ପରୀ ପ୍ରସଙ୍ଗରେ ବିଜେପି ଉପରେ ବର୍ଷିଲେ ପିନାକୀ, କହିଲେ କେବଳ ମାଇଲେଜ୍ ନେବାକୁ ଚେଷ୍ଟା
1 min read
ଭୁବନେଶ୍ୱର: ପରୀ ପ୍ରସଙ୍ଗରେ ପ୍ରତିକ୍ରିୟା ରଖିଛନ୍ତି ବିଜେଡି ସାଂସଦ ପିନାକୀ ମିଶ୍ର । ବିଜେପିକୁ ଟାର୍ଗେଟ କରିବା ସହ ଆତ୍ମନିରୀକ୍ଷଣ କରିବାକୁ ଦେଇଛନ୍ତି ପରାମର୍ଶ । କହିଛନ୍ତି ପରୀ ହତ୍ୟା ପ୍ରସଙ୍ଗରେ ମାଇଲେଜ ନେବାକୁ ବିଜେପି ହୀନ ରାଜନୀତି କରୁଛି ।
SIT ତଦନ୍ତ ଚାଲିଛି । ହେଲେ ବିଜେପି ପରୀ ମାମଲାକୁ ରାଜନୀତିର ପଶାପାଲିକୁ ବାରମ୍ବାର ଟାଣି କଣ ଦର୍ଶାଇବାକୁ ଚାହୁଛି ବୋଲି ପିନାକୀ ପ୍ରଶ୍ନ କରିଛନ୍ତି । ସେ ଆହୁରି ମଧ୍ୟ କହିଛନ୍ତି, ବିଜେପି ଶାସିତ ରାଜ୍ୟରେ ଉନ୍ନାଓ ଓ ହାଥରସ୍ ଭଳି ଘଟଣା ଘଟିଲା । ସରକାରଙ୍କ ନିଷ୍କ୍ରିୟତା ପର୍ଦ୍ଦାଫାସ ହୋଇଯିବା ଭୟରେ ସେତେବେଳେ ଘଟଣାସ୍ଥଳକୁ ସାମ୍ବାଦିକ କିମ୍ବା ବିରୋଧୀ ରାଜନେତାଙ୍କୁ ଛାଡିନଥିଲା ବିଜେପି ସରକାର ।
ଏପରିକି ପୀଡିତାଙ୍କ ପରିବାରକୁ ଭେଟିବାକୁ ଯାଇ ରାହୁଲ ଗାନ୍ଧି ଓ ପ୍ରିୟଙ୍କା ଗାନ୍ଧୀ ଆକ୍ରମଣର ଶିକାର ହୋଇଥିଲେ । ମାତ୍ର ପରୀ ହତ୍ୟା ଘଟଣାରେ ନିଜ ଅଭିମୁଖ୍ୟ ବଦଳାଉଛି ବିଜେପି । ବାରମ୍ବାର ହୀନ ରାଜନୀତି କରି ଘଟଣାର ମୋଡ଼ ବଦଳାଇବାକୁ ପ୍ରୟାସ କରୁଛି । ବିଜେପିର ଏଭଳି ଦୋମୁହାଁ ନୀତିକୁ ନାପସନ୍ଦ କରିଛନ୍ତି ବିଜେଡି ସାଂସଦ ପିନାକୀ ମିଶ୍ର ।
