ଟ୍ରମ୍ପଙ୍କ ଠାରୁ ଧୋକ୍କା ଖାଇବା ପରେ କ୍ରାଉନ ପ୍ରିନ୍ସ ସଲମାନଙ୍କ ଭରସାରେ ଜେଲେନସ୍କି

ନନ୍ଦିଘୋଷ ବ୍ୟୁରୋ : ରୁଷ-ୟୁକ୍ରେନ ଯୁଦ୍ଧକୁ ନେଇ ସାଉଦି ଆରବର ଜେଦ୍ଦାହରେ ଆମେରିକା ଓ ରୁଷ ଅଧିକାରୀମାନେ ପୁଣି ସାକ୍ଷାତ କରିବାକୁ ଯାଉଛନ୍ତି । ଦ୍ବିତୀୟ ପର୍ଯ୍ୟାୟ ଶାନ୍ତି ଆଲୋଚନା ପୂର୍ବରୁ ସୋମବାର ୟୁକେ୍ରନୀୟ ରାଷ୍ଟ୍ରପତି ଭୋଲୋଡିମିର ଜେଲେନସ୍କି ସାଉଦି ଆରବ ଅଭିମୁଖେ ଯାତ୍ରା କରିଛନ୍ତି । ଏଠାରେ ସେ କ୍ରାଉନ ପ୍ରିନ୍ସ ମହମ୍ମଦ ବିନ୍ ସଲମାନଙ୍କ ସହ ସାକ୍ଷାତ କରିବେ ।

ଏହା ପୂର୍ବରୁ ଜେଲେନସ୍କିଙ୍କ ଆମେରିକାଗସ୍ତ ଭଲ ନଥିଲା । ସେଠାରେ ତାଙ୍କର ଆମେରିକା ରାଷ୍ଟ୍ରପତି ଟ୍ରମ୍ପଙ୍କ ସହ ଯୁକ୍ତିତର୍କ ହୋଇଥିଲା । ତଥାପି, ଏବେ ଜେଲେନସ୍କି କହିଛନ୍ତି ତାଙ୍କୁ ଆମେରିକାରୁ ସକରାତ୍ମକ ସଙ୍କେତ ମିଳିଛି । ମହମ୍ମଦ ବିନ୍ ସଲମାନ ୨୦୨୨ ମସିହାରେ ଯୁଦ୍ଧ ଆରମ୍ଭରୁ ରୁଷ-ୟୁକ୍ରେନ୍ ମଧ୍ୟରେ ମଧ୍ୟସ୍ଥତା କରିବାରେ ଗୁରୁତ୍ବପୂର୍ଣ୍ଣ ଭୂମିକା ଗ୍ରହଣ କରିଛନ୍ତି, ବିଶେଷ କରି କଏଦୀ ଚୁକ୍ତିନାକାରେ । ଗତ ମାସରେ ରୁଷ ଓ ଆମେରିକା ମଧ୍ୟରେ ଆଲୋଚନା ସାଉଦି ଆରବରେ ହିଁ ହୋଇଥିଲା । ଜେଲେନସ୍କି ଆଶା କରୁଛନ୍ତି କି କ୍ରାଉନ ପ୍ରିନ୍ସ ତାଙ୍କୁ ସମ୍ମାନ ଦେବେ ଓ ଚୁକ୍ତି ତାଙ୍କ ସପକ୍ଷରେ କରିବେ  । ଜେଲେନସ୍କିଙ୍କ ଯାତ୍ରା ଏହି ସମୟରେ ହୋଇଛି, ଯେତେବେଳେ ଆମେରିକା ଓ ୟୁକ୍ରେନ ମଧ୍ୟରେ ସମ୍ପର୍କ ଖରାପ ହେଲା । ଯାହା ପରେ ୱାଶିଂଟନ କିଭ ସହିତ ସାମରିକ ସହାୟତା ଏବଂ ଗୁପ୍ତ ସୂଚନା ବାଣ୍ଟିବା ବନ୍ଦ କରିଦେଇଛି। ମହମ୍ମଦ ବିନ୍ ସଲମାନ ରାଷ୍ଟ୍ରପତି ଟ୍ରମ୍ପଙ୍କ ବନ୍ଧୁ ଏବଂ ତାଙ୍କର ପୁଟିନଙ୍କ ସହ ମଧ୍ୟ ଭଲ ସମ୍ପର୍କ ଅଛି। ଆଶା କରାଯାଉଛି ଯେ ଏହି ବୈଠକ ମାଧ୍ୟମରେ ଜେଲେନସ୍କିଙ୍କୁ ରୁଷ ଅଧିକାରୀଙ୍କ ସହ ଆଲୋଚନାରେ ସାମିଲ କରାଯାଇପାରିବ କିମ୍ବା ଆମେରିକା ପକ୍ଷରୁ ତାଙ୍କ ପକ୍ଷ ଉପସ୍ଥାପନ କରାଯାଇପାରିବ।

ମଙ୍ଗଳବାର ଆମେରିକୀୟ ଅଧିକାରୀଙ୍କ ସହ ହେବାକୁ ଥିବା ବୈଠକରେ ମିଳିତ ଖଣିଜ ଚୁକ୍ତି ଏବଂ ୟୁକ୍ରେନରେ ଯୁଦ୍ଧ କିପରି ଶେଷ କରାଯିବ ଭଳି ଗୁରୁତ୍ୱପୂର୍ଣ୍ଣ ପ୍ରସଙ୍ଗ ଉପରେ ଆଲୋଚନା ହେବ। ଯଦିଓ ଜେଲେନସ୍କି ଆମେରିକାର ସମର୍ଥନ ପୁନଃସ୍ଥାପିତ କରିବାକୁ ଚେଷ୍ଟା କରୁଛନ୍ତି, ସେ ବୈଠକରେ ଯୋଗ ଦେବେ ନାହିଁ ବୋଲି ଆଶା କରାଯାଉଛି। ୟୁକ୍ରେନୀୟ ପ୍ରତିନିଧି ଦଳରେ ତାଙ୍କର ମୁଖ୍ୟ କର୍ମଚାରୀ, ବୈଦେଶିକ ଏବଂ ପ୍ରତିରକ୍ଷା ମନ୍ତ୍ରୀ ଏବଂ ରାଷ୍ଟ୍ରପତି ପ୍ରଶାସନର ଜଣେ ବରିଷ୍ଠ ସାମରିକ ଅଧିକାରୀ ସାମିଲ ହେବେ।

ଜେଲେନସ୍କି ଏକ୍ସରେ ଏକ ପୋଷ୍ଟରେ କହିଛନ୍ତି, ‘ଆମର ପକ୍ଷରୁ, ଆମେ ବିଶ୍ୱସ୍ତ ଆଲୋଚନା ପାଇଁ ସମ୍ପୂର୍ଣ୍ଣ ପ୍ରତିବଦ୍ଧ, ଏବଂ ଆମେ ଆଶା କରୁଛୁ ଯେ ଆମେ ଆବଶ୍ୟକୀୟ ନିଷ୍ପତ୍ତି ଏବଂ ପଦକ୍ଷେପଗୁଡ଼ିକ ଉପରେ ଆଲୋଚନା କରି ସହମତ ହେବୁ’ । ଏବେ ଦେଖିବାକୁ ବାକି ରହିଲା ଯେ ଏହି ବୈଠକ ଆରମ୍ଭ ହେବା ପୂର୍ବରୁ ସାଉଦି ଯୁବରାଜ ସଲମାନଙ୍କୁ ଭେଟିବା ତାଙ୍କ ପାଇଁ କେତେ ଲାଭଦାୟକ ହେବ।