ଆଣ୍ଟିଲିଆ କେସରେ ବଡ଼ ଖୁଲାସା, ସନ୍ଦିଗ୍ଧ ଖସି ପଳାଇଥିବା ଇନୋଭା ବି ମୁମ୍ବାଇ ପୋଲିସର
1 min read
ମୁମ୍ବାଇ: ଆଣ୍ଟିଲିଆ ମାମଲାରେ ଜଡ଼ିତ ଇନୋଭା କାହାର ? ଇନୋଭା ରହସ୍ୟ ଭେଦ କରିବାରେ ଲାଗିଛି ଏନଆଇଏ । କୁହାଯାଉଛି ମୁକେଶ ଅମ୍ବାନୀଙ୍କ ବାସଭବନ ଆଗରେ ଫେବ୍ରୁଆରୀ ୨୫ରେ ୨ଟି କାର୍ ପହଞ୍ଚିଥିଲା । ଗୋଟିଏ ଥିଲା ସ୍କର୍ପିଓ ଓ ଅନ୍ୟଟି ଇନୋଭା । ସ୍କର୍ପିଓ ଛାଡ଼ି ସନ୍ଦିଗ୍ଧ ଇନୋଭାରେ ଖସି ଫେରାର୍ ହୋଇଯାଇଥିଲା ।
ମୁମ୍ବାଇର ମୁଲୁଣ୍ଡ ଟୋଲ୍ ନିକଟରେ ଇନୋଭାରେ ୨ ଜଣ ଥିବା ଦେଖା ଯାଇଥିଲା । କୁହାଯାଉଛି ଉକ୍ତ ଇନୋଭା କାର୍ ମୁମ୍ବାଇ କ୍ରାଇମବ୍ରାଞ୍ଚର । ସ୍କର୍ପିଓର ମାଲିକ ମନସୁଖ ହିରନ ହୋଇଥିବା ବେଳେ ଇନୋଭା କାହାର ସେନେଇ ଛାନଭିନ୍ ଚାଲିଥିଲା । ଯାଞ୍ଚରୁ ଜଣାପଡ଼ିଛି ଇନୋଭା କ୍ରାଇମବ୍ରାଞ୍ଚର । ଇନୋଭା ମୁମ୍ବାଇ ପୋଲିସର ଅପାରଧ ଶାଖା CIU ୟୁନିଟର । ମାମଲାରେ ଏନଆଇଏ ମୁମ୍ବାଇ ପୋଲିସର ଏନକାଉଣ୍ଟର ସ୍ପେଶାଲିଷ୍ଟ ସଚିନ୍ ବାଜେଙ୍କୁ ଗିରଫ କରିଛି । ଅନ୍ୟଜଣେ ଅଧିକାରୀ ରିୟାଜ ଫାଜିକୁ ଜେରା ଚାଲିଛି ।
ସଚିନ୍ ବାଜେ ସ୍ପେଶାଲ୍ ବ୍ରାଞ୍ଚକୁ ଆସିବା ପୂର୍ବରୁ କ୍ରାଇମବ୍ରାଞ୍ଚରେ ଥିଲେ । ଆରମ୍ଭରୁ ଏହି ମାମଲାର ଯାଞ୍ଚ କ୍ରାଇମବ୍ରାଞ୍ଚ କରୁଥିଲା । ସୂତ୍ର ଅନୁସାରେ, ଆଣ୍ଟିଲିଆ ମାମଲାରେ ୨ଟି କାର୍ ବ୍ୟବହାର ହୋଇଥିଲା । ସ୍କର୍ପିଓରେ ଜଲୋଟିନ୍ ଷ୍ଟିକ୍ ରଖାଯାଇଥିଲା । ଅନ୍ୟ ଇନୋଭା କାରଟି ସ୍କର୍ପିଓ ପଛେ ପଛେ ଚାଲିଥିଲା । ମୁମ୍ବାଇ ମୁଲୁଣ୍ଡ ଟୋଲରେ ଇନୋଭାକୁ ଦେଖାଯାଇଥିବା ବେଳେ ମୁମ୍ବାଇର ଚେମ୍ବୁରୁ ଅଞ୍ଚଳରୁ ଇନୋଭା ଓ ସ୍କର୍ପିଓ ଏକାଠି ହେବା ସହ ଆଣ୍ଟିଲିଆ ଅଭିମୁଖେ ଆସିଥିଲେ ।
ଆଣ୍ଟିଲିଆ ବାହାରେ ଉଭୟ ଗାଡ଼ି ପହଞ୍ଚିବା ପରେ ସ୍କର୍ପିଓକୁ ବାହାରେ ରଖି ଦେଇ ତାର ଡ୍ରାଇଭର ଇନୋଭାରେ ବସି ଫେରାର୍ ହୋଇ ଯାଇଥିଲା । ଛାଡ଼ି ଯାଇଥିବା ସ୍କର୍ପିଓରେ ଜିଲୋଟିନ୍ ଷ୍ଟିକ୍ ଥିଲା । ଅନ୍ୟପଟେ ଇନୋଭା ମୁଲୁଣ୍ଡ ଟୋଲ୍ ଦେଇ ଥାନେ ପ୍ରବେଶ କରିଥିଲା । ତା’ପରେ ଇନୋଭା କୁଆଡ଼େ ଗଲା ତା’ ଏବେ ରହସ୍ୟ ଘରରେ । ତେବେ, ସବୁଠୁ ବଡ଼ କଥା ହେଉଛି ଗିରଫ ସଚିନ ବାଜେ ଓ ମୃତ ସ୍କର୍ପିଓ ମାଲିକ ମନସୁଖ ହିରନ ଉଭୟ ଥାନେର ।
୧୭ ଫେବ୍ରୁଆରୀରେ ସଚିନଙ୍କ ପାଖରୁ ଚୋରି ହୋଇଥିଲା କି ଏହି ସ୍କର୍ପିଓ ? ଏବେ ଏନଆଇ ଏଧିକାରୀ ଏହାର ତଦନ୍ତ କରୁଛନ୍ତି । ସଚିନଙ୍କ ବାଜେଙ୍କ ଘର ବାହାରେ ଲାଗିଥିବା ସିସିଟଭି ଫୁଟେଜରୁ କାରକୁ ଖୋଜୁଛି ନ୍ୟାସନାଲ ତଦନ୍ତକାରୀ ସଂସ୍ଥା NIA ।
