ସାବଧାନ! ଆପଣଙ୍କ ଅଜାଣତରେ ମୋବାଇଲରୁ ଡାଟା ଚୋରି କରୁଛି ଏହି ୫ଟି ଆଣ୍ଡ୍ରଏଡ୍ ଆପ୍
ନନ୍ଦିଘୋଷ ବ୍ୟୁରୋ: ସାଇବର ଫ୍ରଡ ମାମଲା ଦିନକୁ ଦିନ ବୃଦ୍ଧି ପାଇବାରେ ଲାଗିଛି । ନୂଆ ନୂଆ ତରିକାରେ ସାଇବର ଠକ ଲୋକଙ୍କୁ ଚୂନ ଲଗାଉଛନ୍ତି । ଏବେ ଆଣ୍ଡ୍ରଏଡ ଆପ୍ ଲୋକଙ୍କୁ ଠକିବାର ନୂଆ ମାଧ୍ୟମ ସାଜିଛି । ଆଣ୍ଡ୍ରଏଡ ପ୍ଲାଟଫର୍ମରେ ୟୁଜର୍ସଙ୍କୁ ବିପୁଳ ମାତ୍ରାରେ ଆପ୍ ଡାଉନଲୋଡ ଏବଂ ବ୍ୟବହାର କରିବାର ବିକଳ୍ପ ମିଳିଥାଏ, ସେହି ଆପ୍ ଗୁଡିକ ସହାୟତାରେ ଭିନ୍ନ ଭିନ୍ନ ପ୍ରକାରର କାମ ଫୋନ ସହାୟତାରେ କରାଯାଇ ଥାଏ । ଅନେକ ଥର ଆପ୍ ଜରିଆରେ ୟୁଜର୍ସଙ୍କୁ କ୍ଷତି ପହଞ୍ଚାଇବାକୁ ଉଦ୍ୟମ କରାଯାଇଥାଏ । ପୁଣି ଗୋଟେଥର ଏପରି ଏକ ମାମଲା ସାମ୍ନାକୁ ଆସିଛି ।
ଗୁଗୁଲ ଏପରି ଆପଗୁଡ଼ିକୁ ପ୍ଲେ ଷ୍ଟୋରରୁ ହଟାଇବାକୁ ଲଗାତାର ଉଦ୍ୟମ ଜାରି ରଖିଛି । ଏହାରି ମଧ୍ୟରେ ଏବେ ପାଞ୍ଚଟି ବିପଦଜନ୍ନକ ଆପ୍ସ ଜରିଆରେ ଡାଟା ଚୋରିର ମାମଲା ସାମ୍ନାକୁ ଆସିଛି । ଆମଷ୍ଟର୍ଡାମ ସାଇବର ସୁରକ୍ଷା କମ୍ପାନୀ ଥ୍ରେଟ୍ ଫେବ୍ରିକ ପକ୍ଷରୁ ଚେତାବନୀ ଦିଆଯାଇଛି ଯେ ସାମାନ୍ୟ ଆପ୍ ଭଳି ଦେଖାଯାଉଥିବା ୫ଟି ଆଣ୍ଡ୍ରଏଡ ଆପ୍ ୟୁଜରଙ୍କ ଅଜାଣତରେ ସେମାନଙ୍କ ଡାଟା ଚୋରି କରୁଛି ।
ଟ୍ରୋଜନ ମାଲୱେୟାର ଆଧିରିତ ଏହି ଡ୍ରପର ଆପ୍ସ ୟୁଜରଙ୍କ ଲଗଇନ୍ ଇନଫର୍ମେସନ, ଆକାଉଣ୍ଟ ନମ୍ବର ଏବଂ ବ୍ୟାଙ୍କ ସହ ସମ୍ବନ୍ଧିତ ସୂଚନା ୟୁଜର୍ସଙ୍କ ଅଜାଣତାରେ ଚୋରାଇବାରେ ସକ୍ଷମ । ଏହି ଆପ୍ ପ୍ରଡକ୍ଟିଭିଟି ଫଙ୍କ୍ସନ ଦେଉଥିବା ଦାବି କରିଥାଏ । ମାଲୱେର ଡ୍ରପର ଆପ୍ ନିକଟ ଦିନରେ ସ୍କାମର୍ସଙ୍କ ପକ୍ଷରୁ ବହୁଳ ବ୍ୟବହାର କରାଯାଉଛି ଏବଂ ଏହା ସିଧାସଳଖ ଡିଭାଇସକୁ କୌଣସି କ୍ଷତି ପହଞ୍ଚାଇନଥାଏ ।
ଏହି କାରଣରୁ ଏହି ଆପ୍ସ କୌଣସି ବି ପ୍ରକାରର ମାଲୱେୟାର ଚେକିଂ ପ୍ଲାଟଫର୍ମର ସ୍କାନରରେ ଆସିନଥାଏ ଏବଂ ଖସିଯାଇଥାଏ । ଗୋଟେଥର ଇନଷ୍ଟଲ ହେବା ପରେ ୟୁଜରଙ୍କୁ ଅପଡେଟ ଇନଷ୍ଟଲ କରିବା ପାଇଁ କହିଥାଏ ଏବଂ ଅପଡେଟ ସହ ହିଁ ଫୋନରେ ମାଲୱେୟାର ମଧ୍ୟ ଇନଷ୍ଟଲ କରି ଦିଆଯାଇଥାଏ ।
ଯଦି ଆପଣଙ୍କ ସ୍ମାର୍ଟ ଫୋନରେ ଏହି ୫ଟି ଆପ୍ ମଧ୍ୟରୁ କେହି ବି ଇନଷ୍ଟଲ ଅଛି ତେବେ ସେଗୁଡ଼ିକୁ ତୁରନ୍ତ ଅନଇନଷ୍ଟର କରିଦିଅନ୍ତୁ । ସେହି ୫ ଆପ୍ ଗୁଡିକ ହେଲା ଫାଇଲ୍ ମ୍ୟାନେଜର ସ୍ମଲ ଲାଇଟ୍, ମାଇ ଫିଟନେସ୍ ଟ୍ରାକର, ଜେଟର ଅଥେଣ୍ଟିକେସନ, କୋଡାଇସ ଫିସ୍କଲ ୨୦୨୨, ରିକଭର ଅଡିଓ, ଇମେଜେସ ଆଣ୍ଡ ଭିଡିଓ ।
