ନୂଆଦିଲ୍ଲୀ: ଆଜି ଭାରତ ଓ ଇଂଲଣ୍ଡ ମଧ୍ୟରେ ଖେଳାଯିବ ତୃତୀୟ ଟେଷ୍ଟ ମ୍ୟାଚ୍। ଭାରତ ଏବଂ ଇଂଲଣ୍ଡ ମଧ୍ୟରେ ଚାରି ମ୍ୟାଚ୍ ବିଶିଷ୍ଟ ସିରିଜର ତୃତୀୟ ମ୍ୟାଚ୍ ଅହମ୍ମଦାବାଦର ନବ ନିର୍ମିତ ମୋଟେରା ଷ୍ଟାଡିୟମରେ ଖେଳାଯିବ। ପିଙ୍କ୍ ବଲରେ ଖେଳାଯିବ ଡେ-ନାଇଟ୍ ଟେଷ୍ଟ ମ୍ୟାଚ୍। ଟିମ୍ ଇଣ୍ଡିଆ ପ୍ଲେଇଁ ଇଲେଭେନରେ ପରିବର୍ତ୍ତନ କରିବାର ସମ୍ଭାବନା ରହିଛି। ଆଜିର ମ୍ୟାଚ୍ ବହୁ ଗୁରୁତ୍ୱ ବହନ କରୁଛି।
ପୂର୍ବରୁ ଦୁଇ ଟିମ୍ ଗୋଟିଏ ଲେଖାଏଁ ମ୍ୟାଚ୍ ଜିତି ସାରିଛନ୍ତି। ଭ୍ରମଣକାରୀ ଦଳ ପାଇଁ ଚିନ୍ତାର କାରଣ ହୋଇଛି ଭାରତର ବୋଲିଂ ଲାଇନ୍। ଭାରତୀୟ ସ୍ପିନରଙ୍କ ଆଗରେ ଇଂଲଣ୍ଡ ବ୍ୟାଟସମ୍ୟାନ୍ ତିଷ୍ଠିବା ଏତେଟା ସହଜ ହେବନି। ଓପନର ଓ ମଧ୍ୟମ ବ୍ୟାଟିଂ ଲାଇନ୍ ଉପରେ ଭରସା କରିବ ଟିମ୍ ଇଣ୍ଡିଆ।
ସେପଟେ ଜୋ ରୁଟ୍, ରୋରି ବନସ୍ , ଡୋମନିକ୍ ସିବଲେ ଓ ବେନ୍ ଷ୍ଟୋକସଙ୍କ ଉପରେ ଭରସା କରିବ ଭ୍ରମଣକାରୀ ଦଳ। ବିଶ୍ୱର ସବୁଠୁ ବଡ କ୍ରିକେଟ୍ ଷ୍ଟାଡିୟମ ମୋଟେରାରେ ଆଜିଠୁ ଆରମ୍ଭ ହେବ ତୃତୀୟ ଟେଷ୍ଟ ମ୍ୟାଚ୍। ଯାହା ଉପରେ ରହିଛି କ୍ରିଡାପ୍ରେମୀଙ୍କ ନଜର ।
