ଭୀମସାରରେ ପୁଣି ୭ ଜଣ ନର୍ସ କରୋନା ପଜିଟିଭ୍ ଚିହ୍ନଟ
ସମ୍ବଲପୁର: ଭୀମସାରରେ ପୁଣି କୋଭିଡ ଯୋଦ୍ଧାଙ୍କୁ କରୋନା । ନିକଟରେ ଭୀମସାର ଓପିଡି ବନ୍ଦ କରାଯାଇଥିଲା । ଡାକ୍ତର ଓ ନର୍ସ କରୋନା ସଂକ୍ରମିତ ହୋଇଥିବାରୁ ଏଭଳି ପଦକ୍ଷେପ ନିଆଯାଇଛି । ଜୁଲାଇ ୧୯ ତାରିଖ ପର୍ଯ୍ୟନ୍ତ ଓପିଡି ବନ୍ଦ ରହିବା ସହ ରୁଟିନ ସର୍ଜରୀ ମଧ୍ୟ ବନ୍ଦ ରହିବା ନେଇ ସୂଚନା ଦିଆଯାଇଥିଲା । କେବଳ ରେଫର ରୋଗୀଙ୍କୁ ଆଡମିସନ ଅନୁମତି ରହିଛି ।
ସବୁ ଷ୍ଟାଫ୍, ରୋଗୀ, ଆଟେଣ୍ଡାଣ୍ଟ ମାସ୍କ ବ୍ୟବହାର କରିବାକୁ ନିର୍ଦ୍ଦେଶ ହୋଇଛି । କେବଳ ଜରୁରୀକାଳୀନ ସ୍ୱାସ୍ଥ୍ୟସେବାର ଅନୁମତି ଦିଆଯାଇଥିଲା । ହେଲେ ଏବେ ପୁଣି ଭୀମସାରରେ ୭ ଜଣ ନର୍ସ କରୋନା ପଜିଟିଭ୍ ଚିହ୍ନଟ ହୋଇଛନ୍ତି । ଭୀମସାରରେ ମୋଟ୍ ୧୬ଜଣ କରୋନା ସଂକ୍ରମିତ ହେଲେଣି । ଭୀମସାରର କର୍କଟ ରୋଗ ବିଭାଗରରେ ଦୁଇ ଜଣ ରୋଗୀ କରୋନା ସଂକ୍ରମିତ ହେବା ପରେ ପରେ କରୋନା ରୋଗୀଙ୍କ ସଂଖ୍ୟା ବଢ଼ିବାରେ ଲାଗିଛି ।
ଆଜି ସଂକ୍ରମିତ ହୋଇଥିବା ୭ ଜଣ ନର୍ସଙ୍କ ମଧ୍ୟରେ ପୁଣି କର୍କଟ ରୋଗ ବିଭାଗର ଦୁଇ ଜଣ ନର୍ସ ସଂକ୍ରମିତ ହୋଇଥିବା ଜଣାପଡିଛି। ଏହା ଭିତରେ କର୍କଟ ରୋଗ ବିଭାଗର କରୋନା ସଂକ୍ରମିତଙ୍କ ସଂଖ୍ୟା ୬କୁ ବୃଦ୍ଧି ପାଇଛି।
ସେହିପରି ଭୀମସାରର କେନ୍ଦ୍ରୀୟ ଆଇସିୟୁର କରୋନା ସଂକ୍ରମିତଙ୍କ ସଂଖ୍ୟା ୯ରେ ପହଞ୍ଚିଛି। ବର୍ତ୍ତମାନ ସୁଦ୍ଧା ଅନେକ ନର୍ସ ,ଡାକ୍ତର କରୋନାରେ ରହିଥିବାବେଳେ ଏହାର ତାଲିକା ବୃଦ୍ଧି ପାଇବା ସମ୍ଭାବନା ରହିଛି। ଏନେଇ ଭୀମସାର କତ୍ତୃପକ୍ଷ ଚିନ୍ତାରେ ପଡିଛନ୍ତି ।
