ଶିବସେନାର ୧୫ ବିଦ୍ରୋହୀ ବିଧାୟକଙ୍କୁ ଓ୍ବାଇ ପ୍ଲସ୍ ସୁରକ୍ଷା

ମୁମ୍ବାଇ: ମହାରାଷ୍ଟ୍ରରେ ବର୍ତ୍ତମାନ ଚାଲିଥିବା ରାଜନୌତିକ ଲଢେଇ ମଧ୍ୟରେ କେନ୍ଦ୍ର ସରକାରଙ୍କ ଏକ ବଡ଼ ନିଷ୍ପତ୍ତି ଘୋଷଣା କରିଛନ୍ତି। ଉଦ୍ଧବ ଠାକରେଙ୍କ ନେତୃତ୍ବରେ ଅଘାଡି ସରକାରଙ୍କ ବିରୋଧରେ ବିଦ୍ରୋହ କରୁଥିବା ଶିବସେନାର ୧୫ଜଣ ବିଦ୍ରୋହୀ ବିଧାୟକଙ୍କୁ ଓ୍ବାଇ ପ୍ଲସ୍  ସୁରକ୍ଷା ପ୍ରଦାନ କରାଯାଇଛି । ଏବେ ଏହି ବିଧାୟକ ମାନଙ୍କ ଘର ଆଗରେ CRPF ଯବାନଙ୍କୁ ନିୟୋଜିତ କରାଯାଇଛି । ସୂଚନା ଅନୁସାରେ ବିଦ୍ରୋହର ନେତୃତ୍ବ ନେଇଥିବା ଏକନାଥ ସିନ୍ଧେଙ୍କୁ ସମର୍ଥନ କରୁଥିବା ବିଧାୟକ ମାନଙ୍କ ଘର ଏବଂ ଅଫିସ୍ ଆଦିରେ ବିଭିନ୍ନ ସ୍ଥାନ ମାନଙ୍କରେ ଆକ୍ରମଣ ଓ ଭଙ୍ଗାରୁଜା ହେଉଥିବାରୁ ସେମାନଙ୍କୁ ସୁରକ୍ଷା ପ୍ରଦାନ କରାଯାଇଛି ।

ଉଦ୍ଧବ ଠାକରେଙ୍କ ସମର୍ଥକ ମାନେ ଶନିବାର ଅନେକ ବିଦ୍ରୋହୀ ବିଧାୟକଙ୍କ ଘରେ ଓ ଅଫିସରେ ଭଙ୍ଗାରୁଜା କରିଥିଲେ । ଏହା ପରେ ଗୌହାଟୀରେ ଥିବା ଶିବସେନା କର୍ମୀ ମାନେ ବିଦ୍ରୋହୀ ବିଧାୟକଙ୍କ ସୁରକ୍ଷା ପାଇଁ ଦାବି କରିଥିଲେ ।ସେପଟେ କେନ୍ଦ୍ର ସରକାରଙ୍କ ଦ୍ବାରା ଦିଆଯାଇଥିବା ଓ୍ବାଇ ପ୍ଲସ୍ ସୁରକ୍ଷା ଭିତରେ ସିନ୍ଧେଙ୍କ ନାଁ ନାହିଁ । କିଛି ବିଧାୟକଙ୍କ ଘର ଆଗରେ CRPF ଯବାନ ନିୟୋଜିତ ଥିବା ବେଳେ ଆଉକିଛି ବିଧାୟକଙ୍କ ଘର ଆଗରେ କମାଣ୍ଡୋଙ୍କ ସହ ସୁରକ୍ଷାକର୍ମୀ ନିୟୋଜିତ ରହିଛନ୍ତି । ଅନ୍ୟପଟେ ବିଦ୍ରୋହୀଙ୍କୁ ସୁରକ୍ଷା ଦିଆଯିବା ପ୍ରସଙ୍ଗକୁ ନେଇ କେନ୍ଦ୍ରସରକାରଙ୍କ ଉପରେ ବର୍ଷିଛନ୍ତି ଶିବସେନା ନେତା ଆଦିତ୍ୟ ଠାକରେ ।