ରାଜ୍ୟ ସରକାରଙ୍କ ମିଛ ଅସ୍ମିତା ଭିତରେ ହଜିଯିବ କି କୋଟିଆର ଅସ୍ତିତ୍ବ ?

କୋଟିଆ: ଆନ୍ଧ୍ରରେ ଲିଭିଯିବ କି କୋରାପୁଟ ସୀମାବର୍ତ୍ତୀ କୋଟିଆ ? ରାଜ୍ୟ ସରକାରଙ୍କ ମିଛ ଅସ୍ମିତା ଭିତରେ ହଜିଯିବ କି ଅସ୍ତିତ୍ବ ? ଆଦିବାସୀଙ୍କୁ ପ୍ରଲୋଭିତ କରୁଛି ପଡ଼ୋଶୀ ରାଜ୍ୟ । ଅନୁପ୍ରବେଶ ସହ ଓଡ଼ିଆ ଭାଷା, ସଂସ୍କୃତି ଉପରେ ବି କବଜା । ସୀମାକୁ ସୁରକ୍ଷା ଦେବାରେ ଫେଲ ରାଜ୍ୟ ସରକାର । ପୂର୍ବ ସରକାରଙ୍କ ସମୟରେ କୋରାପୁଟ ଜିଲ୍ଲା ସୀମାନ୍ତ କୋଟିଆର ବିକାଶ ପାଇଁ ଖର୍ଚ୍ଚ କରାଯାଇଥିଲା ୧୫୦ କୋଟି ଟଙ୍କା । ନୂଆ ଥାନା, ଆଦର୍ଶ ବିଦ୍ୟାଳୟ, ବ୍ଲାକଟପ୍ ରାସ୍ତା, ସବୁ ଗାଁରେ ପାନୀୟ ଜଳ ପ୍ରକଳ୍ପ ନିର୍ମାଣ ହୋଇଥିଲା । ହେଲେ ଏବେ କୋଟିଆ ଉପରେ ପୁଣି ଥରେ ଲୋଲୁପ ଦୃଷ୍ଟି ପକାଇଛି ଆନ୍ଧ୍ର । ବାର୍ଦ୍ଧକ୍ୟ ଭତ୍ତା, ଆମ୍ମାୱାଡ଼ି ଯୋଜନାରେ ଆର୍ଥିକ ସହାୟତା ସହ କାର୍ଡ ବଦଳାଇ ଲୋକଙ୍କ ନୂଆ ଆଧାର ଓ ଭୋଟ କାର୍ଡ କରାଯାଉଥିବା ଅଭିଯୋଗ ହୋଇଛି । ଏପରି ସ୍ଥିତିରେ ଓଡ଼ିଶା ସରକାରଙ୍କ ନୀରବତାକୁ ନେଇ ପ୍ରଶ୍ନ ଉଠାଇଛନ୍ତି ଅଞ୍ଚଳବାସୀ ।

ଖାଲି ଅନୁପ୍ରବେଶ ନୁହେଁ ଓଡ଼ିଶାର ଭାଷା ଓ ସଂସ୍କୃତି ଉପରେ ବି କବଜା କରିବାକୁ ପ୍ରୟାସ କରିଛି ପଡୋଶୀ ରାଜ୍ୟ । ଓଡ଼ିଶାର ଗାଁ, ଓଡ଼ିଶାର ମାଟି ହେଲେ ବି ଓଡ଼ିଆ ପଢିପାରୁ ନାହାନ୍ତି ଏଠାକାର ପିଲା । ତେଲୁଗୁ ଭାଷାରେ ପିଲାଙ୍କୁ ପଢ଼ାଯାଉଛି ପାଠ । ଆଉ ପାଠ ପଢ଼ାଉଛନ୍ତି ଆନ୍ଧ୍ର ସରକାରଙ୍କ ଶିକ୍ଷକ । ପଞ୍ଚାୟତର ବିବାଦୀୟ ୨୧ ଖଣ୍ଡ ଗ୍ରାମବାସୀଙ୍କ ପିଲାଙ୍କୁ ଓଡ଼ିଆ ଭାଷାରେ ପାଠ ପଢ଼ି ଓଡ଼ିଆ ଶିଖିବେ ସେଥିପାଇଁ ଅନୁଦାନ ଢାଳି ଓଡ଼ିଶା ସରକାର । ତାଡ଼ିବାଲସା ଗ୍ରାମରେ ନେତାଜୀ ସୁବାସ ଚନ୍ଦ୍ର ବୋଷ ଆବାସିକ ବିଦ୍ୟାଳୟ, କୋଟିଆରେ ସରକାରୀ ଉଚ୍ଚ ବିଦ୍ୟାଳୟ, ଗଞ୍ଜେଇ ପଦର ଗ୍ରାମରେ ଆଦର୍ଶ ବିଦ୍ୟାଳୟ ଆଦି ନିର୍ମାଣ କରାଯିବା ସହ ଛାତ୍ରାବାସ ଓ ମାଗଣାରେ ବହି ପୋଷାକ, ଖାଇବା, ସାଇକେଲ ଯୋଗାଇ ଦିଆଯାଉଛି । ହେଲେ ସ୍କୁଲରେ ଦାଖିଲା ନେବାକୁ ପ୍ରତି ପିଲାଙ୍କ ପିଛା ୧୫ ହଜାର ଟଙ୍କା ଆର୍ଥିକ ସହାୟତା ଦେଇ ପ୍ରଲୋଭିତ କରୁଛି ଆନ୍ଧ୍ର । ତେଣୁ ପାଠ ପଢାଇବା ଏଠାରେ ଚ୍ୟାଲେଞ୍ଜ ସୃଷ୍ଟି କରିଥିବା କହିଛନ୍ତି ଶିକ୍ଷକ। ତୁରନ୍ତ ପଦକ୍ଷେପ ନନେଲେ ଓଡ଼ିଶା ମାନଚିତ୍ରରୁ କୋଟିଏ ହଜିଯିବା ଆଶଂକା ରହିଥିବା କହିଛନ୍ତି ବୁଦ୍ଧିଜୀବୀ ।