ଜମ୍ମୁ ଓ କାଶ୍ମୀରରେ ୩ ଆତଙ୍କବାଦୀ ନିପାତ

ଜମ୍ମୁ-କାଶ୍ମୀର:  ଜାମୁ ଓ କାଶ୍ମୀରରେ ଡବଲ ଏନକାଉଣ୍ଟର । ପୃଥକ ପୃଥକ ଦୁଇଟି ଏନକାଉଣ୍ଟରରେ ୩ ଆତଙ୍କବାଦୀ ନିପାତ । କୁପୱାଡା ଜିଲ୍ଲା ମାଛିଲ ସେକ୍ଟରରେ ୨ ଆତଙ୍କବାଦୀଙ୍କ ମୃତ୍ୟୁ ଘଟିଥିବା ବେଳେ ତଙ୍ଗଧାର ସେକ୍ଟରରେ ଜଣେ ମରିଛି ।

ଜାମ୍ମୁ ଓ କାଶ୍ମୀର ପୋଲିସ ଏବଂ ସେନାର ଯବାନଙ୍କୁ ନେଇ ଆରମ୍ଭ ହୋଇଥିଲା ମିଳିତ ଅପରେସନ । ଗୁଇନ୍ଦା ସୂତ୍ରରୁ ଖବର ପାଇ ଅଭିଯାନ ଆରମ୍ଭ କରିଥିଲା ମିଳିତ ଟିମ । ଗତକାଲି ରାତିରୁ ଚାଲିଛି ଏହି ଅପରେସନ । କୁପୱାଡା ଜିଲ୍ଲାର ମାଛିଲ ଅଂଚଳରେ ଅନୁପ୍ରବେଶ କରିବାକୁ ଉଦ୍ୟମ ବେଳେ ଗୁଳିମାଡ଼ରେ ନିପାତ ହୋଇଛନ୍ତି ୨ ଆତଙ୍କବାଦୀ । ସେନାର ଶ୍ରୀନଗର କର୍ପସ ପକ୍ଷରୁ ଏକ୍ସରେ ଏହି ସୂଚନା ଦିଆଯାଇଛି ।

ସେହିଭଳି ତଙ୍ଗଧାର ସେକ୍ଟରରେ ମଧ୍ୟ କିଛି ଆତଙ୍କବାଦୀ ଅନୁପ୍ରବେଶ କରିବାକୁ ଉଦ୍ୟମ କରିଥିଲେ । ଯବାନଙ୍କ ସହ ଗୁଳି ବିନିମୟରେ ଜଣେ ଆତଙ୍କବାଦୀ ସଫା ହୋଇଛି । ଆହୁରି କିଛି ଆତଙ୍କବାଦୀ ଲୁଚିଥିବା ସନ୍ଦେହରେ ମିଳିତ ଟିମ ପକ୍ଷରୁ କମ୍ବିଂ ଅପରେସନ ଚାଲିଛି ।

ରଜୌରୀ ଜିଲ୍ଲା ଲାଠି ଅଞ୍ଚଳରେ ମଧ୍ୟ ଆତଙ୍କବାଦୀ ଲୁଚିଥିବା ଖବର ମିଳିବା ପରେ ସେନା ପକ୍ଷରୁ ସର୍ଚ୍ଚ ଅପରେସନ କରାଯାଉଛି । ଏକକାଳୀନ ୩ଟି ସ୍ଥାନରେ ଚାଲିଛି ସେନାର ଏହି ଅପରେସନ ।