ବେଜିଂ: ଦୀର୍ଘ ଦିନ ପରେ ସାମ୍ନାକୁ ଆସିଲେ ଆଲିବାବା ଓ ଆଣ୍ଟ ଗ୍ରୁପର ସହ-ପ୍ରତିଷ୍ଠାତା ତଥା ଚାଇନାର ଶିଳ୍ପପତି ଜ୍ୟାକ୍ ମା । ଦୀର୍ଘ ଦିନର ବ୍ୟବଧାନ ପରେ ସାର୍ବଜନୀନ ଭାବେ ସର୍ବସମ୍ମୁଖରେ ଉପସ୍ଥିତ ହୋଇଛନ୍ତି ଜ୍ୟାକ୍ ମା । ଆଜି ଏକ ଅନଲାଇନ୍ ସମ୍ମିଳନୀରେ ଜ୍ୟାକ୍ ମା ଶିକ୍ଷକମାନଙ୍କୁ ସମ୍ବୋଧିତ କରୁଥିବା ଦେଖିବାକୁ ମିଳିଛି ।
ଗ୍ରାମୀଣ ଶିକ୍ଷାର ସଫଳତା ସହିତ ଜଡିତ ବାର୍ଷିକ ଇଭେଣ୍ଟର ଏକ କାର୍ଯ୍ୟକ୍ରମରେ ଭିଡିଓ କନଫରେନ୍ସି ଜରିଆରେ ଜ୍ୟାକ୍ ମା ଉଦବୋଧନ ଦେଉଥିବା ଦେଖିବାକୁ ମିଳିଛି। ତାଙ୍କ କମ୍ପାନୀ ଉପରେ ଚୀନ୍ ସରକାରଙ୍କ ପକ୍ଷରୁ ଚାଲିଥିବା ଅନୁସନ୍ଧାନ ସହ ତାଙ୍କ ଭବିଷ୍ୟତ ନେଇ ଅନେକ ଆଲୋଚନା ହେଉଥିଲା । କିନ୍ତୁ କାର୍ଯ୍ୟକ୍ରମରେ ଜ୍ୟାକ୍ ମା’ଙ୍କ ଆବିର୍ଭାବ ସମସ୍ତଙ୍କୁ ଚକିତ କରିଦେଇଛି।
ଚୀନର ତୃତୀୟ ଧନୀ ଓ ଦୁନିଆର ଲକ୍ଷାଧିକଙ୍କ ପ୍ରେରଣା ଜ୍ୟାକ୍ ମା ଦୁଇମାସ ହେବ ଗାୟବ ଥିଲେ । ତେବେ ଅକ୍ଟୋବର ମାସରେ ଚୀନର ଷ୍ଟକ୍ ମାର୍କେଟ୍ ଓ ସରକାରୀ ବ୍ୟାଙ୍କ ନୀତିକୁ ସମାଲୋଚନା କରି ଜ୍ୟାକ୍ ସାଙ୍ଘାଇରେ ଭାଷଣ ଦେଇଥିଲେ। ଯାହାକୁ ନେଇ ତାଙ୍କର ପରେ ରାଷ୍ଟ୍ରପତି ସି ଜିନପିଙ୍ଗଙ୍କ ସହିତ ବିବାଦ ହୋଇଥିଲା। ଏହାପରଠାରୁ ଜ୍ୟାକଙ୍କ ପତା ମିଳୁନଥିଲା। । ତେଣୁ, ସରକାରଙ୍କ ଉପରେ ପ୍ରଶ୍ନ ଉଠାଇଥିବାରୁ ତାଙ୍କୁ ଗୃହବନ୍ଦୀ କରି ରଖାଯାଇଥିବା ଚର୍ଚ୍ଚା ଆରମ୍ଭ ହୋଇଥିଲା। ବିଭିନ୍ନ ରାଷ୍ଟ୍ର ଜ୍ୟାକ୍ ମାଙ୍କ ଅନ୍ତର୍ଧ୍ୟାନ ପଛରେ ଚାଇନାର ହାତଥିବା କହିଥିଲେ। ଗତ ଅକ୍ଟୋବର ୧୦ରେ ଜ୍ୟାକ୍ ମା’ଙ୍କ ଶେଷ ଟ୍ୱିଟ୍ ଦେଖିବାକୁ ମିଳିଥିଲା ।
