ରାଜ୍ୟ ବଜେଟର ରୂପରେଖ କଣ ହେବ, କେଉଁ କ୍ଷେତ୍ରକୁ ଗୁରୁତ୍ୱ ଦେବେ ରାଜ୍ୟ ସରକାର ?

ଭୁବନେଶ୍ୱର: ରାଜ୍ୟ ବଜେଟର ରୂପରେଖ କଣ ହେବ ? କେଉଁ କ୍ଷେତ୍ରକୁ ରାଜ୍ୟ ସରକାର ଗୁରୁତ୍ୱ ଦେବେ ? କରୋନା ମହାମାରୀରେ ଅର୍ଥନୀତି ବିଗିଡ଼ିଥିଲେ ମଧ ଏଥର ବଜେଟର ରୂପରେଖ ବୃଦ୍ଧି ପାଇବ । ଗତବର୍ଷ ବଜେଟର ଆକାର ୧ଲକ୍ଷ ୬୫ ହଜାର କୋଟି ହୋଇଥିବା ବେଳେ ଏଥର ତାହା ବୃଦ୍ଧି ପାଇଁ ୧ଲକ୍ଷ  ୭୫ହଜାର କୋଟି ହେବ ବୋଲି ଅନୁମାନ କରାଯାଉଛି। ଏଥର ବଜେଟରେ ସ୍ୱାସ୍ଥ୍ୟ, ଶିଳ୍ପ ଓ ଗମନାଗମନକୁ ରାଜ୍ୟ ସରକାର ଫୋକସ କରିବେ। ଚଳିତ ବର୍ଷ ବଜେଟ୍ ଚ୍ୟାଲେଞ୍ଜପୂର୍ଣ୍ଣ ହୋଇଥିବାରୁ ରାଜ୍ୟ ସରକାର ଏକ ଲୋକାଭିମୁଖୀ ବଜେଟ୍ ଆଣିବାକୁ ସବୁପ୍ରକାର ପ୍ରସ୍ତୁତି ସାରିଥିବା ଶାସକ ଦଳ କହିଛି।

କେନ୍ଦ୍ର ବଜେଟରେ ରାଜ୍ୟର ଅଂଶ କମିବା ସହ ଟିକସ ହାର ମଧ୍ୟ କମିଛି। ଏଭଳି ସ୍ଥିତିରେ ରାଜ୍ୟ ଲୋକାଭିମୁଖୀ ଯୋଜନା ପାଇଁ ଅଧିକ ବ୍ୟୟ ବରାଦ କରିବା, ବିଶେଷ କରି ସ୍ୱାସ୍ଥ୍ୟ କ୍ଷେତ୍ରକୁ ଅଧିକ ଗୁରୁତ୍ୱ ଦେବା ଆବଶ୍ୟକ ବୋଲି ପୂର୍ବତନ ଅର୍ଥମନ୍ତ୍ରୀ ପଞ୍ଚାନନ କାନୁନଗୋ କହିଛନ୍ତି। ସେପଟେ ବିରୋଧୀ ଦଳ ନେତା କହିଛନ୍ତି ଯେ, ବଜେଟରେ ଏଥର ସ୍ୱାସ୍ଥ୍ୟକୁ ଗୁରୁତ୍ୱ ଦିଆଯିବା ଉଚିତ।

ଆସନ୍ତା ୨୨ ତାରିଖ ଦିନ ଅର୍ଥମନ୍ତ୍ରୀ ନିରଞ୍ଜନ ପୁଜାରୀ ବଜେଟ୍ ଉପସ୍ଥାପନ କରିବେ। ତେବେ କେନ୍ଦ୍ର ବଜେଟରେ ଓଡ଼ିଶା ଯାହା ଆଶା କରିଥିଲା ତାହା ମିଳିନାହିଁ। କରୋନା ଓ ଆର୍ଥିକ ମାନ୍ଦାବସ୍ତା ସତ୍ୱେ ରାଜ୍ୟ ରାଜସ୍ୱ ବୃଦ୍ଧି ପାଇଛି। ତେଣୁ ଏଥର ବଜେଟ୍ ଲୋକାଭିମୁଖୀ କରିବା ଦିଗରେ ସରକାର ଗୁରୁତ୍ୱ ଦେଇଛନ୍ତି। ବଜେଟକୁ ନେଇ ପୂର୍ବରୁ ଅର୍ଥ ବିଭାଗ ପୂର୍ବତନ ଅର୍ଥମନ୍ତ୍ରୀ, ଅର୍ଥନୈତିକ ବିଶେଷଜ୍ଞ ଓ ସାଧାରଣ ଲୋକଙ୍କର ମତାମତ ଗ୍ରହଣ କରିଛନ୍ତି।