ଭୁବନେଶ୍ୱର: ଆଉ ରହିବନି ଟ୍ରାଫିକ ଜାମ ସମସ୍ୟା। ତ୍ୱରାନ୍ୱିତ ହେଲା ନନ୍ଦନକାନନ-ଜୟଦେବ ବିହାର ରାସ୍ତା କାମ। ୨ଶହ ଫୁଟିଆ ରାସ୍ତା ପାଇଁ ବସ୍ତି ଲୋକଙ୍କ ଥଇଥାନ ଥିଲା ବାଧକ। ମୁଖ୍ୟ ଶାସନ ସଚିବଙ୍କ ହସ୍ତକ୍ଷେପ ପରେ ଫିଟିଲା ବାଟ। ପର୍ଯ୍ୟାୟ କ୍ରମେ ଥଇଥାନ ହେବେ ୧୮୧ପରିବାର। ନନ୍ଦନକାନନରୁ ଶିଖରଚଣ୍ଡୀ ପାହାଡ, ନିଳାଦ୍ରୀବିହାର ଓ ସାଲିଆ ସାହି ଦେଇ ଜାଭିଅର ଛକକୁ ସଂଯୋଗ କରିବ ଏହି ରାସ୍ତା। ରାସ୍ତା ନିର୍ମାଣ କାର୍ଯ୍ୟ ଆରମ୍ଭ ହୋଇଥିବା ବେଳେ ପ୍ରକଳ୍ପ ଯୋଗୁଁ ପ୍ରଭାବିତ ହେଉଥିବା ଲୋକଙ୍କ ପାଇଁ ଅଟକି ରହିଥିଲା ଏହି କାର୍ଯ୍ୟ।
ତେବେ ପ୍ରକଳ୍ପର ଗୁରୁତ୍ୱ ଦୃଷ୍ଟିରୁ ଖୋଦ ସ୍ଥିତି ସମୀକ୍ଷା କରିଛନ୍ତି ମୁଖ୍ୟ ଶାସନ ସଚିବ ସୁରେଶ ମହାପାତ୍ର। ରୋଡ଼ ମ୍ୟାପକୁ ଅନୁଧ୍ୟାନ କରିବା ସହ ବିଏମସି କମିଶନର, ଜୋନାଲ ଡେପୁଟି କମିଶନର ସ୍ଥାନୀୟ ପ୍ରତିନିଧିଙ୍କ ସହ ମଧ୍ୟ ଆଲୋଚନା କରିଛନ୍ତି। କ୍ଷତିଗ୍ରସ୍ତଙ୍କ ଦାବି ସମ୍ପର୍କରେ ବିସ୍ତୃତ ଆଲୋଚନା ପରେ ଫିଟିଛି ବାଟ। ୨୦ଦିନ ଭିତରେ ବସ୍ତି ଉଛେଦ କରାଯାଇ ରାସ୍ତା କାମ ଆରମ୍ଭ କରାଯିବ ବୋଲି କହିଛନ୍ତି ବିଏମସି କମିଶନର।
ବୀର ବିର୍ସା ଓ ଲକ୍ଷ୍ମୀପୁର ସାନ୍ତାଳ ବସ୍ତି ଦେଇ ରାସ୍ତା ଯାଉଥିବାରୁ ଏହାକୁ ବିରୋଧ କରିଥିଲେ ସ୍ଥାନୀୟ ଲୋକେ। ତେବେ ପର୍ଯ୍ୟାୟକ୍ରମେ ପ୍ରଥମେ ଅସ୍ଥାୟୀ ଓ ପରେ ଆବାସ ଯୋଜନାରେ ପକ୍କା ଗୃହ ଯୋଗାଇଦେବାକୁ ସେମାନଙ୍କୁ ପ୍ରତିଶ୍ରୁ ମିଳିଛି। ଘର ନିର୍ମାଣ ପାଇଁ ସରକାରୀ ଜମି ସହ ରାଜୀବ ଆବାସ ଯୋଜନାରେ ସାମିଲ ହୋଇଥିବା ଲୋକଙ୍କୁ ୩୫ ହଜାର ଟଙ୍କା ଓ ଅନ୍ୟ ଲୋକଙ୍କୁ ୨୫ ହଜାର ଟଙ୍କା ଆର୍ଥିକ ସହାୟତା ଦିଆଯିବାକୁ ପ୍ରତିଶୃତି ଦିଆଯିବା ପରେ ଉଛେଦ କରାଯାଇଛି। ଏହି ସୁଦୀର୍ଘ ରାସ୍ତା ଟ୍ରାଫିକ୍ ସମସ୍ୟ ଦୂର କରିବା ସହ ସ୍ମାର୍ଟ ସିଟିର ଲୋକଙ୍କ ଦୀର୍ଘଦିନର ଦୁଃଖ ଦୂର କରିବାରେ ସହାୟକ ହେବ।
