ବିଟକଏନ୍ ଉପରେ ଲାଗିବ ପ୍ରତିବନ୍ଧକ,ସରକାର ଆଣିବେ ନିଜ କ୍ରିପ୍ଟୋ କରେନ୍ସି

ନୂଆଦିଲ୍ଲୀ: ଡିଜିଟାଲ କରେନ୍ସି ବା କ୍ରିପ୍ଚୋ କରେନ୍ସି ଭାବେ ଦୁନିଆରେ ବିଟ୍ କଏନର ରାଜ୍ ଚାଲିଛି । କିନ୍ତୁ କେନ୍ଦ୍ର ସରକାର ଦେଶରେ ବିଟ୍ କଏନ୍ ସହିତ ଅନ୍ୟାନ୍ୟ କ୍ରିପ୍ଟୋ କରେନ୍ସିକୁ ବ୍ୟାନ୍ କରିବାକୁ ଯାଉଛନ୍ତି । ବଜେଟ୍ ଅଧିବେଶନରେ କ୍ରିପ୍ଟୋ କରେନ୍ସି ଉପରେ ପ୍ରତିବନ୍ଧକ ଲଗାଇବା ପାଇଁ ଏକ ବିଲ୍ ସଂସଦରେ ଆସିପାରେ । ଯଦି ଏହି ବିଧେୟକ ସଂସଦରେ ଗୃହିତ ହୁଏ ତେବେ ସବୁଦିନ ପାଇଁ ବିଟ୍ କଏନ ଭାରତରେ ପ୍ରତିବନ୍ଧିତ ହେବ । ଅନ୍ୟପକ୍ଷରେ ସରକାର ଟଙ୍କାର ଡିଜିଟାଲ କରେନ୍ସି ଆଣିବାକୁ ପ୍ରସ୍ତୁତି ଆରମ୍ଭ କରିଛନ୍ତି ।

ଶୁକ୍ରବାର ଦିନ ଆରମ୍ଭ ହୋଇଥିବା ବଜେଟ ଅଧିବେଶନରେ ସରକାର ଭାରତରେ ବିଟ୍ କଏନ୍, ଇଥର ଓ ରିପଲ ଭଳି ସବୁ କ୍ରିପ୍ଟୋକରେନ୍ସିକୁ ପ୍ରତିବନ୍ଧିତ କରୁଥିବା ବିଲକୁ ସୂଚିବଦ୍ଧ କରିଛନ୍ତି । ବିଧେୟକରେ ଆଧିକାରିକ ଡିଜିଟାଲ ମୁଦ୍ରାର ବୈଧାନିକ ଢାଂଚାର ନିର୍ମାଣ ପାଇଁ ପ୍ରାବଧାନ ରହିଛି । ଅର୍ଥାତ ସରକାର ନିଜର ଡିଜିଟାଲ କରେନ୍ସି ଆଣିବା ପାଇଁ ଆଇନଗତ ରାସ୍ତା ତିଆରି କରୁଛନ୍ତି ।ଏହାପୂର୍ବରୁ ଜାନୁଆରୀ ୨୫ ତାରିଖରେ ରିଜର୍ଭ ବ୍ୟାଙ୍କ୍ ଏକ ବୁକଲେଟରେ ଟଙ୍କାର ଡିଜିଟାଲ ସଂସ୍କରରଣ କଥା ଉଲ୍ଲେଖ କରିଥିଲା । ଆରବିଆଇ ଏହା ଜାଣିବା ପାଇଁ ଉଦ୍ୟମ କରୁଛି ଯେ, ଟଙ୍କାର ଡିଜିଟାଲ ଏଡିସନ କେତେ ଉପଯୋଗୀ ହେବ ଓ ଏହାଦ୍ୱାରା କେତେ ଲାଭ ମିଳିବ ।

ଆରବିଆଇର ବୁକଲେଟରେ କୁହାଯାଇଛି ଯେ, ବିଟ୍ କଏନ ଭଳି ବେସରକାରୀ ଡିଜିଟାଲ ମୁଦ୍ରା ବିଗତ ବର୍ଷରେ ଲୋକପ୍ରିୟତା ହାସଲ କରିଛି । ଭାରତରେ ନିୟନ୍ତ୍ରକ ଓ ସରକାରା କିନ୍ତୁ ବିଟ କଏନ ଭଳି ଡିଜିଟାଲ କରେନ୍ସୀକୁ ନେଇ ସମ୍ପୂର୍ଣ୍ଣ ଆଶ୍ୱସ୍ତ ନୁହନ୍ତି । ଏଭଳି ମୁଦ୍ରା ପଟୁ ଥିବା ବିପଦକୁ ନେଇ ଆରବିଆଇ ଆଶଙ୍କିତ ଅଛି । ତଥାପି ଆରବିଆଇ ଡଜିଟାଲ କରେନ୍ସିର ସମ୍ଭାବନାକୁ ନେଇ ଅଧିକ ଅଧ୍ୟୟନ କରୁଛି । ନୋଟରେ କୁହାଯାଇଛି ଯେ, ଯଦି ଦେଶ ଡିଜିଟାଲ କରେନ୍ସୀ ଆବଶ୍ୟକ କରୁଛି ତେବେ ଏହାକୁ କେମିତି ଚାଲୁ କରାଯିବ?
୨୦୧୮ରେ କ୍ରିପ୍ଟୋକରେନ୍ସି ପାଇଁ ଲେଣଦେଶ ଉପରେ ଆରବିଆଇ ପ୍ରତିବନ୍ଧକ ଲାଗୁ କରିଥିଲା ।

ଦୁଇ ବର୍ଷ ହେଲା ପ୍ରସ୍ତୁତ ହୋଇଛି ବିଲ୍
୨୦୧୯ରେ କ୍ରିପ୍ଟୋକେରନ୍ସି ଉପରେ ଏକ ସରକାରୀ ବିଲରେ କ୍ରିପ୍ଟୋକରେନ୍ସି ଉପରେ ପ୍ରତିବନ୍ଧକ ଓ ଭାରତରେ ଏହାର ଉପଯୋଗକୁ ଅପରାଧିକ ମାମଲା ଭାବେ ବିବେଚନା କରିବା କଥା ଥିବା କୁହାଯାଉଥିଲା । ତେବେ ଏହି ବିଲ ସଂସଦକୁ ଆସିନଥିଲା । ଗତ ଏକ ବର୍ଷ ମଧ୍ୟରେ ଭାରତରେ କ୍ରିପ୍ଟୋକରେନ୍ସୀ ନିବେଶକଙ୍କ ସଂଖ୍ୟା ବୃଦ୍ଧି ପାଇଛି । CoinDCX ଓ Coinswitch Kuber ଭଳି କ୍ରିପ୍ଟୋ କରେନ୍ସୀ ଏକ୍ସଚେଂଜ ଏଥିପାଇଁ ଫଣ୍ଡ୍ ମଧ୍ୟ ଯୋଗାଡ କରିଛନ୍ତି । ଯଦି ଏହି ବିଲ୍ ସଂସଦ ଦ୍ୱାରା ଗୃହିତ ହୁଏ ତେବେ ଭାରତରେ ନୂଆ କରି ମୁଣ୍ଡ ଟେକୁଥିବା କ୍ରିପ୍ଟୋକରେନ୍ସୀ ମାର୍କେଟର ଅନ୍ତ ହେବ ।