ଢାବାରୁ ଧରାପଡ଼ିଲେ ୨ ବ୍ରାଉନ୍ ସୁଗର ବେପାରୀ
ଭୁବନେଶ୍ୱର: ସହରରେ ଜମୁଛି ଜହର ବେପାର । ପାନ ଦୋକାନରୁ ରାସ୍ତାକଡ଼ ଢାବା ରାଜଧାନୀର ସବୁଠି ମିଳୁଛି ବ୍ରାଉନ୍ ସୁଗର । ପୂର୍ବରୁ ରାଜଧାନୀର ଏକାଧିକ ସ୍ଥାନରୁ ବ୍ରାଉନ୍ ସୁଗର ଜବତ ହୋଇଥିବା ବେଳେ ଜାତୀୟ ରାଜପଥ କଡ଼ ଢାବାରୁ ମିଳିଛି । କମିଶନରେଟ୍ ପୋଲିସର ତମାଣ୍ଡୋ ଥାନା ଓ କ୍ୟୁଏଟି ଟିମକୁ ଚଢ଼ାଉ ବେଳେ ମିଳିଛି ସଫଳତା । ତମାଣ୍ଡୋ ଥାନା ଅନ୍ତର୍ଗତ ପାଟଶାଣୀ ଢାବାରୁ ରେଡ୍ ବେଳେ ୫୨୦ ଗ୍ରାମ୍ ବ୍ରାଉନ୍ ସୁଗର ମିଳିଛି । ମାମଲାରେ ୨ ଜଣଙ୍କୁ ଗିରଫ କରିଛି କ୍ୟୁଏଟି ।
୨ ଅଭିଯୁକ୍ତଙ୍କ ଠାରୁ ନଗଦ ୧୩ ହଜାର ୪୦୦ ଟଙ୍କା, ୨ଟି ବାଇକ୍, ୪ଟି ମୋବାଇଲ୍ ଜବତ କରାଯାଇଛି । ଗିରଫ ଅଭିଯୁକ୍ତ ଏସକେ ନସିମୁଦ୍ଦିନ ଘର ଜଳେଶ୍ୱରରେ ହୋଇଥିବା ବେଳେ ଅନ୍ୟ ଜଣେ ଅଭିଯୁକ୍ତ ଚିତ୍ତରଞ୍ଜନ ରାଉତରାୟର ଘର ରସୁଲଗଡ଼ରେ ।
ଜବତ ୫୨୦ ଗ୍ରାମ୍ ବ୍ରାଉନ୍ ସୁଗରର ମୂଲ୍ୟ ପ୍ରାୟ ୫୨ ଲକ୍ଷ ଟଙ୍କା ହେବ । ୨ ଅଭିଯୁକ୍ତଙ୍କ ବିରୋଧରେ ତମାଣ୍ଡୋ ଥାନାରେ ଏନଡିପିଏସ୍ ଆକ୍ଟରେ ମାମଲା ରୁଜୁ ହୋଇଥିବା ବେଳେ ଥାନାଅଧିକାରୀ ତଦନ୍ତ ଜାରି ରଖିଛନ୍ତି ।
