ସହାନୁଭୂତି ଆଶାରେ ଡ୍ରାମା କରୁଛନ୍ତି ମମତା: ବିଜେପି

ପଶ୍ଚିମବଙ୍ଗରେ ଚରମ ସୀମାରେ ପହଞ୍ଚିଛି ରାଜନୀତି ତାତି । ନନ୍ଦିଗ୍ରାମରୁ ନିର୍ବାଚନୀ ପ୍ରଚାର ସାରି ଫେରୁଥିବା ବେଳେ ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କୁ ଆକ୍ରମଣ କରାଯିବା ଘଟଣା ରାଜନୀତିକୁ ଆହୁରି ସରଗରମ କରିଛି । ଆକ୍ରମଣରେ ମମତା ଆହତ ହୋଇ SSKM ମେଡିକାଲରେ ଭର୍ତ୍ତି ହୋଇଥିବା ବେଳେ ସହାନୁଭୂତି ପାଇବା ଆଶାରେ ମମତା ଡ୍ରାମା କରୁଛନ୍ତି ବୋଲି କହିଛି ବିଜେପି ।

ସେପଟେ ମମତାଙ୍କୁ ଆକ୍ରମଣ ଯୋଗୁ ଟିଏମ୍ସି ଦଳୀୟ ଇସ୍ତାହାର ଉନ୍ମୋଚନ ସ୍ଥଗିତ କରିଛି । ଆଜି ଦଳ ପକ୍ଷରୁ ମେନିଫେଷ୍ଟୋ ରିଲିଜ୍ ହେବାର କାର୍ଯ୍ୟକ୍ରମ ସ୍ଥିର ହୋଇଥିଲା । ହେଲେ ମମତା ଅସୁସ୍ଥ ଥିବାରୁ ଏହାକୁ ସ୍ଥଗିତ ରଖାଯାଇଛି । ଅନ୍ୟକୌଣସି ତାରିଖ ଏ ପର୍ଯ୍ୟନ୍ତ ସ୍ଥିର କରାଯାଇ ନ ଥିବା ବେଳେ ମମତା ସୁସ୍ଥ ହେବା ପରେ ଏ ନେଇ ନିଷ୍ପତ୍ତି ନିଆଯିବ।

ଅନ୍ୟପଟେ SSKM ହସ୍ପିଟାଲ ବାହାରେ ଟିଏମସି ସମର୍ଥକମାନେ ନାବାରାଜି କରିବା ସହ ଦୋଷୀ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ପାଇଁ ଦାବି କରିଛନ୍ତି। ଆକ୍ରମଣ ସମୟରେ ନନ୍ଦିଗ୍ରାମର ବାରୁଲିଆ ବଜାରରେ ସ୍ଥାନୀୟ ପୋଲିସ ଅଧିକାରୀ ନଥିବା ମମତା ଅଭିଯୋଗ କରିଛନ୍ତି।

ମମତାଙ୍କୁ ଆକ୍ରମଣ ଘଟଣାକୁ ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲ, ଅଖିଳେଶ ୟାଦବ, ତେଜସ୍ୱୀ ଯାଦବ ପ୍ରମୁଖ ନିନ୍ଦା କରିଛନ୍ତି । ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ମଧ୍ୟ ମମତାଙ୍କ ଆଶୁଆରୋଗ୍ୟ କାମନାକରିଛନ୍ତି। ଘଟଣାର ଉଚ୍ଚସ୍ତରୀୟ ତଦନ୍ତ ଦାବି କରିଛନ୍ତି ଅଖିଳେଶ । ହେଲେ ମମତା ଡ୍ରାମା କରୁଛନ୍ତି ବୋଲି କହିଛି ବିଜେପି।