ତୈଳଦର ବୃଦ୍ଧି ନେଇ ଧର୍ମେନ୍ଦ୍ର ପ୍ରତିକ୍ରିୟା, ‘ଅର୍ଥମନ୍ତ୍ରୀ ବାହାର କରିବେ ବାଟ’

ଭୁବନେଶ୍ୱର(ସୁଶାନ୍ତ କୁମାର ସାହୁ): ଦେଶର ଅନେକ ସହରରେ ଶତକ ମାରିଛି ପେଟ୍ରୋଲ । ଡିଜେଲ ଦର ବି ହୁହୁ ହୋଇ ବଢ଼ି ଚାଲିଛି । ଲଗାତାର ୧୨ ଦିନରେ ପେଟ୍ରୋଲ ଓ ଡିଜେଲ ଦର ବଢ଼ିବା ପରେ ଆଜି ସ୍ଥିର ରହିଛି । ରାଜ୍ୟର ସମସ୍ତ ଜିଲ୍ଲାରେ ପେଟ୍ରୋଲ ଲିଟର ପିଛା ୯୦ ଟଙ୍କା ଉପରେ ରହିଥିବା ବେଳେ ମାଲକାନଗିରିରେ ସର୍ବାଧିକ ୯୫ ଟଙ୍କା ୯୬ ପଇସା ରହିଛି । ତୈଳଦରରେ ଅହେତୁକ ବୃଦ୍ଧି ନେଇ ପ୍ରତିକ୍ରିୟା ରଖିଛନ୍ତି କେନ୍ଦ୍ର ପେଟ୍ରୋଲିୟମ୍ ମନ୍ତ୍ରୀ ଧର୍ମେନ୍ଦ୍ର ପ୍ରଧାନ ।

There are two main reasons behind fuel price rise. International market has reduced fuel production & manufacturing countries are producing less fuel to gain more profit. This is making the consumer countries suffer: Union Petroleum Minister Dharmendra Pradhan (1/4) pic.twitter.com/SA9u9RBkeb

— ANI (@ANI) February 21, 2021

ତୈଳଦର ବୃଦ୍ଧି ୨ଟି କାରଣ ଯୋଗୁଁ ହେଉଥିବା ଧର୍ମେନ୍ଦ୍ର କହିଛନ୍ତି । ଅନ୍ତର୍ଜାତୀୟ ବଜାରରେ ତୈଳର ଉତ୍ପାଦନ କମିବା ଓ ଉତ୍ପାଦନକାରୀ ଦେଶ ଅଧିକ ଲାଭ ପାଇଁ କମ୍ ତୈଳ ଉତ୍ପାଦନ କରୁଛନ୍ତି । ଫଳରେ ତୈଳ ଆମଦାନୀକାରୀ ଦେଶ ଅଧିକ ଦାମ ଦେବାକୁ ବାଧ୍ୟ ହେଉଛନ୍ତି । ଆମେ ଏନେଇ ଓପିଇସି ଓ ଓପିଇସି ପ୍ଲସ୍ ଦେଶକୁ ଅନୁରୋଧ କରିଛୁ । ଆଶା ରଖିଛୁ ନିକଟରେ କିଛି ପରିବର୍ତ୍ତନ ଆସିବ ।

ତୈଳଦର ବୃଦ୍ଧିର ଆଉ କାରଣ ମହାମାରୀ କୋଭିଡ୍ ବୋଲି ଧର୍ମେନ୍ଦ୍ର କହିଛନ୍ତି । ସରକାର ଅନେକ ଗୁଡ଼ିଏ ଉନ୍ନୟନମଳକ କାର୍ଯ୍ୟ କରୁଛନ୍ତି । ଯେଉଁଥିପାଇଁ ଉଭୟ କେନ୍ଦ୍ର ଓ ରାଜ୍ୟ ସରକାର ଟିକସ ଆଦାୟ କରୁଛନ୍ତି । ବିକାଶମୂଳକ କାର୍ଯ୍ୟରେ ଖର୍ଚ୍ଚ ଦ୍ୱାରା ଅଧିକ ନିଯୁକ୍ତି ସୃଷ୍ଟି ହେବ । ସରକାର ନିବେଶ ବଢ଼ାଇଥିବା ବେଳେ ଚଳିତ ବଜେଟରେ ୩୪ ପ୍ରତିଶତ ଅଧିକ ବ୍ୟୟ କରାଯିବ ବୋଲି କହିଛନ୍ତି ।

ଏଥିସହ ଖର୍ଚ୍ଚ ନେଇ ରାଜ୍ୟକୁ ତୀର ମାରିଛନ୍ତି ଧର୍ମେନ୍ଦ୍ର । ରାଜ୍ୟ ସରକାର ମଧ୍ୟ ଖର୍ଚ୍ଚ ବୃଦ୍ଧି କରିଛନ୍ତି । ସେଥିପାଇଁ ଆମକୁ ଟିକସ ଆବଶ୍ୟକତା ହେଉଛି । ଆଦାୟ ଟିକସ ଓ ଖର୍ଚ୍ଚ ମଧ୍ୟରେ ସନ୍ତୁଳନ ଆବଶ୍ୟକ । ମୁଁ ଆଶା କରୁଛି ଅର୍ଥମନ୍ତ୍ରୀ ନିର୍ମଳା ସୀତାରମଣ ଏହାକୁ ନେଇ କୌଣସି ଏକ ବାଟ ବାହାର କରିବେ ବୋଲି ଧର୍ମେନ୍ଦ୍ର କହିଛନ୍ତି ।

ଏଥିସହ ପଢ଼ନ୍ତୁ- ୧୧ ବର୍ଷ ମଧ୍ୟରେ ୨୦୦ ପ୍ରତିଶତ ବଢ଼ିଛି ପେଟ୍ରୋଲ ଦର