କର୍ଲାପାଟ ଅଭୟାରଣ୍ୟରେ ହାତୀ ମଡ଼କ, ୧୨ ଦିନରେ ୪ ହାତୀ ମୃତ

କଳାହାଣ୍ଡି: ବିପଦରେ ଗଜରାଜ । ଗଡ଼ୁଛି ଗୋଟିଏ ପରେ ଗୋଟିଏ ମୁଣ୍ଡ । କଳାହାଣ୍ଡି କର୍ଲାପାଟ ଅଭୟାରଣ୍ୟରେ ଗତ ୧୨ ଦିନ ମଧ୍ୟରେ ଏଭଳି ଭାବେ ୪ ହାତୀଙ୍କର ମୃତ୍ୟୁ ହୋଇଛି । ମୃତ୍ୟୁବରଣ କରିଥିବା ୪ଟି ଯାକ ମାଈହାତୀ ବୋଲି ଜଣାପଡ଼ିଛି । ସେମାନଙ୍କ ମଧ୍ୟରୁ ଗୋଟିଏ ହାତୀ ଗର୍ଭବତୀ ଥିଲା ବୋଲି ଡିଏଫ୍ଓ ଦକ୍ଷିଣ ବନଖଣ୍ଡ ଟି.ଅଶୋକ କୁମାର ସୂଚନା ଦେଇଛନ୍ତି ।

ଦକ୍ଷିଣ ବନଖଣ୍ଡ କର୍ଲାପାଟ ଅଭୟାରଣ୍ୟର ଘୁଷୁରିଗୁଡ଼ି ଝରଣା ନିକଟରୁ ଆଜି ଆଉ ଏକ ମାଈହାତୀର ମୃତଦେହ ଉଦ୍ଧାର ହୋଇଛି । ଦକ୍ଷିଣ ବନଖଣ୍ଡ ଡିଏଫଓ ଘଟଣାସ୍ଥଳକୁ ଯାଇ ତଦନ୍ତ କରିଛନ୍ତି । ଏହାସହ ସାଇଣ୍ଟିଫିକ୍ ଓ ବନ୍ୟପ୍ରାଣୀ ପଶୁସମ୍ପଦ ବିଭାଗର କର୍ମଚାରୀ ମୃତହାତୀର ଶବ ବ୍ୟବଛେଦ କରିଛନ୍ତି । ତେବେ ହାତୀ ମୃତ୍ଯୁ ପଛର କାରଣ ଜଣାପଡ଼ିନାହିଁ । ଶବ ବ୍ୟବଛେଦ ରିପୋର୍ଟ ଆସିବା ପରେ ପ୍ରକୃତ କାରଣ ଜଣାପଡ଼ିବ ବୋଲି ଦକ୍ଷିଣ ବନାଞ୍ଚଳ ଡିଏଫଓ ସୂଚନା ଦେଇଛନ୍ତି ।

ସୂଚନାଯୋଗ୍ୟ- ଚଳିତ ମାସ ୧ ତାରିଖରେ ପ୍ରଥମେ ଗୋଟିଏ ହାତୀ ପରେ ୮ ତାରିଖରେ ଆଉ ଗୋଟିଏ ଏମିତି ୧୨ ଦିନ ଭିତରେ ୪ଗୋଟି ହାତୀର ମୃତ୍ୟୁ ହୋଇଛି । ଯାହାକି ଚିନ୍ତାର ବିଷୟ ପାଲଟିଛି । ଭୁତାଣୁ ଜନିତ ହେମରେଜ ସେପ୍ଟିସେମିଆ ରୋଗରେ ହାତୀଙ୍କ ମୃତ୍ୟୁ ହେଉଥିବା ପ୍ରାଥମିକ ତଦନ୍ତରୁ ଜଣାପଡ଼ିଥିବା ଡିଏଫଓ କହିଛନ୍ତି ।