ସୁନ୍ଦରଗଡ଼ ଜିଲ୍ଲା ଗସ୍ତରେ କ୍ରୀଡ଼ାମନ୍ତ୍ରୀ, ୧୭ ବ୍ଲକରେ ନିର୍ମାଣ ହେବ ଆଷ୍ଟ୍ରୋ ଟର୍ଫ

ରାଉରକେଲା: କେବଳ ରାଉରକେଲା ସହର ନୁହେଁ ସୁନ୍ଦରଗଡ଼ ଜିଲ୍ଲାର ପ୍ରତି ବ୍ଲକକୁ ଦିଆଯିବ ଗୁରୁତ୍ୱ । ରାଉରକେଲା ସହରରେ ଦେଶର ସର୍ବବୃହତ୍ତ ହକି ଷ୍ଟାଡିୟମ୍ ନିର୍ମାଣ ସହ ସୁନ୍ଦରଗଡ଼ ଜିଲ୍ଲାର ୧୭ଚି ବ୍ଲକରେ ନିର୍ମାଣ ହେବ ଆଷ୍ଟ୍ରୋ ଟର୍ଫ । ହକିର ଏନ୍ତୁଡ଼ିଶାଳ ସୁନ୍ଦରଗଡ଼ ଜିଲ୍ଲା ଗସ୍ତ କରି ଆଷ୍ଟ୍ରୋ ଟର୍ଫ ନିର୍ମାଣ କାର୍ଯ୍ୟ ଆରମ୍ଭ ପାଇଁ ସ୍ଥିତି ଅନୁଧ୍ୟାନ କରିଛନ୍ତି କ୍ରୀଡ଼ାମନ୍ତ୍ରୀ ତୁଷାରକାନ୍ତି ବେହେରା ।

ସୁନ୍ଦରଗଡ଼ ଜିଲ୍ଲାର ସମସ୍ତ ୧୭ଟି ବ୍ଲକରେ ଆଷ୍ଟ୍ରୋଟର୍ଫ ନିର୍ମାଣ ହେବ । ଆସନ୍ତା ୬ରୁ ୮ ମାସ ମଧ୍ୟରେ ଆଷ୍ଟ୍ରୋ ଟର୍ଫ ନିର୍ମାଣ କାର୍ଯ୍ୟ ଶେଷ ହେବ ବୋଲି ମନ୍ତ୍ରୀ ତୁଷାରକାନ୍ତି ବେହେରା ସୂଚନା ଦେଇଛନ୍ତି । ତିନିଦିନିଆ ସୁନ୍ଦରଗଡ଼ ଜିଲ୍ଲା ଗସ୍ତରେ ଆସି କ୍ରୀଡ଼ାମନ୍ତ୍ରୀ ହକି ଖେଳାଳିଙ୍କ ସହ ମଧ୍ୟ ଆଲୋଚନା କରିଛନ୍ତି । ଜିଲ୍ଲାର ପ୍ରଶାସନିକ ଅଧିକାରୀ ଓ ଜିଲ୍ଲା କ୍ରୀଡ଼ା ଅଧିକାରୀଙ୍କ ସହିତ ବିଭିନ୍ନ ବ୍ଲକ ଅଞ୍ଚଳ ଗସ୍ତ କରିଛନ୍ତି ।

ରାଉରକେଲାରେ ହକି ବିଶ୍ୱକପ୍-୨୦୨୩  ହେବ ବୋଲି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଘୋଷଣା କରିଥିଲେ । ଏଥିପାଇଁ ରାଉରକେଲାରେ ୨୦ ହଜାର ଦର୍ଶକ ବସିବା କ୍ଷମତା ଥିବା ଷ୍ଟାଡିୟମ୍ ନିର୍ମାଣ ନେଇ ମୁଖ୍ୟମନ୍ତ୍ରୀ ଘୋଷଣା କରିଥିଲେ ।