ବିକାଶମୂଳକ କାମ ନେଇ ବିଜେଡିର ବଡ଼ ଯୋଜନା: ବିକାଶ ପହଞ୍ଚିବ ଘରେ ଘରେ

ଭୁବନେଶ୍ୱର: କଳାହାଣ୍ଡିରେ ମେଗା ପ୍ରକଳ୍ପ ଲୋକାର୍ପଣ, ଶିଳାନ୍ୟାସ ଓ ବିଜେଡିର ଭିନ୍ନ ଢଙ୍ଗର ସମାବେଶ ପରେ ଚିନ୍ତାରେ ବିରୋଧୀ । ଶାସକ ଦଳକୁ କାଉଣ୍ଟର କରିବା ପାଇଁ ବାଟ ପାଉନାହାନ୍ତି । ସେପଟେ କଳାହାଣ୍ଡି ପରି ବିଭିନ୍ନ ଜିଲ୍ଲାରେ ମେଗା ଇଭେଣ୍ଟ କରି ସିଙ୍ଗଲ ୱିଣ୍ଡୋ ବ୍ୟବସ୍ଥାରେ ମୁଖ୍ୟମନ୍ତ୍ରୀଙ୍କ ଦ୍ବାରା ଲୋକାର୍ପଣ ଓ ଶିଳାନ୍ୟାସ ପାଇଁ ବିଜେଡି ପ୍ରସ୍ତୁତ କରୁଛି । ସବୁ ଜିଲ୍ଲା ସ୍ତରରେ ବିଶାଳ କାର୍ଯ୍ୟକ୍ରମ କରି ଘରେଘରେ ନବୀନ ବ୍ରାଣ୍ଡ ପହଞ୍ଚାଇବାକୁ ଲକ୍ଷ୍ୟ ରଖିଛି ବିଜେଡି । ଯାହାକୁ ନେଇ ସରଗରମ ହୋଇଛି ରାଜ୍ୟ ରାଜନୀତି ।

ଲୋକପ୍ରିୟତାର ଶୀର୍ଷରେ ନବୀନ । ବିକାଶମୂଳକ କାମ ନେଇ ବିଜେଡିର ବଡ଼ ଯୋଜନା  । ଫୋକସରେ ନବୀନ ବ୍ରାଣ୍ଡ । ବିକାଶ ପହଞ୍ଚିବ ଘରେ ଘରେ  । ମେଗା ଇଭେଣ୍ଟକୁ ଓହ୍ଲାଇଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । କଳାହାଣ୍ଡିରୁ ଏହା ଆରମ୍ଭ ହୋଇଛି । ନବୀନ ବ୍ରାଣ୍ଡର ଲୋକପ୍ରିୟତାକୁ ଘରେ ଘରେ ପହଞ୍ଚାଇବା ପାଇଁ ବିଜେଡି ପ୍ରସ୍ତୁତ କରିଛି ବ୍ଳ୍ୟୁ-ପ୍ରିଣ୍ଟ । ରାଜ୍ୟ ସରକାରଙ୍କ  ବିଭିନ୍ନ ଜନକଲ୍ୟାଣ ଯୋଜନା ସହ ନବୀନ ବ୍ରାଣ୍ଡକୁ ପାଥେୟ କରି ଦଳ ଆଗକୁ ବଢ଼ିବ । ସବୁ ଜିଲ୍ଲାରେ ମେଗା ଇଭେଣ୍ଟ ପାଇଁ ଲକ୍ଷ୍ୟ ରଖିଛି ବିଜେଡି । ବିଶେଷକରି ପଞ୍ଚାୟତ ସ୍ତରରେ ଯେଉଁସବୁ ପ୍ରକଳ୍ପ ପାଇଁ ମୁଖ୍ୟମନ୍ତ୍ରୀ ଶିଳାନ୍ୟାସ କରିଥିଲେ, ସେସବୁ କାମ ଶେଷ କରି, ଲୋକଙ୍କ ପାଖରେ ପହଞ୍ଚାଇବା ପାଇଁ ଦଳ ଗୁରୁତ୍ବ ଦେଇଛି । ୨୧ବର୍ଷର ଶାସନରେ ମୁଖ୍ୟମନ୍ତ୍ରୀଙ୍କ ଲୋକପ୍ରିୟତା ଆଜି ବି ଶୀର୍ଷରେ ଅଛି ବୋଲି ବିଜେଡି ନେତାମାନେ କହିଛନ୍ତି  ।

ଏଥିସହିତ ପଢ଼ନ୍ତୁ: ସଫଳ ଟିକାକରଣ ପାଇଁ ମୁଖ୍ୟମନ୍ତ୍ରୀଙ୍କୁ ନିରଞ୍ଜନଙ୍କ ଧନ୍ୟବାଦ

ବିଜେଡିର ମେଗା ଇଭେଣ୍ଟ ଓ ନବୀନ ବ୍ରାଣ୍ଡକୁ ବିରୋଧୀ ସହଜରେ ହଜମ କରିପାରୁନାହାନ୍ତି । ନବୀନଙ୍କ ଲୋକପ୍ରିୟତା ଓ ସ୍ବଚ୍ଛ ଶାସନ ଯୋଗୁ ବିଜେଡି ଲଗାତାର ସ୍ଥିର ସରକାର ଗଢିବାରେ ସଫଳ ହୋଇଥିଲେ ମଧ୍ୟ, ଏନେଇ ବିଜେପି ବହୁ ପ୍ରଶ୍ନ ଉଠାଇଛି । ବିଜେପି କହିଛି, ନବୀନ ଓ ରାଜ୍ୟ ସରକାର ଅଲଗା ନୁହନ୍ତି । ଲୋକ ସବୁ ବୁଝିଲେଣି । ସେପଟେ କଂଗ୍ରେସ କହିଛି, ପଞ୍ଚାୟତ ଓ ପୌର ନିର୍ବାଚନ ପାଇଁ ବିଜେଡି ଏଭଳି ରାଜନୈତିକ ପରିବେଶ ଆରମ୍ଭ କରିଛି । କଂଗ୍ରେସ ମଧ୍ୟ ତା’ ରଣନୀତି ପ୍ରସ୍ତୁତ କରିସାରିଛି ବୋଲି କହିଛି । କରୋନା ଯୋଗୁ ଦୀର୍ଘ ୯ମାସ ଧରି ରାଜନୈତିକ କାର୍ଯ୍ୟକଳାପରେ ବ୍ରେକ୍‌ ଲାଗିଥିଲା । ଆଗକୁ ପଞ୍ଚାୟତ ଓ ପୌର ନିର୍ବାଚନ ଥିବାରୁ ସବୁଦଳ ଏବେ ସକ୍ରିୟ ହୋଇଛନ୍ତି । ଆଉ ଶାସକ ବିଜେଡି ଏହି ରେସ୍‌ରେ ବହୁ ଆଗରେ ଅଛି ।  ଯାହା ବିରୋଧୀଙ୍କୁ ଚିନ୍ତାରେ ପକାଇଛି  ।