spot_img

Latest Posts

ଜାତୀୟ ପତାକା ମାର୍କର ଉଠାଇ ପକେଟରେ ରଖିଲେ ମୋଦି

ନନ୍ଦିଘୋଷ ବ୍ୟୁରୋ: ଫିଲିପାଇନ୍ସର ମାନିଲାଠାରେ ଆୟୋଜିତ କ୍ୱାଡ୍ ଶିଖର ସମ୍ମିଳନୀରେ ଏକ ନିଆରା ଏବଂ ହୃଦୟସ୍ପର୍ଶୀ ଦୃଶ୍ୟ ଦେଖିବାକୁ ମିଳିଛି। ଗ୍ରୁପ ଫଟୋ ଉଠାଇବା ସମୟରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଚଟାଣରେ ଲାଗିଥିବା ଭାରତୀୟ ଜାତୀୟ ପତାକା ଚିହ୍ନକୁ ଉଠାଇ ନିଜ ପକେଟରେ ରଖିଥିଲେ। ଜାତୀୟ ପତାକା ପ୍ରତି ତାଙ୍କର ଏହି ସମ୍ମାନକୁ ନେଇ ଏବେ ସୋସିଆଲ ମିଡିଆରେ ବେଶ୍ ଚର୍ଚ୍ଚା ହେଉଛି।

ଆସିଆନ୍ ଶିଖର ସମ୍ମିଳନୀ ଅବସରରେ ଫିଲିପାଇନ୍ସର ମାନିଲାଠାରେ କ୍ୱାଡ୍ ନେତାମାନଙ୍କର ଏକ ଗୁରୁତ୍ୱପୂର୍ଣ୍ଣ ବୈଠକ ଅନୁଷ୍ଠିତ ହୋଇଛି। ୨୦୨୪ ପରେ ଏହା ହେଉଛି କ୍ୱାଡ୍ ନେତାମାନଙ୍କର ପ୍ରଥମ ସମ୍ମିଳନୀ। ଏହି ସମୟରେ ଫଟୋ ସେସନ୍ ପାଇଁ ମଞ୍ଚ ଉପରେ ନେତାମାନେ ଛିଡ଼ା ହେବା ସ୍ଥାନକୁ ଚିହ୍ନିତ କରିବା ପାଇଁ ଚଟାଣରେ ସମ୍ପୃକ୍ତ ଦେଶର ପତାକା ଥିବା ଛୋଟ କାର୍ଡ ଲଗାଯାଇଥିଲା। ତେବେ ପ୍ରଧାନମନ୍ତ୍ରୀ ମୋଦୀ ମଞ୍ଚ ଉପରକୁ ଆସିବା ମାତ୍ରେ ଚଟାଣରେ ଥିବା ଭାରତୀୟ ତ୍ରିରଙ୍ଗା ଚିହ୍ନକୁ ତଳେ ପଡ଼ିଥିବା ଦେଖି ତୁରନ୍ତ ନଇଁ ପଡ଼ି ତାହାକୁ ଉଠାଇ ନେଇଥିଲେ ଏବଂ ସମ୍ମାନର ସହ ନିଜ ପକେଟରେ ରଖିଦେଇଥିଲେ।

ଏହି ସମୟରେ ପାଖରେ ଛିଡ଼ା ହୋଇଥିବା ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଏହା ଦେଖି ହସି ହସି କହିଥିଲେ, “ସେଭ୍ ଇଟ୍” ଅର୍ଥାତ୍ ଏହାକୁ ସାଇତି ରଖନ୍ତୁ। ଏହି ଫଟୋ ସେସନରେ ପ୍ରଧାନମନ୍ତ୍ରୀ ମୋଦୀ ଏବଂ ରାଷ୍ଟ୍ରପତି ଟ୍ରମ୍ପଙ୍କ ସହ ଅଷ୍ଟ୍ରେଲିଆ ପ୍ରଧାନମନ୍ତ୍ରୀ ଆନ୍ଥୋନି ଆଲବାନିଜ୍ ଏବଂ ଜାପାନ ପ୍ରଧାନମନ୍ତ୍ରୀ ସାନାଏ ତାକାଇଚି ମଧ୍ୟ ଉପସ୍ଥିତ ଥିଲେ।

ତେବେ ଜାତୀୟ ପତାକା ପ୍ରତି ପ୍ରଧାନମନ୍ତ୍ରୀ ମୋଦୀଙ୍କର ଏହି ସମ୍ମାନବୋଧ ଏବଂ ସରଳତାର ଭିଡିଓ ଏବେ ଭାଇରାଲ ହେବାରେ ଲାଗିଛି, ଯାହାକୁ ଦେଶବାସୀ ବେଶ୍ ପ୍ରଶଂସା କରୁଛନ୍ତି। ଅନ୍ତର୍ଜାତୀୟ ମଞ୍ଚରେ ଦେଶର ସମ୍ମାନ ରଖିବା ସହ ଜାତୀୟ ପତାକା ପ୍ରତି ପ୍ରଧାନମନ୍ତ୍ରୀଙ୍କ ଏଭଳି ଆଚରଣ ପୁଣିଥରେ ତାଙ୍କର ଦେଶପ୍ରେମକୁ ପ୍ରତିପାଦିତ କରିଛି।

ସୌଜନ୍ୟ-ANI

Latest Posts

Don't Miss