ଲଗାଇ ପିଲାମାନଙ୍କୁ ତାର ବାଡ଼ ସେପଟକୁ ଫୋପାଡ଼ି ଦେଉଥିଲା । ଫଳରେ ସେପଟେ ଥିବା ସୈନିକ ସେମାନଙ୍କୁ ଧରିବା ପାଇଁ ବାଧ୍ୟ ହେବେ ଏବଂ ସେମାନଙ୍କୁ ବିମାନରେ ନେଇକି ଯିବେ । ଏବଂ ସେଇଆ ହୋଇଥିଲା ସେମାନେ ସେମାନଙ୍କ ଛୋଟ ଛୁଆକୁ ତାର ବାଡ଼ ସେପଟେ ଫୋପାଡ଼ି ଦେଉଥିଲେ ଏବଂ ସେମାନଙ୍କୁ ସୈନିକମାନେ କୋଳେଇ ଧରୁଥିଲେ । କିଛି ପିଲା ତାର ବାଡ଼ ମଧ୍ୟରେ ଫସି ଛଟପଟ ହେଉଥିଲା ଆଉ ଏଭଳି ଦୃଶ୍ୟ ଦେଖି ସୈନିକଙ୍କମାନଙ୍କ ଆଖି ମଧ୍ୟ ଲୁହରେ ଭରିଯାଇଥିଲା ।
ଜେନୖକ ବ୍ରିଟିସ ଅଧିକାରୀ କହିଛନ୍ତି ଯେ, ଉତ୍ତମ ଭବିଷ୍ୟତ ଆଶାରୋ ଲୋକେ ଆଫଗାନିସ୍ତାନ ଛାଡ଼ିବାକୁ ଚାହୁଁଛନ୍ତି । ବାଟରେ ଫାୟରିଂ ମଧ୍ୟ ହେଉଛି । ତାଲିବାନୀ ସେମାନଙ୍କୁ ମାରପିଟ୍ ମଧ୍ୟ କରୁଛନ୍ତି କିନ୍ତୁ ସେମାନେ ମାନିବାକୁ ନାରାଜ ।
