ଗ୍ୟାଙ୍ଗଷ୍ଟର ଓ ସାଇବର ଠକ ଅପରାଧ କରିବା ପାଇଁ କାହିଁକି ଏହି ଆପକୁ ପସନ୍ଦ କରନ୍ତି ?

ନନ୍ଦିଘୋଷ ବ୍ୟୁରୋ: ଗ୍ୟାଙ୍ଗଷ୍ଟର ଏବଂ ସାଇବର ଠକମାନେ ବ୍ୟବହାର କରୁଥିବା ମୋବାଇଲ୍ ଆପ୍ କ’ଣ? ଏମିତି ଅନେକ ଲୋକ ଥିବେ ଯେଉଁମାନେ ଏହି ପ୍ରଶ୍ନର ଉତ୍ତର ଜାଣିନଥିବେ ବାସ୍ତବରେ ଗତ କିଛି ବର୍ଷ ମଧ୍ୟରେ ଗ୍ୟାଙ୍ଗଷ୍ଟରମାନେ କଥାବାର୍ତ୍ତା ପାଇଁ ବ୍ୟବହାର କରୁଥିବା ମୋବାଇଲ୍ ଆପ୍ ବିଷୟରେ ପୁଲିସ ଜାଣିବାକୁ ପାଇଛି।ଦିଲ୍ଲୀ-ଏନସିଆର ଏବଂ ଅନ୍ୟାନ୍ୟ ସ୍ଥାନରେ ସକ୍ରିୟ ଥିବା ଲରେନ୍ସ ବିଷ୍ଣୋଇ ଗୋଷ୍ଠୀ ଏବଂ ଅନ୍ୟ ଗ୍ୟାଙ୍ଗଷ୍ଟର ଏବଂ ସେମାନଙ୍କ ସହଯୋଗୀମାନେ ପରସ୍ପର ସହ ଯୋଗାଯୋଗ କରିବା ପାଇଁ ଆର୍ମେନିଆର ଆପ୍ ଜାଙ୍ଗି ବ୍ୟବହାର କରୁଥିବା ଜଣାପଡିଛି। କିଛି ମାସ ତଳେ ଦିଲ୍ଲୀ ପୁଲିସ ଗ୍ୟାଙ୍ଗଷ୍ଟର ହିମାଂଶୁ ଭାଇର ଦୁଇ ଜଣ ସୁଟରଙ୍କୁ ଗିରଫ କରିଥିଲା ଏବଂ ତଦନ୍ତ ବେଳେ ପୁଲିସ ଜାଣିବାକୁ ପାଇଥିଲା ଯେ ସେ ଜାଙ୍ଗି ଆପରେ ଚାଟିଂ କରୁଥିଲେ।

ଗ୍ୟାଙ୍ଗଷ୍ଟରମାନେ ଜାଙ୍ଗିଙ୍କୁ କାହିଁକି ପସନ୍ଦ କରନ୍ତି ?

ଟାଇମ୍ସ ଅଫ୍ ଇଣ୍ଡିଆର ରିପୋର୍ଟ ଅନୁଯାୟୀ, ଆପର ଅନଟ୍ରେସେବୁଲ ନେଟୱାର୍କ(ଧରାପଡୁନଥିବା ନେଟୱର୍କ) କାରଣରୁ ଗ୍ୟାଙ୍ଗଷ୍ଟରମାନଙ୍କୁ ଟ୍ରାକ୍ କରିବା ଏବଂ ସେମାନଙ୍କ ରହସ୍ୟ ଠାବ କରିବା କଷ୍ଟକର ହୋଇପଡ଼ୁଛି। ଏହି ଆପକୁ ଗ୍ୟାଙ୍ଗଷ୍ଟରମାନେ ପସନ୍ଦ କରୁଛନ୍ତି କାରଣ ଏହି ଆପ୍ ଆପଣଙ୍କୁ ମୋବାଇଲ ନମ୍ବର ଏବଂ ଇମେଲ ଆଇଡି ନ ନେଇ ଆପ୍ ବ୍ୟବହାର କରିବାକୁ ଅନୁମତି ଦେଇଥାଏ । ଏହି ଆପ୍ ବ୍ୟବହାର କରିବା ପାଇଁ ଆପ୍, ବ୍ୟବହାରକାରୀଙ୍କୁ ନିଜର ଏକ ୧୦ ଅଙ୍କ ବିଶିଷ୍ଟ ନମ୍ବର ଦେଇଥାଏ, ଯାହାଦ୍ୱାରା ଅପରାଧୀମାନେ ନିଜ ମୋବାଇଲ ନମ୍ବର ପ୍ରକାଶ ନକରି ନିଜ ସହଯୋଗୀଙ୍କ ସହ ଯୋଗାଯୋଗ କରିପାରିବେ । ଏହି ଆପ୍ ବ୍ୟବହାରକାରୀଙ୍କ ସ୍କ୍ରିନରେ କେବଳ ଜେନେରେଟେଡ୍ ନମ୍ବର ଦେଖାଯାଇଥାଏ। କଂପାନିର ସାଇଟରେ ଥିବା ସୂଚନା ଅନୁଯାୟୀ, ଆପ୍ ବ୍ୟବହାର କରିବା ପାଇଁ ୟୁଜରଙ୍କ ନିଜ ନମ୍ବର ନିଆଯାଇନଥାଏ, ଯାହାଦ୍ୱାରା ୟୁଜରଙ୍କୁ କେହି ମନିଟର କରିପାରିବେ ନାହିଁ ଏବଂ ୟୁଜର୍ସ ଆକାଉଣ୍ଟ ହ୍ୟାକିଂରୁ ସମ୍ପୂର୍ଣ୍ଣ ସୁରକ୍ଷିତ ରହିବେ ।

ଜାଙ୍ଗି କିପରି କାମ କରେ ?

ସାଇବର ସେଲ୍ ଅଧିକାରୀ କହିଛନ୍ତି ଯେ ଏହି ମୋବାଇଲ୍ ଆପ୍ ରେ ମେସେଜ୍ ପଠାଯିବା ମାତ୍ରେ ସେହି ମେସେଜ୍ ଆପ୍ ର ସର୍ଭର ଜରିଆରେ ଟାର୍ଗେଟ୍ ରେ ପହଞ୍ଚିଯାଇଥାଏ। ମେସେଜ ଡେଲିଭର ହେବା ମାତ୍ରେ ଆପଣଙ୍କ ସିକ୍ରେଟ୍ ମେସେଜ ଆପେ ଆପେ ଆପର ସର୍ଭରରୁ ଡିଲିଟ୍ ହୋଇଯାଏ, ଯେଉଁଥିପାଇଁ ମେସେଜକୁ ଟ୍ରାକ୍ କରାଯାଇପାରିବ ନାହିଁ । ଏହି ଏନକ୍ରିପସନ୍ କାରଣରୁ କେବଳ ମେସେଜର ପ୍ରେରକ ଏବଂ ରିସିଭର ମେସେଜ, ଅଡିଓ ଏବଂ ଭିଡିଓ କଲ୍ ଆକସେସ୍ କରିପାରିବେ।

ସ୍କାମର୍ମାନେ ମଧ୍ୟ ବ୍ୟବହାର କରନ୍ତି :

ଗ୍ୟାଙ୍ଗଷ୍ଟରଙ୍କ ବ୍ୟତୀତ ଅନଲାଇନ ସ୍କାମରମାନେ ମଧ୍ୟ ଏହି ଆପକୁ ବହୁଳ ଭାବେ ବ୍ୟବହାର କରୁଛନ୍ତି । ଗତବର୍ଷ ସୁରକ୍ଷା ଓ ଗୁଇନ୍ଦା ସଂସ୍ଥାର ସୁପାରିସ କ୍ରମେ କେନ୍ଦ୍ର ସରକାର ଜାଙ୍ଗି ସମେତ ୧୪ଟି ମୋବାଇଲ ୍ ମେସେଜିଂ ଆପ୍କୁ ନିଷିଦ୍ଧ କରିଥିଲେ, ଯାହାକୁ ଆତଙ୍କବାଦୀ ସଙ୍ଗଠନମାନେ ଯୋଗାଯୋଗ ପାଇଁ ବ୍ୟବହାର କରୁଥିବା ଅଭିଯୋଗ ହୋଇଥିଲା।